(៦) ឧប្បាទនិរោធវារោ

៩៣. (ក) យំ ចិត្តំ ឧប្បជ្ជតិ តំ ចិត្តំ និរុជ្ឈិត្ថាតិ? នោ.

(ខ) យំ វា បន ចិត្តំ និរុជ្ឈិត្ថ តំ ចិត្តំ ឧប្បជ្ជតីតិ? នោ.

(ក) យំ ចិត្តំ ន ឧប្បជ្ជតិ តំ ចិត្តំ ន និរុជ្ឈិត្ថាតិ?

អតីតំ ចិត្តំ ន ឧប្បជ្ជតិ, នោ ច តំ ចិត្តំ ន និរុជ្ឈិត្ថ. ភង្គក្ខណេ អនាគតញ្ច ចិត្តំ ន ចេវ ឧប្បជ្ជតិ ន ច និរុជ្ឈិត្ថ.

(ខ) យំ វា បន ចិត្តំ ន និរុជ្ឈិត្ថ តំ ចិត្តំ ន ឧប្បជ្ជតីតិ?

ឧប្បាទក្ខណេ ចិត្តំ ន និរុជ្ឈិត្ថ, នោ ច តំ ចិត្តំ ន ឧប្បជ្ជតិ. ភង្គក្ខណេ អនាគតញ្ច ចិត្តំ ន ចេវ និរុជ្ឈិត្ថ ន ច ឧប្បជ្ជតិ.

៩៤. (ក) យំ ចិត្តំ ឧប្បជ្ជតិ តំ ចិត្តំ និរុជ្ឈិស្សតីតិ? អាមន្តា.

(ខ) យំ វា បន ចិត្តំ និរុជ្ឈិស្សតិ តំ ចិត្តំ ឧប្បជ្ជតីតិ?

អនាគតំ ចិត្តំ និរុជ្ឈិស្សតិ, នោ ច តំ ចិត្តំ ឧប្បជ្ជតិ. ឧប្បាទក្ខណេ ចិត្តំ និរុជ្ឈិស្សតិ ចេវ ឧប្បជ្ជតិ ច.

(ក) យំ ចិត្តំ ន ឧប្បជ្ជតិ តំ ចិត្តំ ន និរុជ្ឈិស្សតីតិ?

អនាគតំ ចិត្តំ ន ឧប្បជ្ជតិ, នោ ច តំ ចិត្តំ ន និរុជ្ឈិស្សតិ. ភង្គក្ខណេ អតីតញ្ច ចិត្តំ ន ចេវ ឧប្បជ្ជតិ ន ច និរុជ្ឈិស្សតិ.

(ខ) យំ វា បន ចិត្តំ ន និរុជ្ឈិស្សតិ តំ ចិត្តំ ន ឧប្បជ្ជតីតិ? អាមន្តា.

៩៥. (ក) យំ ចិត្តំ ឧប្បជ្ជិត្ថ តំ ចិត្តំ និរុជ្ឈិស្សតីតិ? នោ.

(ខ) យំ វា បន ចិត្តំ និរុជ្ឈិស្សតិ តំ ចិត្តំ ឧប្បជ្ជិត្ថាតិ? នោ.

(ក) យំ ចិត្តំ ន ឧប្បជ្ជិត្ថ តំ ចិត្តំ ន និរុជ្ឈិស្សតីតិ?

ឧប្បាទក្ខណេ អនាគតញ្ច ចិត្តំ ន ឧប្បជ្ជិត្ថ, នោ ច តំ ចិត្តំ ន និរុជ្ឈិស្សតិ. ភង្គក្ខណេ ចិត្តំ ន ចេវ ឧប្បជ្ជិត្ថ ន ច និរុជ្ឈិស្សតិ.

(ខ) យំ វា បន ចិត្តំ ន និរុជ្ឈិស្សតិ តំ ចិត្តំ ន ឧប្បជ្ជិត្ថាតិ?

អតីតំ ចិត្តំ ន និរុជ្ឈិស្សតិ, នោ ច តំ ចិត្តំ ន ឧប្បជ្ជិត្ថ. ភង្គក្ខណេ ចិត្តំ ន ចេវ និរុជ្ឈិស្សតិ ន ច ឧប្បជ្ជិត្ថ.