៩. ចង្កមសុត្តវណ្ណនា

២៩. នវមេ អទ្ធានក្ខមោ ហោតីតិ ទូរំ អទ្ធានមគ្គំ គច្ឆន្តោ ខមតិ, អធិវាសេតុំ សក្កោតិ. បធានក្ខមោតិ វីរិយក្ខមោ. ចង្កមាធិគតោ សមាធីតិ ចង្កមំ អធិដ្ឋហន្តេន អធិគតោ អដ្ឋន្នំ សមាបត្តីនំ អញ្ញតរសមាធិ. ចិរដ្ឋិតិកោ ហោតីតិ ចិរំ តិដ្ឋតិ. ឋិតកេន គហិតនិមិត្តញ្ហិ និសិន្នស្ស នស្សតិ, និសិន្នេន គហិតនិមិត្តំ និបន្នស្ស. ចង្កមំ អធិដ្ឋហន្តេន ចលិតារម្មណេ គហិតនិមិត្តំ បន ឋិតស្សបិ និសិន្នស្សបិ និបន្នស្សបិ ន នស្សតីតិ.