៦. កាលទានសុត្តវណ្ណនា

៣៦. ឆដ្ឋេ កាលទានានីតិ យុត្តទានានិ, បត្តទានានិ អនុច្ឆវិកទានានីតិ អត្ថោ. នវសស្សានីតិ អគ្គសស្សានិ. នវផលានីតិ អារាមតោ បឋមុប្បន្នានិ អគ្គផលានិ. បឋមំ សីលវន្តេសុ បតិដ្ឋាបេតីតិ បឋមំ សីលវន្តានំ ទត្វា បច្ឆា អត្តនា បរិភុញ្ជតិ. វទញ្ញូតិ ភាសិតញ្ញូ. កាលេន ទិន្នន្តិ យុត្តប្បត្តកាលេន ទិន្នំ. អនុមោទន្តីតិ ឯកមន្តេ ឋិតា អនុមោទន្តិ. វេយ្យាវច្ចន្តិ កាយេន វេយ្យាវដិកកម្មំ ករោន្តិ. អប្បដិវានចិត្តោតិ អនុក្កណ្ឋិតចិត្តោ. យត្ថ ទិន្នំ មហប្ផលន្តិ យស្មិំ ឋានេ ទិន្នំ មហប្ផលំ ហោតិ, តត្ថ ទទេយ្យ.