៤. ទុតិយនានាករណសុត្តវណ្ណនា

១២៤. ចតុត្ថេ រូបមេវ រូបគតំ. សេសបទេសុបិ ឯសេវ នយោ. អនិច្ចតោតិអាទីសុ ហុត្វា អភាវដ្ឋេន អនិច្ចតោ, អាពាធដ្ឋេន រោគតោ, អន្តោ បទុស្សនដ្ឋេន គណ្ឌតោ, អនុបវិដ្ឋដ្ឋេន សល្លតោ, សទុក្ខដ្ឋេន អឃតោ, សម្បីឡនដ្ឋេន អាពាធតោ, អវិធេយ្យដ្ឋេន បរតោ, បលុជ្ជនដ្ឋេន បលោកតោ, និស្សត្តដ្ឋេន សុញ្ញតោ, អវសវត្តនដ្ឋេន អនត្តតោ. ឯត្ថ ច ‘‘អនិច្ចតោ បលោកតោ’’តិ ទ្វីហិ បទេហិ អនិច្ចលក្ខណំ កថិតំ, ‘‘សុញ្ញតោ អនត្តតោ’’តិ ទ្វីហិ អនត្តលក្ខណំ, សេសេហិ ទុក្ខលក្ខណំ កថិតន្តិ វេទិតព្ពំ. សមនុបស្សតីតិ ញាណេន បស្សតិ. ឯវំ បញ្ចក្ខន្ធេ តិលក្ខណំ អារោបេត្វា បស្សន្តោ តយោ មគ្គេ តីណិ ផលានិ សច្ឆិករោតិ. សុទ្ធាវាសានំ ទេវានំ សហព្យតំ ឧបបជ្ជតីតិ តត្ថ ឋិតោ ចតុត្ថជ្ឈានំ ភាវេត្វា ឧបបជ្ជតិ.