៦. ឧម្មគ្គសុត្តវណ្ណនា

១៨៦. ឆដ្ឋេ បរិកស្សតីតិ អាកឌ្ឍិយតិ. ឧម្មគ្គោតិ ឧម្មុជ្ជនំ, បញ្ញាគមនន្តិ អត្ថោ. បញ្ញា ឯវ វា ឧម្មុជ្ជនដ្ឋេន ឧម្មគ្គោតិ វុច្ចតិ. សាវ បដិភានដ្ឋេន បដិភានំ. ចិត្តស្ស ឧប្បន្នស្ស វសំ គច្ឆតីតិ យេ ចិត្តស្ស វសំ គច្ឆន្តិ, តេសំយេវេត្ថ គហណំ វេទិតព្ពំ. អត្ថមញ្ញាយ ធម្មមញ្ញាយាតិ អត្ថញ្ច បាឡិញ្ច ជានិត្វា. ធម្មានុធម្មប្បដិបន្នោ ហោតីតិ លោកុត្តរធម្មស្ស អនុច្ឆវិកធម្មំ សហ សីលេន បុព្ពភាគប្បដិបទំ បដិបន្នោ ហោតិ. និព្ពេធិកបញ្ញោតិ និព្ពិជ្ឈនកបញ្ញោ. ឥទំ ទុក្ខន្តិ ឋបេត្វា តណ្ហំ សេសំ តេភូមកក្ខន្ធបញ្ចកំ ទុក្ខន្តិ សុតំ ហោតិ. បញ្ញាយាតិ មគ្គបញ្ញាយ. អយំ ទុក្ខសមុទយោតិ វដ្ដមូលកតណ្ហា តស្ស ទុក្ខស្ស សមុទយោតិ សុតំ ហោតិ. ឥមិនា ឧបាយេន សេសទ្វយេបិ អត្ថោ វេទិតព្ពោ. ចតុត្ថបញ្ហវិស្សជ្ជនេន អរហត្តផលំ កថិតន្តិ វេទិតព្ពំ.