១. ចក្កសុត្តវណ្ណនា

៣១. ចតុត្ថស្ស បឋមេ ចក្កានីតិ សម្បត្តិយោ. ចតុចក្កំ វត្តតីតិ ចត្តារិ សម្បត្តិចក្កានិ វត្តន្តិ ឃដិយន្តិយេវាតិ អត្ថោ. បតិរូបទេសវាសោតិ យត្ថ ចតស្សោ បរិសា សន្ទិស្សន្តិ, ឯវរូបេ អនុច្ឆវិកេ ទេសេ វាសោ. សប្បុរិសាវស្សយោតិ ពុទ្ធាទីនំ សប្បុរិសានំ អវស្សយនំ សេវនំ ភជនំ, ន រាជានំ. អត្តសម្មាបណិធីតិ អត្តនោ សម្មា ឋបនំ, សចេ បុព្ពេ អស្សទ្ធាទីហិ សមន្នាគតោ ហោតិ, តានិ បហាយ សទ្ធាទីសុ បតិដ្ឋាបនំ. បុព្ពេ ច កតបុញ្ញតាតិ បុព្ពេ ឧបចិតកុសលតា. ឥទមេវ ចេត្ថ បមាណំ. យេន ហិ ញាណសម្បយុត្តចិត្តេន កុសលកម្មំ កតំ ហោតិ, តទេវ កុសលំ តំ បុរិសំ បតិរូបទេសេ ឧបនេតិ, សប្បុរិសេ ភជាបេតិ, សោ ឯវ ច បុគ្គលោ អត្តានំ សម្មា ឋបេតិ. បុញ្ញកតោតិ កតបុញ្ញោ. សុខញ្ចេតំធិវត្តតីតិ សុខញ្ច ឯតំ បុគ្គលំ អធិវត្តតិ, អវត្ថរតីតិ អត្ថោ.