៣. បតោទសុត្តវណ្ណនា

១១៣. តតិយេ បតោទច្ឆាយន្តិ វិជ្ឈនត្ថំ ឧក្ខិត្តស្ស បតោទស្ស ឆាយំ. សំវិជ្ជតីតិ ‘‘ជវោ មេ គហេតព្ពោ’’តិ សល្លក្ខណវសេន សំវិជ្ជតិ. សំវេគំ អាបជ្ជតីតិ សំវេគំ បដិបជ្ជតិ លោមវេធវិទ្ធោតិ លោមកូបេ បតោទវេធេន វិទ្ធមត្តោ. ចម្មវេធវិទ្ធោតិ ឆវិចម្មំ ឆិន្ទន្តេន បតោទវេធេន វិទ្ធោ. អដ្ឋិវេធវិទ្ធោតិ អដ្ឋិំ ភិន្ទន្តេន វេធេន វិទ្ធោ. កាយេនាតិ នាមកាយេន. បរមសច្ចន្តិ និព្ពានំ. សច្ឆិករោតីតិ បស្សតិ. បញ្ញាយាតិ សហវិបស្សនាយ មគ្គបញ្ញាយ.