៥. អនុគ្គហិតសុត្តវណ្ណនា

២៥. បញ្ចមេ សម្មាទិដ្ឋីតិ វិបស្សនាសម្មាទិដ្ឋិ. ចេតោវិមុត្តិផលាតិអាទីសុ ចេតោវិមុត្តីតិ មគ្គផលសមាធិ. បញ្ញាវិមុត្តីតិ ផលញាណំ. សីលានុគ្គហិតាតិ សីលេន អនុគ្គហិតា អនុរក្ខិតា. សុតានុគ្គហិតាតិ ពាហុសច្ចេន អនុគ្គហិតា. សាកច្ឆានុគ្គហិតាតិ ធម្មសាកច្ឆាយ អនុគ្គហិតា. សមថានុគ្គហិតាតិ ចិត្តេកគ្គតាយ អនុគ្គហិតា.

ឥមស្ស បនត្ថស្ស អាវិភាវត្ថំ មធុរម្ពពីជំ រោបេត្វា សមន្តា មរិយាទំ ពន្ធិត្វា កាលានុកាលំ ឧទកំ អាសិញ្ចិត្វា កាលានុកាលំ មូលានិ សោធេត្វា កាលានុកាលំ បតិតបាណកេ ហារេត្វា កាលានុកាលំ មក្កដជាលំ លុញ្ចិត្វា អម្ពំ បដិជគ្គន្តោ បុរិសោ ទស្សេតព្ពោ. តស្ស ហិ បុរិសស្ស មធុរម្ពពីជរោបនំ វិយ វិបស្សនាសម្មាទិដ្ឋិ ទដ្ឋព្ពា, មរិយាទពន្ធនំ វិយ សីលេន អនុគ្គណ្ហនំ, ឧទកាសេចនំ វិយ សុតេន អនុគ្គណ្ហនំ, មូលបរិសោធនំ វិយ សាកច្ឆាយ អនុគ្គណ្ហនំ, បាណកហរណំ វិយ ឈានវិបស្សនាបារិបន្ថិកសោធនវសេន សមថានុគ្គណ្ហនំ, មក្កដជាលលុញ្ចនំ វិយ ពលវវិបស្សនានុគ្គណ្ហនំ, ឯវំ អនុគ្គហិតស្ស រុក្ខស្ស ខិប្បមេវ វឌ្ឍិត្វា ផលប្បទានំ វិយ ឥមេហិ សីលាទីហិ អនុគ្គហិតាយ មូលសម្មាទិដ្ឋិយា ខិប្បមេវ មគ្គវសេន វឌ្ឍិត្វា ចេតោវិមុត្តិបញ្ញាវិមុត្តិផលប្បទានំ វេទិតព្ពំ.