១. អាហុនេយ្យវគ្គោ

១. បឋមអាហុនេយ្យសុត្តវណ្ណនា

១. ឆក្កនិបាតស្ស បឋមេ ឥធ, ភិក្ខវេ, ភិក្ខូតិ, ភិក្ខវេ, ឥមស្មិំ សាសនេ ភិក្ខុ. នេវ សុមនោ ហោតិ ន ទុម្មនោតិ ឥដ្ឋារម្មណេ រាគសហគតេន សោមនស្សេន សុមនោ វា អនិដ្ឋារម្មណេ ទោសសហគតេន ទោមនស្សេន ទុម្មនោ វា ន ហោតិ. ឧបេក្ខកោ វិហរតិ សតោ សម្បជានោតិ មជ្ឈត្តារម្មណេ អសមបេក្ខនេន អញ្ញាណុបេក្ខាយ ឧបេក្ខកភាវំ អនាបជ្ជិត្វា សតោ សម្បជានោ ហុត្វា អារម្មណេ មជ្ឈត្តោ វិហរតិ. ឥមស្មិំ សុត្តេ ខីណាសវស្ស សតតវិហារោ កថិតោ.

២. ទុតិយអាហុនេយ្យសុត្តវណ្ណនា

២-៤. ទុតិយេ អនេកវិហិតំ ឥទ្ធិវិធន្តិអាទីនិ វិសុទ្ធិមគ្គេ វុត្តានេវ. អាសវានំ ខយា អនាសវន្តិ អាសវានំ ខយេន អនាសវំ, ន ចក្ខុវិញ្ញាណាទីនំ វិយ អភាវេនាតិ. ឥមស្មិំ សុត្តេ ខីណាសវស្ស អភិញ្ញា បដិបាដិយា កថិតា. តតិយចតុត្ថេសុ ខីណាសវោ កថិតោ.

៥-៧. អាជានីយសុត្តត្តយវណ្ណនា

៥-៧. បញ្ចមេ អង្គេហីតិ គុណង្គេហិ. ខមោតិ អធិវាសកោ. រូបានន្តិ រូបារម្មណានំ. វណ្ណសម្បន្នោតិ សរីរវណ្ណេន សម្បន្នោ. ឆដ្ឋេ ពលសម្បន្នោតិ កាយពលេន សម្បន្នោ. សត្តមេ ជវសម្បន្នោតិ បទជវេន សម្បន្នោ.

៨-៩. អនុត្តរិយសុត្តាទិវណ្ណនា

៨-៩. អដ្ឋមេ អនុត្តរិយានីតិ អញ្ញេន ឧត្តរិតរេន រហិតានិ និរុត្តរានិ. ទស្សនានុត្តរិយន្តិ រូបទស្សនេសុ អនុត្តរំ. ឯស នយោ សព្ពបទេសុ. ហត្ថិរតនាទីនញ្ហិ ទស្សនំ ន ទស្សនានុត្តរិយំ, និវិដ្ឋសទ្ធស្ស បន និវិដ្ឋបេមវសេន ទសពលស្ស វា ភិក្ខុសង្ឃស្ស វា កសិណអសុភនិមិត្តាទីនំ វា អញ្ញតរស្ស ទស្សនំ ទស្សនានុត្តរិយំ នាម. ខត្តិយាទីនំ គុណកថាសវនំ ន សវនានុត្តរិយំ, និវិដ្ឋសទ្ធស្ស បន និវិដ្ឋបេមវសេន តិណ្ណំ វា រតនានំ គុណកថាសវនំ តេបិដកពុទ្ធវចនសវនំ វា សវនានុត្តរិយំ នាម. មណិរតនាទីនំ លាភោ ន លាភានុត្តរិយំ, សត្តវិធអរិយធនលាភោ បន លាភានុត្តរិយំ នាម. ហត្ថិសិប្បាទិសិក្ខនំ ន សិក្ខានុត្តរិយំ, សិក្ខាត្តយស្ស បូរណំ បន សិក្ខានុត្តរិយំ នាម. ខត្តិយាទីនំ បារិចរិយា ន បារិចរិយានុត្តរិយំ, តិណ្ណំ បន រតនានំ បារិចរិយា បារិចរិយានុត្តរិយំ នាម. ខត្តិយាទីនំ គុណានុស្សរណំ ន អនុស្សតានុត្តរិយំ, តិណ្ណំ បន រតនានំ គុណានុស្សរណំ អនុស្សតានុត្តរិយំ នាម. ឥតិ ឥមានិ ឆ អនុត្តរិយានិ លោកិយលោកុត្តរានិ កថិតានិ. នវមេ ពុទ្ធានុស្សតីតិ ពុទ្ធគុណារម្មណា សតិ. សេសបទេសុបិ ឯសេវ នយោ.

