(៤) បច្ចុប្បន្នាតីតវារោ

(ក) អនុលោមបុគ្គលោ

១០៦. (ក) យស្ស ទុក្ខសច្ចំ និរុជ្ឈតិ តស្ស សមុទយសច្ចំ និរុជ្ឈិត្ថាតិ? អាមន្តា.

(ខ) យស្ស វា បន សមុទយសច្ចំ និរុជ្ឈិត្ថ តស្ស ទុក្ខសច្ចំ និរុជ្ឈតីតិ?

សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ សមុទយសច្ចំ និរុជ្ឈិត្ថ, នោ ច តេសំ ទុក្ខសច្ចំ និរុជ្ឈតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ តេសំ សមុទយសច្ចញ្ច និរុជ្ឈិត្ថ ទុក្ខសច្ចញ្ច និរុជ្ឈតិ.

(ក) យស្ស ទុក្ខសច្ចំ និរុជ្ឈតិ តស្ស មគ្គសច្ចំ និរុជ្ឈិត្ថាតិ?

អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ ទុក្ខសច្ចំ និរុជ្ឈតិ, នោ ច តេសំ មគ្គសច្ចំ និរុជ្ឈិត្ថ. អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ ទុក្ខសច្ចញ្ច និរុជ្ឈតិ មគ្គសច្ចញ្ច និរុជ្ឈិត្ថ.

(ខ) យស្ស វា បន មគ្គសច្ចំ និរុជ្ឈិត្ថ តស្ស ទុក្ខសច្ចំ និរុជ្ឈតីតិ?

អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ មគ្គសច្ចំ និរុជ្ឈិត្ថ, នោ ច តេសំ ទុក្ខសច្ចំ និរុជ្ឈតិ. អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ មគ្គសច្ចញ្ច និរុជ្ឈិត្ថ ទុក្ខសច្ចញ្ច និរុជ្ឈតិ.

១០៧. (ក) យស្ស សមុទយសច្ចំ និរុជ្ឈតិ តស្ស មគ្គសច្ចំ និរុជ្ឈិត្ថាតិ?

អនភិសមេតាវីនំ តណ្ហាយ ភង្គក្ខណេ តេសំ សមុទយសច្ចំ និរុជ្ឈតិ, នោ ច តេសំ មគ្គសច្ចំ និរុជ្ឈិត្ថ. អភិសមេតាវីនំ តណ្ហាយ ភង្គក្ខណេ តេសំ សមុទយសច្ចញ្ច និរុជ្ឈតិ មគ្គសច្ចញ្ច និរុជ្ឈិត្ថ.

(ខ) យស្ស វា បន មគ្គសច្ចំ និរុជ្ឈិត្ថ តស្ស សមុទយសច្ចំ និរុជ្ឈតីតិ?

អភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ និរោធសមាបន្នានំ តេសំ មគ្គសច្ចំ និរុជ្ឈិត្ថ, នោ ច តេសំ សមុទយសច្ចំ និរុជ្ឈតិ. អភិសមេតាវីនំ តណ្ហាយ ភង្គក្ខណេ តេសំ មគ្គសច្ចញ្ច និរុជ្ឈិត្ថ សមុទយសច្ចញ្ច និរុជ្ឈតិ.

(ខ) អនុលោមឱកាសោ

១០៨. យត្ថ ទុក្ខសច្ចំ និរុជ្ឈតិ…បេ….

(គ) អនុលោមបុគ្គលោកាសា

១០៩. (ក) យស្ស យត្ថ ទុក្ខសច្ចំ និរុជ្ឈតិ តស្ស តត្ថ សមុទយសច្ចំ និរុជ្ឈិត្ថាតិ?

សុទ្ធាវាសានំ ឧបបត្តិចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ ទុក្ខសច្ចំ និរុជ្ឈតិ, នោ ច តេសំ តត្ថ សមុទយសច្ចំ និរុជ្ឈិត្ថ. ឥតរេសំ ចតុវោការា បញ្ចវោការា ចវន្តានំ បវត្តេ ចិត្តស្ស ភង្គក្ខណេ តេសំ តត្ថ ទុក្ខសច្ចញ្ច និរុជ្ឈតិ សមុទយសច្ចញ្ច និរុជ្ឈិត្ថ.

