(១០) ឧប្បន្នុប្បាទវារោ

៧៨. (ក) យស្ស ចិត្តំ ឧប្បន្នំ តស្ស ចិត្តំ ឧប្បជ្ជិត្ថាតិ? អាមន្តា.

(ខ) យស្ស វា បន ចិត្តំ ឧប្បជ្ជិត្ថ តស្ស ចិត្តំ ឧប្បន្នន្តិ?

និរោធសមាបន្នានំ អសញ្ញសត្តានំ តេសំ ចិត្តំ ឧប្បជ្ជិត្ថ, នោ ច តេសំ ចិត្តំ ឧប្បន្នំ. ចិត្តសមង្គីនំ តេសំ ចិត្តំ ឧប្បជ្ជិត្ថ ចេវ ឧប្បន្នញ្ច.

(ក) យស្ស ចិត្តំ ន ឧប្បន្នំ តស្ស ចិត្តំ ន ឧប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន ចិត្តំ ន ឧប្បជ្ជិត្ថ តស្ស ចិត្តំ ន ឧប្បន្នន្តិ? នត្ថិ.

៧៩. (ក) យស្ស ចិត្តំ ឧប្បន្នំ តស្ស ចិត្តំ ឧប្បជ្ជិស្សតីតិ?

បច្ឆិមចិត្តសមង្គីនំ តេសំ ចិត្តំ ឧប្បន្នំ, នោ ច តេសំ ចិត្តំ ឧប្បជ្ជិស្សតិ. ឥតរេសំ ចិត្តសមង្គីនំ តេសំ ចិត្តំ ឧប្បន្នញ្ចេវ ឧប្បជ្ជិស្សតិ ច.

(ខ) យស្ស វា បន ចិត្តំ ឧប្បជ្ជិស្សតិ តស្ស ចិត្តំ ឧប្បន្នន្តិ?

និរោធសមាបន្នានំ អសញ្ញសត្តានំ តេសំ ចិត្តំ ឧប្បជ្ជិស្សតិ, នោ ច តេសំ ចិត្តំ ឧប្បន្នំ. ចិត្តសមង្គីនំ តេសំ ចិត្តំ ឧប្បជ្ជិស្សតិ ចេវ ឧប្បន្នញ្ច.

(ក) យស្ស ចិត្តំ ន ឧប្បន្នំ តស្ស ចិត្តំ ន ឧប្បជ្ជិស្សតីតិ? ឧប្បជ្ជិស្សតិ.

(ខ) យស្ស វា បន ចិត្តំ ន ឧប្បជ្ជិស្សតិ តស្ស ចិត្តំ ន ឧប្បន្នន្តិ? ឧប្បន្នំ.