៤. បច្ចុប្បន្នាតីតវារោ

១៦៨. (ក) យោ ទុក្ខសច្ចំ បរិជានាតិ សោ សមុទយសច្ចំ បជហិត្ថាតិ? នោ.

(ខ) យោ វា បន សមុទយសច្ចំ បជហិត្ថ សោ ទុក្ខសច្ចំ បរិជានាតីតិ? នោ.

(ក) យោ ទុក្ខសច្ចំ ន បរិជានាតិ សោ សមុទយសច្ចំ នប្បជហិត្ថាតិ?

អរហា ទុក្ខសច្ចំ ន បរិជានាតិ, នោ ច សមុទយសច្ចំ នប្បជហិត្ថ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា ទុក្ខសច្ចញ្ច ន បរិជានន្តិ សមុទយសច្ចញ្ច នប្បជហិត្ថ.

(ខ) យោ វា បន សមុទយសច្ចំ នប្បជហិត្ថ សោ ទុក្ខសច្ចំ ន បរិជានាតីតិ?

អគ្គមគ្គសមង្គី សមុទយសច្ចំ នប្បជហិត្ថ, នោ ច ទុក្ខសច្ចំ ន បរិជានាតិ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា សមុទយសច្ចញ្ច នប្បជហិត្ថ ទុក្ខសច្ចញ្ច ន បរិជានន្តិ.