(ខ) យស្ស វា បន យត្ថ សមុទយសច្ចំ និរុជ្ឈិត្ថ តស្ស តត្ថ ទុក្ខសច្ចំ និរុជ្ឈតីតិ?

ចតុវោការំ បញ្ចវោការំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ តត្ថ សមុទយសច្ចំ និរុជ្ឈិត្ថ, នោ ច តេសំ តត្ថ ទុក្ខសច្ចំ និរុជ្ឈតិ. ចតុវោការា បញ្ចវោការា ចវន្តានំ បវត្តេ ចិត្តស្ស ភង្គក្ខណេ តេសំ តត្ថ សមុទយសច្ចញ្ច និរុជ្ឈិត្ថ ទុក្ខសច្ចញ្ច និរុជ្ឈតិ.

(ក) យស្ស យត្ថ ទុក្ខសច្ចំ និរុជ្ឈតិ តស្ស តត្ថ មគ្គសច្ចំ និរុជ្ឈិត្ថាតិ?

សុទ្ធាវាសានំ ឧបបត្តិចិត្តស្ស ភង្គក្ខណេ អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ ទុក្ខសច្ចំ និរុជ្ឈតិ, នោ ច តេសំ តត្ថ មគ្គសច្ចំ និរុជ្ឈិត្ថ. អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ តត្ថ ទុក្ខសច្ចញ្ច និរុជ្ឈតិ មគ្គសច្ចញ្ច និរុជ្ឈិត្ថ.

(ខ) យស្ស វា បន យត្ថ មគ្គសច្ចំ និរុជ្ឈិត្ថ តស្ស តត្ថ ទុក្ខសច្ចំ និរុជ្ឈតីតិ?

អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ តត្ថ មគ្គសច្ចំ និរុជ្ឈិត្ថ, នោ ច តេសំ តត្ថ ទុក្ខសច្ចំ និរុជ្ឈតិ. អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ តត្ថ មគ្គសច្ចញ្ច និរុជ្ឈិត្ថ ទុក្ខសច្ចញ្ច និរុជ្ឈតិ.

១១០. (ក) យស្ស យត្ថ សមុទយសច្ចំ និរុជ្ឈតិ តស្ស តត្ថ មគ្គសច្ចំ និរុជ្ឈិត្ថាតិ?

អនភិសមេតាវីនំ តណ្ហាយ ភង្គក្ខណេ តេសំ តត្ថ សមុទយសច្ចំ និរុជ្ឈតិ, នោ ច តេសំ តត្ថ មគ្គសច្ចំ និរុជ្ឈិត្ថ. អភិសមេតាវីនំ តណ្ហាយ ភង្គក្ខណេ តេសំ តត្ថ សមុទយសច្ចញ្ច និរុជ្ឈតិ មគ្គសច្ចញ្ច និរុជ្ឈិត្ថ.

(ខ) យស្ស វា បន យត្ថ មគ្គសច្ចំ និរុជ្ឈិត្ថ តស្ស តត្ថ សមុទយសច្ចំ និរុជ្ឈតីតិ?

អភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ តេសំ តត្ថ មគ្គសច្ចំ និរុជ្ឈិត្ថ, នោ ច តេសំ តត្ថ សមុទយសច្ចំ និរុជ្ឈតិ. អភិសមេតាវីនំ តណ្ហាយ ភង្គក្ខណេ តេសំ តត្ថ មគ្គសច្ចញ្ច និរុជ្ឈិត្ថ សមុទយសច្ចញ្ច និរុជ្ឈតិ.

(ឃ) បច្ចនីកបុគ្គលោ

១១១. (ក) យស្ស ទុក្ខសច្ចំ ន និរុជ្ឈតិ តស្ស សមុទយសច្ចំ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន សមុទយសច្ចំ ន និរុជ្ឈិត្ថ តស្ស ទុក្ខសច្ចំ ន និរុជ្ឈតីតិ? នត្ថិ.

