៥. ឋានសុត្តវណ្ណនា

១១៥. បញ្ចមេ ឋានានីតិ ការណានិ. អនត្ថាយ សំវត្តតីតិ អហិតាយ អវឌ្ឍិយា សំវត្តតិ. ឯត្ថ ច បឋមំ ឱបាតក្ខណនមច្ឆពន្ធនសន្ធិច្ឆេទនាទិភេទំ សទុក្ខំ សវិឃាតំ បាបកម្មំ វេទិតព្ពំ, ទុតិយំ សមជីវិកានំ គិហីនំ បុប្ផច្ឆឌ្ឌកាទិកម្មំ សុធាកោដ្ដន-គេហច្ឆាទនអសុចិដ្ឋានសម្មជ្ជនាទិកម្មញ្ច វេទិតព្ពំ, តតិយំ សុរាបានគន្ធវិលេបនមាលាបិឡន្ធនាទិកម្មញ្ចេវ អស្សាទវសេន បវត្តំ បាណាតិបាតាទិកម្មញ្ច វេទិតព្ពំ, ចតុត្ថំ ធម្មស្សវនត្ថាយ គមនកាលេ សុទ្ធវត្ថច្ឆាទន-មាលាគន្ធាទីនំ អាទាយ គមនំ ចេតិយវន្ទនំ ពោធិវន្ទនំ មធុរធម្មកថាសវនំ បញ្ចសីលសមាទានន្តិ ឯវមាទីសុ សោមនស្សសម្បយុត្តំ កុសលកម្មំ វេទិតព្ពំ. បុរិសថាមេតិ បុរិសស្ស ញាណថាមស្មិំ. សេសទ្វយេបិ ឯសេវ នយោ.