៧. ចោទនាសុត្តវណ្ណនា

១៦៧. សត្តមេ ចោទកេនាតិ វត្ថុសន្ទស្សនា អាបត្តិសន្ទស្សនា សំវាសប្បដិក្ខេបោ សាមីចិប្បដិក្ខេបោតិ ចតូហិ ចោទនាវត្ថូហិ ចោទយមានេន. កាលេន វក្ខាមិ នោ អកាលេនាតិ ឯត្ថ ចុទិតកស្ស កាលោ កថិតោ, ន ចោទកស្ស. បរំ ចោទេន្តេន ហិ បរិសមជ្ឈេ វា ឧបោសថបវារណគ្គេ វា អាសនសាលាភោជនសាលាទីសុ វា ន ចោទេតព្ពោ, ទិវាដ្ឋានេ និសិន្នកាលេ ‘‘ករោតាយស្មា ឱកាសំ, អហំ អាយស្មន្តំ វត្តុកាមោ’’តិ ឯវំ ឱកាសំ ការេត្វា ចោទេតព្ពោ. បុគ្គលំ បន ឧបបរិក្ខិត្វា យោ លោលបុគ្គលោ អភូតំ វត្វា ភិក្ខូនំ អយសំ អារោបេតិ, សោ ឱកាសកម្មំ វិនាបិ ចោទេតព្ពោ. ភូតេនាតិ តច្ឆេន សភាវេន. សណ្ហេនាតិ មដ្ឋេន មុទុកេន. អត្ថសំហិតេនាតិ អត្ថកាមតាយ ហិតកាមតាយ ឧបេតេន. អវិប្បដិសារោ ឧបទហាតព្ពោតិ អមង្កុភាវោ ឧបនេតព្ពោ. អលំ តេ អវិប្បដិសារាយាតិ យុត្តំ តេ អមង្កុភាវាយ. សេសមេត្ថ ឧត្តានមេវាតិ. អដ្ឋមំ ហេដ្ឋា វុត្តនយត្តា បាកដមេវ.