(៦) ឧប្បាទនិរោធវារោ

៧២. (ក) យស្ស ចិត្តំ ឧប្បជ្ជតិ តស្ស ចិត្តំ និរុជ្ឈិត្ថាតិ? អាមន្តា.

(ខ) យស្ស វា បន ចិត្តំ និរុជ្ឈិត្ថ តស្ស ចិត្តំ ឧប្បជ្ជតីតិ?

ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ ចិត្តំ និរុជ្ឈិត្ថ, នោ ច តេសំ ចិត្តំ ឧប្បជ្ជតិ. ចិត្តស្ស ឧប្បាទក្ខណេ តេសំ ចិត្តំ និរុជ្ឈិត្ថ ចេវ ឧប្បជ្ជតិ ច.

(ក) យស្ស ចិត្តំ ន ឧប្បជ្ជតិ តស្ស ចិត្តំ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន ចិត្តំ ន និរុជ្ឈិត្ថ តស្ស ចិត្តំ ន ឧប្បជ្ជតីតិ? នត្ថិ.

៧៣. (ក) យស្ស ចិត្តំ ឧប្បជ្ជតិ តស្ស ចិត្តំ និរុជ្ឈិស្សតីតិ? អាមន្តា.

(ខ) យស្ស វា បន ចិត្តំ និរុជ្ឈិស្សតិ តស្ស ចិត្តំ ឧប្បជ្ជតីតិ?

ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ ចិត្តំ និរុជ្ឈិស្សតិ, នោ ច តេសំ ចិត្តំ ឧប្បជ្ជតិ. ចិត្តស្ស ឧប្បាទក្ខណេ តេសំ ចិត្តំ និរុជ្ឈិស្សតិ ចេវ ឧប្បជ្ជតិ ច.

(ក) យស្ស ចិត្តំ ន ឧប្បជ្ជតិ តស្ស ចិត្តំ ន និរុជ្ឈិស្សតីតិ?

ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ ចិត្តំ ន ឧប្បជ្ជតិ, នោ ច តេសំ ចិត្តំ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ ចិត្តំ ន ចេវ ឧប្បជ្ជតិ ន ច និរុជ្ឈិស្សតិ.

(ខ) យស្ស វា បន ចិត្តំ ន និរុជ្ឈិស្សតិ តស្ស ចិត្តំ ន ឧប្បជ្ជតីតិ? អាមន្តា.

៧៤. (ក) យស្ស ចិត្តំ ឧប្បជ្ជិត្ថ តស្ស ចិត្តំ និរុជ្ឈិស្សតីតិ?

បច្ឆិមចិត្តស្ស ភង្គក្ខណេ តេសំ ចិត្តំ ឧប្បជ្ជិត្ថ, នោ ច តេសំ ចិត្តំ និរុជ្ឈិស្សតិ. ឥតរេសំ តេសំ ចិត្តំ ឧប្បជ្ជិត្ថ ចេវ និរុជ្ឈិស្សតិ ច.

(ខ) យស្ស វា បន ចិត្តំ និរុជ្ឈិស្សតិ តស្ស ចិត្តំ ឧប្បជ្ជិត្ថាតិ? អាមន្តា.

(ក) យស្ស ចិត្តំ ន ឧប្បជ្ជិត្ថ តស្ស ចិត្តំ ន និរុជ្ឈិស្សតីតិ? នត្ថិ.

(ខ) យស្ស វា បន ចិត្តំ ន និរុជ្ឈិស្សតិ តស្ស ចិត្តំ ន ឧប្បជ្ជិត្ថាតិ? ឧប្បជ្ជិត្ថ.