១. បឋមអាហុនេយ្យសុត្តវណ្ណនា

១. ឆក្កនិបាតស្ស បឋមេ ឥធ, ភិក្ខវេ, ភិក្ខូតិ, ភិក្ខវេ, ឥមស្មិំ សាសនេ ភិក្ខុ. នេវ សុមនោ ហោតិ ន ទុម្មនោតិ ឥដ្ឋារម្មណេ រាគសហគតេន សោមនស្សេន សុមនោ វា អនិដ្ឋារម្មណេ ទោសសហគតេន ទោមនស្សេន ទុម្មនោ វា ន ហោតិ. ឧបេក្ខកោ វិហរតិ សតោ សម្បជានោតិ មជ្ឈត្តារម្មណេ អសមបេក្ខនេន អញ្ញាណុបេក្ខាយ ឧបេក្ខកភាវំ អនាបជ្ជិត្វា សតោ សម្បជានោ ហុត្វា អារម្មណេ មជ្ឈត្តោ វិហរតិ. ឥមស្មិំ សុត្តេ ខីណាសវស្ស សតតវិហារោ កថិតោ.