៤. វជ្ជិយមាហិតសុត្តវណ្ណនា

៩៤. ចតុត្ថេ វជ្ជិយមាហិតោតិ ឯវំនាមកោ. សព្ពំ តបន្តិ សព្ពមេវ ទុក្ករការិកំ. សព្ពំ តបស្សិន្តិ សព្ពំ តបនិស្សិតកំ. លូខាជីវិន្តិ ទុក្ករការិកជីវិកានុយោគំ អនុយុត្តំ. គារយ្ហន្តិ គរហិតព្ពយុត្តកំ. បសំសិយន្តិ បសំសិតព្ពយុត្តកំ. វេនយិកោតិ សយំ អវិនីតោ អញ្ញេហិ វិនេតព្ពោ. អបញ្ញត្តិកោតិ ន កិញ្ចិ បញ្ញាបេតុំ សក្កោតិ. អថ វា វេនយិកោតិ សត្តវិនាសកោ. អបញ្ញត្តិកោតិ អបច្ចក្ខំ និព្ពានំ បញ្ញាបេតិ, សយំកតាទីសុ កិញ្ចិ បញ្ញាបេតុំ ន សក្កោតិ. ន សោ ភគវា វេនយិកោតិ សោ ភគវា ឯវំ យាថាវតោ ញត្វា កុសលាកុសលំ បញ្ញាបេន្តោ ន អញ្ញេន វិនេតព្ពោ ន អញ្ញសិក្ខិតោ. យេ ច ធម្មេ ឧបាទាយ សត្តោ បញ្ញាបិយតិ, តេសំ បញ្ញាបនតោ ន សត្តវិនាសកោ, សុវិនីតោ សុសិក្ខិតោ សត្តវិនាយកោតិ អត្ថោ. តស្ស ច បញ្ញត្តិយោ សបញ្ញត្តិយោយេវាតិ ទស្សេតិ. វិមុត្តិំ វិមុច្ចតោ អកុសលា ធម្មាតិ មិច្ឆាទិដ្ឋិសង្ខាតំ ចិត្តស្ស អធិមុត្តិំ អធិមុច្ចតោ អកុសលា ធម្មា វឌ្ឍន្តិ នាម, តំ សន្ធាយេតំ វុត្តំ. សាសនេ បន ចិត្តស្ស វិមុត្តិសង្ខាតោ វិមុត្តិ កុសលានំយេវ បច្ចយោ ហោតិ.