៩. ករជកាយសុត្តវណ្ណនា

២១៩. នវមេ ទុក្ខស្សាតិ វិបាកទុក្ខស្ស, វដ្ដទុក្ខស្សេវ វា. ឥមស្មិំ សុត្តេ មណិឱបម្មំ នត្ថិ. ឯវំ វិគតាភិជ្ឈោតិ ឯវន្តិ និបាតមត្តំ. យថា វា មេត្តំ ភាវេន្តា វិគតាភិជ្ឈា ភវន្តិ, ឯវំ វិគតាភិជ្ឈោ. ឯវមស្ស វិគតាភិជ្ឈតាទីហិ នីវរណវិក្ខម្ភនំ ទស្សេត្វា ឥទានិ អកុសលនិស្សរណានិ កថេន្តោ មេត្តាសហគតេនាតិអាទិមាហ. អប្បមាណន្តិ អប្បមាណសត្តារម្មណតាយ ចិណ្ណវសិតាយ វា អប្បមាណំ. បមាណកតំ កម្មំ នាម កាមាវចរកម្មំ. ន តំ តត្រាវតិដ្ឋតីតិ តំ មហោឃោ បរិត្តំ ឧទកំ វិយ អត្តនោ ឱកាសំ គហេត្វា ឋាតុំ ន សក្កោតិ, អថ ខោ នំ ឱឃេ បរិត្តំ ឧទកំ វិយ ឥទមេវ អប្បមាណំ កម្មំ អជ្ឈោត្ថរិត្វា អត្តនោ វិបាកំ និព្ពត្តេតិ. ទហរតគ្គេតិ ទហរកាលតោ បដ្ឋាយ.

នាយំ កាយោ អាទាយគមនិយោតិ ឥមំ កាយំ គហេត្វា បរលោកំ គន្តុំ នាម ន សក្កាតិ អត្ថោ. ចិត្តន្តរោតិ ចិត្តការណោ, អថ វា ចិត្តេនេវ អន្តរិកោ. ឯកស្សេវ ហិ ចុតិចិត្តស្ស អនន្តរា ទុតិយេ បដិសន្ធិចិត្តេ ទេវោ នាម ហោតិ, នេរយិកោ នាម ហោតិ, តិរច្ឆានគតោ នាម ហោតិ. បុរិមនយេបិ ចិត្តេន ការណភូតេន ទេវោ នេរយិកោ វា ហោតីតិ អត្ថោ. សព្ពំ តំ ឥធ វេទនីយន្តិ ទិដ្ឋធម្មវេទនីយកោដ្ឋាសវនេតំ វុត្តំ. ន តំ អនុគំ ភវិស្សតីតិ មេត្តាយ ឧបបជ្ជវេទនីយភាវស្ស ឧបច្ឆិន្នត្តា ឧបបជ្ជវេទនីយវសេន ន អនុគតំ ភវិស្សតិ. ឥទំ សោតាបន្នសកទាគាមិអរិយបុគ្គលានំ បច្ចវេក្ខណំ វេទិតព្ពំ. អនាគាមិតាយាតិ ឈានានាគាមិតាយ. ឥធបញ្ញស្សាតិ ឥមស្មិំ សាសនេ បញ្ញា ឥធបញ្ញា នាម, សាសនចរិតាយ អរិយបញ្ញាយ ឋិតស្ស អរិយសាវកស្សាតិ អត្ថោ. ឧត្តរិវិមុត្តិន្តិ អរហត្តំ. ទសមំ ឧត្តានត្ថមេវាតិ.

ករជកាយវគ្គោ បឋមោ.

(២២) ២. សាមញ្ញវគ្គវណ្ណនា

២២១. ទុតិយស្ស បឋមំ អាទិំ កត្វា សព្ពា បេយ្យាលតន្តិ ឧត្តានត្ថាយេវាតិ.

មនោរថបូរណិយា អង្គុត្តរនិកាយ-អដ្ឋកថាយ

ទសកនិបាតស្ស សំវណ្ណនា និដ្ឋិតា.