៨. ទេវទត្តសុត្តវណ្ណនា

៦៨. អដ្ឋមេ អចិរបក្កន្តេ ទេវទត្តេតិ សង្ឃំ ភិន្ទិត្វា នចិរបក្កន្តេ. បរាភវាយាតិ អវឌ្ឍិយា វិនាសាយ. អស្សតរីតិ វឡវាយ កុច្ឆិស្មិំ គទ្រភស្ស ជាតា. អត្តវធាយ គព្ភំ គណ្ហាតីតិ តំ អស្សេន សទ្ធិំ សម្បយោជេន្តិ, សា គព្ភំ គណ្ហិត្វា កាលេ សម្បត្តេ វិជាយិតុំ នសក្កោន្តី បាទេហិ ភូមិំ បហរន្តី តិដ្ឋតិ. អថស្សា ចត្តារោ បាទេ ចតូសុ ខាណូសុ ពន្ធិត្វា កុច្ឆិំ ផាលេត្វា បោតកំ នីហរន្តិ. សា តត្ថេវ មរតិ. តេនេតំ វុត្តំ.