៤. សីហសេនាបតិសុត្តវណ្ណនា

៣៤. ចតុត្ថេ សន្ទិដ្ឋិកន្តិ សាមំ បស្សិតព្ពកំ. ទាយកោតិ ទានសូរោ. ន សោ សទ្ធាមត្តកេនេវ តិដ្ឋតិ, បរិច្ចជិតុម្បិ សក្កោតីតិ អត្ថោ. ទានបតីតិ យំ ទានំ ទេតិ, តស្ស បតិ ហុត្វា ទេតិ, ន ទាសោ, ន សហាយោ. យោ ហិ អត្តនា មធុរំ ភុញ្ជតិ, បរេសំ អមធុរំ ទេតិ, សោ ទានសង្ខាតស្ស ទេយ្យធម្មស្ស ទាសោ ហុត្វា ទេតិ. យោ យំ អត្តនា ភុញ្ជតិ, តទេវ ទេតិ, សោ សហាយោ ហុត្វា ទេតិ. យោ បន អត្តនា យេន កេនចិ យាបេតិ, បរេសំ មធុរំ ទេតិ, សោ បតិ ជេដ្ឋកោ សាមី ហុត្វា ទេតិ. តាទិសំ សន្ធាយ វុត្តំ – ‘‘ទានបតី’’តិ.

អមង្កុភូតោតិ ន និត្តេជភូតោ. វិសារទោតិ ញាណសោមនស្សប្បត្តោ. សហព្យតំ គតាតិ សហភាវំ ឯកីភាវំ គតា. កតាវកាសាតិ យេន កម្មេន តត្ថ អវកាសោ ហោតិ, តស្ស កតត្តា កតាវកាសា. តំ បន យស្មា កុសលមេវ ហោតិ, តស្មា កតកុសលាតិ វុត្តំ. មោទរេតិ មោទន្តិ បមោទន្តិ. អសិតស្សាតិ អនិស្សិតស្ស តថាគតស្ស. តាទិនោតិ តាទិលក្ខណំ បត្តស្ស.