៥-៦. សង្គារវសុត្តាទិវណ្ណនា

១១៧-១១៨. បញ្ចមេ ឱរិមំ តីរន្តិ លោកិយំ ឱរិមតីរំ. បារិមំ តីរន្តិ លោកុត្តរំ បារិមតីរំ. បារគាមិនោតិ និព្ពានគាមិនោ. តីរមេវានុធាវតីតិ សក្កាយទិដ្ឋិតីរំយេវ អនុធាវតិ. ធម្មេ ធម្មានុវត្តិនោតិ សម្មា អក្ខាតេ នវវិធេ លោកុត្តរធម្មេ អនុធម្មវត្តិនោ, តស្ស ធម្មស្សានុច្ឆវិកាយ សហសីលាយ បុព្ពភាគបដិបត្តិយា បវត្តមានា. មច្ចុធេយ្យំ សុទុត្តរន្តិ មច្ចុនោ ឋានភូតំ តេភូមកវដ្ដំ សុទុត្តរំ តរិត្វា. បារមេស្សន្តីតិ និព្ពានំ បាបុណិស្សន្តិ.

ឱកា អនោកមាគម្មាតិ វដ្ដតោ វិវដ្ដំ អាគម្ម. វិវេកេ យត្ថ ទូរមន្តិ យស្មិំ កាយចិត្តឧបធិវិវេកេ ទុរភិរមំ, តត្រាភិរតិមិច្ឆេយ្យ. ហិត្វា កាមេតិ ទុវិធេបិ កាមេ បហាយ. អកិញ្ចនោតិ និប្បលិពោធោ. អាទានបដិនិស្សគេតិ គហណបដិនិស្សគ្គសង្ខាតេ និព្ពានេ. អនុបាទាយ យេ រតាតិ ចតូហិ ឧបាទានេហិ កិញ្ចិបិ អនុបាទិយិត្វា យេ អភិរតា. បរិនិព្ពុតាតិ តេ អបច្ចយបរិនិព្ពានេន បរិនិព្ពុតា នាមាតិ វេទិតព្ពា. ឆដ្ឋំ ភិក្ខូនំ ទេសិតំ.