៦. កប្បសុត្តវណ្ណនា

១៥៦. ឆដ្ឋេ សំវដ្ដតីតិ ឯត្ថ តយោ សំវដ្ដា អាបោសំវដ្ដោ, តេជោសំវដ្ដោ, វាយោសំវដ្ដោតិ. តិស្សោ សំវដ្ដសីមា អាភស្សរា, សុភកិណ្ហា, វេហប្ផលាតិ. យទា កប្បោ តេជេន សំវដ្ដតិ, អាភស្សរតោ ហេដ្ឋា អគ្គិនា ឌយ្ហតិ. យទា អាបេន សំវដ្ដតិ, សុភកិណ្ហតោ ហេដ្ឋា ឧទកេន វិលីយតិ. យទា វាតេន សំវដ្ដតិ, វេហប្ផលតោ ហេដ្ឋា វាតេន វិទ្ធំសតិ. វិត្ថារតោ បន សទាបិ ឯកំ ពុទ្ធក្ខេត្តំ វិនស្សតិ. អយមេត្ថ សង្ខេបោ, វិត្ថារកថា បន វិសុទ្ធិមគ្គេ (វិសុទ្ធិ. ២.៤០៣-៤០៤ អាទយោ) វុត្តនយេនេវ វេទិតព្ពា.