(៥) និរោធវារោ

៦៩. (ក) យស្ស ចិត្តំ និរុជ្ឈតិ តស្ស ចិត្តំ និរុជ្ឈិត្ថាតិ? អាមន្តា.

(ខ) យស្ស វា បន ចិត្តំ និរុជ្ឈិត្ថ តស្ស ចិត្តំ និរុជ្ឈតីតិ?

ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តំ និរុជ្ឈិត្ថ, នោ ច តេសំ ចិត្តំ និរុជ្ឈតិ. ចិត្តស្ស ភង្គក្ខណេ តេសំ ចិត្តំ និរុជ្ឈិត្ថ ចេវ និរុជ្ឈតិ ច.

(ក) យស្ស ចិត្តំ ន និរុជ្ឈតិ តស្ស ចិត្តំ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន ចិត្តំ ន និរុជ្ឈិត្ថ តស្ស ចិត្តំ ន និរុជ្ឈតីតិ? នត្ថិ.

៧០. (ក) យស្ស ចិត្តំ និរុជ្ឈតិ តស្ស ចិត្តំ និរុជ្ឈិស្សតីតិ?

បច្ឆិមចិត្តស្ស ភង្គក្ខណេ តេសំ ចិត្តំ និរុជ្ឈតិ, នោ ច តេសំ ចិត្តំ និរុជ្ឈិស្សតិ. ឥតរេសំ ចិត្តស្ស ភង្គក្ខណេ តេសំ ចិត្តំ និរុជ្ឈតិ ចេវ និរុជ្ឈិស្សតិ ច.

(ខ) យស្ស វា បន ចិត្តំ និរុជ្ឈិស្សតិ តស្ស ចិត្តំ និរុជ្ឈតីតិ?

ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តំ និរុជ្ឈិស្សតិ, នោ ច តេសំ ចិត្តំ និរុជ្ឈតិ. ចិត្តស្ស ភង្គក្ខណេ តេសំ ចិត្តំ និរុជ្ឈិស្សតិ ចេវ និរុជ្ឈតិ ច.

(ក) យស្ស ចិត្តំ ន និរុជ្ឈតិ តស្ស ចិត្តំ ន និរុជ្ឈិស្សតីតិ? និរុជ្ឈិស្សតិ.

(ខ) យស្ស វា បន ចិត្តំ ន និរុជ្ឈិស្សតិ តស្ស ចិត្តំ ន និរុជ្ឈតីតិ? និរុជ្ឈតិ.

៧១. (ក) យស្ស ចិត្តំ និរុជ្ឈិត្ថ តស្ស ចិត្តំ និរុជ្ឈិស្សតីតិ?

បច្ឆិមចិត្តស្ស ភង្គក្ខណេ តេសំ ចិត្តំ និរុជ្ឈិត្ថ, នោ ច តេសំ ចិត្តំ និរុជ្ឈិស្សតិ. ឥតរេសំ តេសំ ចិត្តំ និរុជ្ឈិត្ថ ចេវ និរុជ្ឈិស្សតិ ច.

(ខ) យស្ស វា បន ចិត្តំ និរុជ្ឈិស្សតិ តស្ស ចិត្តំ និរុជ្ឈិត្ថាតិ? អាមន្តា.

(ក) យស្ស ចិត្តំ ន និរុជ្ឈិត្ថ តស្ស ចិត្តំ ន និរុជ្ឈិស្សតីតិ? នត្ថិ.

(ខ) យស្ស វា បន ចិត្តំ ន និរុជ្ឈិស្សតិ តស្ស ចិត្តំ ន និរុជ្ឈិត្ថាតិ? និរុជ្ឈិត្ថ.