១០. មហានាមសុត្តវណ្ណនា

១០. ទសមេ មហានាមោតិ ទសពលស្ស ចូឡបិតុ បុត្តោ ឯកោ សក្យរាជា. យេន ភគវា តេនុបសង្កមីតិ ភុត្តបាតរាសោ ហុត្វា ទាសបរិជនបរិវុតោ គន្ធមាលាទីនិ គាហាបេត្វា យត្ថ សត្ថា, តត្ថ អគមាសិ. អរិយផលំ អស្ស អាគតន្តិ អាគតផលោ. សិក្ខាត្តយសាសនំ ឯតេន វិញ្ញាតន្តិ វិញ្ញាតសាសនោ. ឥតិ អយំ រាជា ‘‘សោតាបន្នស្ស និស្សយវិហារំ បុច្ឆាមី’’តិ បុច្ឆន្តោ ឯវមាហ.

នេវស្ស រាគបរិយុដ្ឋិតន្តិ ន ឧប្បជ្ជមានេន រាគេន ឧដ្ឋហិត្វា គហិតំ. ឧជុគតន្តិ ពុទ្ធានុស្សតិកម្មដ្ឋានេ ឧជុកមេវ គតំ. តថាគតំ អារព្ភាតិ តថាគតគុណេ អារព្ភ. អត្ថវេទន្តិ អដ្ឋកថំ និស្សាយ ឧប្បន្នំ បីតិបាមោជ្ជំ. ធម្មវេទន្តិ បាឡិំ និស្សាយ ឧប្បន្នំ បីតិបាមោជ្ជំ. ធម្មូបសញ្ហិតន្តិ បាឡិញ្ច អដ្ឋកថញ្ច និស្សាយ ឧប្បន្នំ. បមុទិតស្សាតិ ទុវិធេន បាមោជ្ជេន បមុទិតស្ស. បីតិ ជាយតីតិ បញ្ចវិធា បីតិ និព្ពត្តតិ. កាយោ បស្សម្ភតីតិ នាមកាយោ ច ករជកាយោ ច ទរថបដិប្បស្សទ្ធិយា បដិប្បស្សម្ភតិ. សុខន្តិ កាយិកចេតសិកសុខំ. សមាធិយតីតិ អារម្មណេ សម្មា ឋបិតំ ហោតិ. វិសមគតាយ បជាយាតិ រាគទោសមោហវិសមគតេសុ សត្តេសុ. សមប្បត្តោតិ សមំ ឧបសមំ បត្តោ ហុត្វា. សព្យាបជ្ឈាយាតិ សទុក្ខាយ. ធម្មសោតំ សមាបន្នោតិ វិបស្សនាសង្ខាតំ ធម្មសោតំ សមាបន្នោ. ពុទ្ធានុស្សតិំ ភាវេតីតិ ពុទ្ធានុស្សតិកម្មដ្ឋានំ ព្រូហេតិ វឌ្ឍេតិ. ឥមិនា នយេន សព្ពត្ថ អត្ថោ វេទិតព្ពោ. ឥតិ មហានាមោ សោតាបន្នស្ស និស្សយវិហារំ បុច្ឆិ. សត្ថាបិស្ស តមេវ កថេសិ. ឯវំ ឥមស្មិំ សុត្តេ សោតាបន្នោវ កថិតោតិ.

អាហុនេយ្យវគ្គោ បឋមោ.