១. កេសិសុត្តវណ្ណនា

១១១. ទុតិយស្ស បឋមេ កេសីតិ តស្ស នាមំ. អស្សទម្មេ សារេតីតិ អស្សទម្មសារថិ. សណ្ហេនបិ វិនេតីតិអាទីសុ តស្ស អនុច្ឆវិកំ សក្ការំ កត្វា សុភោជនំ ភោជេត្វា មធុរបានំ បាយេត្វា មុទុវចនេន សមុទាចរិត្វា ទមេន្តោ សណ្ហេន ទមេតិ នាម, ជាណុពន្ធនមុខពន្ធនាទីហិ ចេវ បតោទវិជ្ឈនកសាភិឃាតផរុសវចនេហិ ច ទមេន្តោ ផរុសេន ទមេតិ នាម, កាលេន កាលំ តទុភយំ ករោន្តោ សណ្ហផរុសេន ទមេតិ នាម.