២. អានណ្យសុត្តវណ្ណនា

៦២. ទុតិយេ អធិគមនីយានីតិ បត្តព្ពានិ. កាមភោគិនាតិ វត្ថុកាមេ ច កិលេសកាមេ ច បរិភុញ្ជន្តេន. អត្ថិសុខាទីសុ អត្ថីតិ ឧប្បជ្ជនកសុខំ អត្ថិសុខំ នាម. ភោគេ បរិភុញ្ជន្តស្ស ឧប្បជ្ជនកសុខំ ភោគសុខំ នាម. អនណោស្មីតិ ឧប្បជ្ជនកសុខំ អានណ្យសុខំ នាម. និទ្ទោសោ អនវជ្ជោស្មីតិ ឧប្បជ្ជនកសុខំ អនវជ្ជសុខំ នាម.

ភុញ្ជន្តិ ភុញ្ជមានោ. បញ្ញា វិបស្សតីតិ បញ្ញាយ វិបស្សតិ. ឧភោ ភាគេតិ ទ្វេ កោដ្ឋាសេ, ហេដ្ឋិមានិ តីណិ ឯកំ កោដ្ឋាសំ, អនវជ្ជសុខំ ឯកំ កោដ្ឋាសន្តិ ឯវំ បញ្ញាយ បស្សមានោ ទ្វេ កោដ្ឋាសេ ជានាតីតិ អត្ថោ. អនវជ្ជសុខស្សេតន្តិ ឯតំ តិវិធម្បិ សុខំ អនវជ្ជសុខស្ស សោឡសិំ កលំ នាគ្ឃតីតិ.