៦-៧. សីលសុត្តាទិវណ្ណនា

១៣៦-១៣៧. ឆដ្ឋេ បឋមោ លោកិយមហាជនោ, ទុតិយោ សុក្ខវិបស្សកោ សោតាបន្នោ ច សកទាគាមី ច, តតិយោ អនាគាមី. សោ ហិ យស្មា តង្ខណិកម្បិ ឧបបត្តិនិមិត្តកំ ឈានំ បដិលភតិយេវ, តស្មា សុក្ខវិបស្សកោបិ សមាធិស្មិំ បរិបូរការីយេវ. ចតុត្ថោ ខីណាសវោយេវ. សោ ហិ សព្ពេសំ សីលាទិបច្ចនីកានំ បហីនត្តា សព្ពត្ថ បរិបូរការី នាម. សត្តមេបិ ឆដ្ឋេ វុត្តនយេនេវ បុគ្គលបរិច្ឆេទោ វេទិតព្ពោ.