៧. វស្សសុត្តវណ្ណនា

១៩៧. សត្តមេ នេមិត្តាតិ និមិត្តបាឋកា. តេជោធាតុ បកុប្បតីតិ មហាអគ្គិក្ខន្ធោ ឧប្បជ្ជតិ. បាណិនា ឧទកំ សម្បដិច្ឆិត្វាតិ ឧប្បន្នំ ឧតុសមុដ្ឋានំ ឧទកំ តិយោជនសតេន ហត្ថេន បដិគ្គហេត្វា. បមត្តា ហោន្តីតិ អត្តនោ កីឡាយ បមត្តា ហោន្តិ វិប្បវុដ្ឋសតិនោ. តេសញ្ហិ សកាយ រតិយា ‘‘រមាមា’’តិ ចិត្តេ ឧប្បន្នេ អកាលេបិ ទេវោ វស្សតិ, តទភាវេ ន វស្សតិ. តំ សន្ធាយេតំ វុត្តំ – ‘‘ន កាលវស្ស’’ន្តិ. អដ្ឋមនវមានិ ឧត្តានត្ថានេវ.