(៥) និរោធវារោ

៩០. (ក) យំ ចិត្តំ និរុជ្ឈតិ តំ ចិត្តំ និរុជ្ឈិត្ថាតិ? នោ.

(ខ) យំ វា បន ចិត្តំ និរុជ្ឈិត្ថ តំ ចិត្តំ និរុជ្ឈតីតិ? នោ.

(ក) យំ ចិត្តំ ន និរុជ្ឈតិ តំ ចិត្តំ ន និរុជ្ឈិត្ថាតិ?

អតីតំ ចិត្តំ ន និរុជ្ឈតិ, នោ ច តំ ចិត្តំ ន និរុជ្ឈិត្ថ. ឧប្បាទក្ខណេ អនាគតញ្ច ចិត្តំ ន ចេវ និរុជ្ឈតិ ន ច និរុជ្ឈិត្ថ.

(ខ) យំ វា បន ចិត្តំ ន និរុជ្ឈិត្ថ តំ ចិត្តំ ន និរុជ្ឈតីតិ?

ភង្គក្ខណេ ចិត្តំ ន និរុជ្ឈិត្ថ, នោ ច តំ ចិត្តំ ន និរុជ្ឈតិ. ឧប្បាទក្ខណេ អនាគតញ្ច ចិត្តំ ន ចេវ និរុជ្ឈិត្ថ ន ច និរុជ្ឈតិ.

៩១. (ក) យំ ចិត្តំ និរុជ្ឈតិ តំ ចិត្តំ និរុជ្ឈិស្សតីតិ? នោ.

(ខ) យំ វា បន ចិត្តំ និរុជ្ឈិស្សតិ តំ ចិត្តំ និរុជ្ឈតីតិ? នោ.

(ក) យំ ចិត្តំ ន និរុជ្ឈតិ តំ ចិត្តំ ន និរុជ្ឈិស្សតីតិ?

ឧប្បាទក្ខណេ អនាគតញ្ច ចិត្តំ ន និរុជ្ឈតិ, នោ ច តំ ចិត្តំ ន និរុជ្ឈិស្សតិ. អតីតំ ចិត្តំ ន ចេវ និរុជ្ឈតិ ន ច និរុជ្ឈិស្សតិ.

(ខ) យំ វា បន ចិត្តំ ន និរុជ្ឈិស្សតិ តំ ចិត្តំ ន និរុជ្ឈតីតិ?

ភង្គក្ខណេ ចិត្តំ ន និរុជ្ឈិស្សតិ, នោ ច តំ ចិត្តំ ន និរុជ្ឈតិ. អតីតំ ចិត្តំ ន ចេវ និរុជ្ឈិស្សតិ ន ច និរុជ្ឈតិ.

៩២. (ក) យំ ចិត្តំ និរុជ្ឈិត្ថ តំ ចិត្តំ និរុជ្ឈិស្សតីតិ? នោ.

(ខ) យំ វា បន ចិត្តំ និរុជ្ឈិស្សតិ តំ ចិត្តំ និរុជ្ឈិត្ថាតិ? នោ.

(ក) យំ ចិត្តំ ន និរុជ្ឈិត្ថ តំ ចិត្តំ ន និរុជ្ឈិស្សតីតិ?

ឧប្បាទក្ខណេ អនាគតញ្ច ចិត្តំ ន និរុជ្ឈិត្ថ, នោ ច តំ ចិត្តំ ន និរុជ្ឈិស្សតិ. ភង្គក្ខណេ ចិត្តំ ន ចេវ និរុជ្ឈិត្ថ ន ច និរុជ្ឈិស្សតិ.

(ខ) យំ វា បន ចិត្តំ ន និរុជ្ឈិស្សតិ តំ ចិត្តំ ន និរុជ្ឈិត្ថាតិ?

អតីតំ ចិត្តំ ន និរុជ្ឈិស្សតិ, នោ ច តំ ចិត្តំ ន និរុជ្ឈិត្ថ. ភង្គក្ខណេ ចិត្តំ ន ចេវ និរុជ្ឈិស្សតិ ន ច និរុជ្ឈិត្ថ.