២. ចុន្ទីសុត្តវណ្ណនា

៣២. ទុតិយេ បញ្ចហិ រថសតេហីតិ ភុត្តបាតរាសា បិតុ សន្តិកំ បេសេត្វា បញ្ច រថសតានិ យោជាបេត្វា តេហិ បរិវុតាតិ អត្ថោ. ឧបសង្កមីតិ ភាតរា សទ្ធិំ បវត្តិតំ បញ្ហសាកច្ឆំ បុច្ឆិស្សាមីតិ គន្ធមាលចុណ្ណាទីនិ អាទាយ ឧបសង្កមិ. យទេវ សោ ហោតីតិ យទា ឯវ សោ ហោតិ. អថ វា យោ ឯវ សោ ហោតិ. អរិយកន្តានិ សីលានីតិ មគ្គផលសម្បយុត្តានិ សីលានិ. តានិ ហិ អរិយានំ កន្តានិ ហោន្តិ, ភវន្តរេបិ ន បរិច្ចជន្តិ. សេសំ ចតុក្កនិបាតេ អគ្គប្បសាទសុត្តេ វុត្តនយេនេវ វេទិតព្ពំ.