៤. ឧដ្ឋានផលសុត្តវណ្ណនា

១៣៤. ចតុត្ថេ ឧដ្ឋានវីរិយេនេវ ទិវសំ វីតិនាមេត្វា តស្ស និស្សន្ទផលមត្តំ កិញ្ចិទេវ លភិត្វា ជីវិកំ កប្បេតិ, តំ បន ឧដ្ឋានំ អាគម្ម កិញ្ចិ បុញ្ញផលំ នប្បដិលភតិ, អយំ ឧដ្ឋានផលូបជីវី ន កម្មផលូបជីវី នាម. ចាតុមហារាជិកេ បន ទេវេ អាទិំ កត្វា សព្ពេបិ ទេវា ឧដ្ឋានវីរិយេន វិនា បុញ្ញផលស្សេវ ឧបជីវនតោ កម្មផលូបជីវិនោ ន ឧដ្ឋានផលូបជីវិនោ នាម. រាជរាជមហាមត្តាទយោ ឧដ្ឋានផលូបជីវិនោ ច កម្មផលូបជីវិនោ ច. នេរយិកសត្តា នេវ ឧដ្ឋានផលូបជីវិនោ ន កម្មផលូបជីវិនោ. ឥមស្មិំ សុត្តេ បុញ្ញផលមេវ កម្មផលន្តិ អធិប្បេតំ, តញ្ច តេសំ នត្ថិ.