៥. ឧត្តិយសុត្តវណ្ណនា

៩៥. បញ្ចមេ តុណ្ហី អហោសីតិ សត្តូបលទ្ធិយំ ឋត្វា អបុច្ឆំ បុច្ឆតីតិ តុណ្ហី អហោសិ. សព្ពសាមុក្កំសិកំ វត មេតិ មយា សព្ពបុច្ឆានំ ឧត្តមបុច្ឆំ បុច្ឆិតោ សមណោ គោតមោ សំសាទេតិ នោ វិស្សជ្ជេតិ, នូន ន វិសហតិ ន សក្កោតិ វិស្សជ្ជេតុន្តិ ឯវំ បាបិកំ ទិដ្ឋិំ មា បដិលភីតិ. តទស្សាតិ តំ ឯវំ ឧប្បន្នំ ទិដ្ឋិគតំ ភវេយ្យ. បច្ចន្តិមន្តិ យស្មា មជ្ឈិមទេសេ នគរស្ស ឧទ្ធាបាទីនិ ថិរានិ វា ហោន្តុ ទុព្ពលានិ វា, សព្ពសោ វា បន មា ហោន្តុ, ចោរាសង្កា ន ហោតិ. តស្មា តំ អគ្គហេត្វា ‘‘បច្ចន្តិមំ នគរ’’ន្តិ អាហ. ទឡ្ហុទ្ធាបន្តិ ថិរបាការបាទំ. ទឡ្ហបាការតោរណន្តិ ថិរបាការញ្ចេវ ថិរបិដ្ឋិសង្ឃាដញ្ច. ឯកទ្វារន្តិ កស្មា អាហ? ពហុទ្វារស្មិញ្ហិ នគរេ ពហូហិ បណ្ឌិតទោវារិកេហិ ភវិតព្ពំ, ឯកទ្វារេ ឯកោវ វដ្ដតិ. តថាគតស្ស ច បញ្ញាយ អញ្ញោ សទិសោ នត្ថិ. តស្មា សត្ថុ បណ្ឌិតភាវស្ស ឱបម្មត្ថំ ឯកំយេវ ទោវារិកំ ទស្សេតុំ ‘‘ឯកទ្វារ’’ន្តិ អាហ. បណ្ឌិតោតិ បណ្ឌិច្ចេន សមន្នាគតោ. ព្យត្តោតិ វេយ្យត្តិយេន សមន្នាគតោ. មេធាវីតិ ឋានុប្បត្តិយបញ្ញាសង្ខាតាយ មេធាយ សមន្នាគតោ. អនុបរិយាយបថន្តិ អនុបរិយាយនាមកំ មគ្គំ. បាការសន្ធិន្តិ ទ្វិន្នំ ឥដ្ឋកានំ អបគតដ្ឋានំ. បាការវិវរន្តិ បាការស្ស ឆិន្នដ្ឋានំ. តទេវេតំ បញ្ហន្តិ តំយេវ ‘‘សស្សតោ លោកោ’’តិអាទិនា នយេន បុដ្ឋំ ឋបនីយបញ្ហំ បុនបិ បុច្ឆិ. សព្ពោ ច តេន លោកោតិ សត្តូបលទ្ធិយំយេវ ឋត្វា អញ្ញេនាការេន បុច្ឆតីតិ ទស្សេតិ.