២. អារភតិសុត្តវណ្ណនា

១៤២. ទុតិយេ អារភតិ ច វិប្បដិសារី ច ហោតីតិ អាបត្តិវីតិក្កមនវសេន អារភតិ ចេវ, តប្បច្ចយា ច វិប្បដិសារី ហោតិ. ចេតោវិមុត្តិំ បញ្ញាវិមុត្តិន្តិ អរហត្តសមាធិញ្ចេវ អរហត្តផលញាណញ្ច. នប្បជានាតីតិ អនធិគតត្តា ន ជានាតិ. អារភតិ ន វិប្បដិសារី ហោតីតិ អាបត្តិំ អាបជ្ជតិ, វុដ្ឋិតត្តា បន ន វិប្បដិសារី ហោតិ. នារភតិ វិប្បដិសារី ហោតីតិ សកិំ អាបត្តិំ អាបជ្ជិត្វា តតោ វុដ្ឋាយ បច្ឆា កិញ្ចាបិ នាបជ្ជតិ, វិប្បដិសារំ បន វិនោទេតុំ ន សក្កោតិ. នារភតិ ន វិប្បដិសារី ហោតីតិ ន ចេវ អាបត្តិំ អាបជ្ជតិ, ន ច វិប្បដិសារី ហោតិ. តញ្ច ចេតោវិមុត្តិំ…បេ… និរុជ្ឈន្តីតិ អរហត្តំ បន អប្បត្តោ ហោតិ. បញ្ចមនយេន ខីណាសវោ កថិតោ.

អារម្ភជាតិ អាបត្តិវីតិក្កមសម្ភវា. វិប្បដិសារជាតិ វិប្បដិសារតោ ជាតា. បវឌ្ឍន្តីតិ បុនប្បុនំ ឧប្បជ្ជនេន វឌ្ឍន្តិ. អារម្ភជេ អាសវេ បហាយាតិ វីតិក្កមសម្ភវេ អាសវេ អាបត្តិទេសនាយ វា អាបត្តិវុដ្ឋានេន វា បជហិត្វា. បដិវិនោទេត្វាតិ សុទ្ធន្តេ ឋិតភាវបច្ចវេក្ខណេន នីហរិត្វា. ចិត្តំ បញ្ញញ្ច ភាវេតូតិ វិបស្សនាចិត្តញ្ច តំសម្បយុត្តំ បញ្ញញ្ច ភាវេតុ. សេសំ ឥមិនា ឧបាយេនេវ វេទិតព្ពន្តិ.