៦. សំសប្បនីយសុត្តវណ្ណនា

២១៦. ឆដ្ឋេ សំសប្បនីយបរិយាយំ វោ, ភិក្ខវេ, ធម្មបរិយាយន្តិ សំសប្បនស្ស ការណំ ទេសនាសង្ខាតំ ធម្មទេសនំ. សំសប្បតីតិ តំ កម្មំ ករោន្តោ អាសប្បតិ បរិសប្បតិ វិប្ផន្ទតិ. ជិម្ហា គតីតិ តេន កម្មេន យំ គតិំ គមិស្សតិ, សា ជិម្ហា ហោតិ. ជិម្ហុបបត្តីតិ តស្ស យំ គតិំ ឧបបជ្ជិស្សតិ, សាបិ ជិម្ហាវ ហោតិ. សំសប្បជាតិកាតិ សំសប្បនសភាវា. ភូតា ភូតស្ស ឧបបត្តិ ហោតីតិ ភូតស្មា សភាវតោ វិជ្ជមានកម្មា សត្តស្ស និព្ពត្តិ ហោតិ. ផស្សា ផុសន្តីតិ វិបាកផស្សា ផុសន្តិ.