(ក) យស្ស ទុក្ខសច្ចំ ន និរុជ្ឈតិ តស្ស មគ្គសច្ចំ ន និរុជ្ឈិត្ថាតិ?

អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ ទុក្ខសច្ចំ ន និរុជ្ឈតិ, នោ ច តេសំ មគ្គសច្ចំ ន និរុជ្ឈិត្ថ. អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ ទុក្ខសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈិត្ថ.

(ខ) យស្ស វា បន មគ្គសច្ចំ ន និរុជ្ឈិត្ថ តស្ស ទុក្ខសច្ចំ ន និរុជ្ឈតីតិ?

អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ មគ្គសច្ចំ ន និរុជ្ឈិត្ថ, នោ ច តេសំ ទុក្ខសច្ចំ ន និរុជ្ឈតិ. អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ មគ្គសច្ចញ្ច ន និរុជ្ឈិត្ថ ទុក្ខសច្ចញ្ច ន និរុជ្ឈតិ.

១១២. (ក) យស្ស សមុទយសច្ចំ ន និរុជ្ឈតិ តស្ស មគ្គសច្ចំ ន និរុជ្ឈិត្ថាតិ?

អភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ និរោធសមាបន្នានំ តេសំ សមុទយសច្ចំ ន និរុជ្ឈតិ, នោ ច តេសំ មគ្គសច្ចំ ន និរុជ្ឈិត្ថ. អនភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ សមុទយសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈិត្ថ.

(ខ) យស្ស វា បន មគ្គសច្ចំ ន និរុជ្ឈិត្ថ តស្ស សមុទយសច្ចំ ន និរុជ្ឈតីតិ?

អនភិសមេតាវីនំ តណ្ហាយ ភង្គក្ខណេ តេសំ មគ្គសច្ចំ ន និរុជ្ឈិត្ថ, នោ ច តេសំ សមុទយសច្ចំ ន និរុជ្ឈតិ. អនភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ មគ្គសច្ចញ្ច ន និរុជ្ឈិត្ថ សមុទយសច្ចញ្ច ន និរុជ្ឈតិ.

(ង) បច្ចនីកឱកាសោ

១១៣. យត្ថ ទុក្ខសច្ចំ ន និរុជ្ឈតិ…បេ….

(ច) បច្ចនីកបុគ្គលោកាសា

១១៤. (ក) យស្ស យត្ថ ទុក្ខសច្ចំ ន និរុជ្ឈតិ តស្ស តត្ថ សមុទយសច្ចំ ន និរុជ្ឈិត្ថាតិ?

ចតុវោការំ បញ្ចវោការំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ តត្ថ ទុក្ខសច្ចំ ន និរុជ្ឈតិ, នោ ច តេសំ តត្ថ សមុទយសច្ចំ ន និរុជ្ឈិត្ថ. សុទ្ធាវាសានំ ឧបបត្តិចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ ទុក្ខសច្ចញ្ច ន និរុជ្ឈតិ សមុទយសច្ចញ្ច ន និរុជ្ឈិត្ថ.

(ខ) យស្ស វា បន យត្ថ សមុទយសច្ចំ ន និរុជ្ឈិត្ថ តស្ស តត្ថ ទុក្ខសច្ចំ ន និរុជ្ឈតីតិ?

សុទ្ធាវាសានំ ឧបបត្តិចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ សមុទយសច្ចំ ន និរុជ្ឈិត្ថ, នោ ច តេសំ តត្ថ ទុក្ខសច្ចំ ន និរុជ្ឈតិ. សុទ្ធាវាសានំ ឧបបត្តិចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ សមុទយសច្ចញ្ច ន និរុជ្ឈិត្ថ ទុក្ខសច្ចញ្ច ន និរុជ្ឈតិ.

(ក) យស្ស យត្ថ ទុក្ខសច្ចំ ន និរុជ្ឈតិ តស្ស តត្ថ មគ្គសច្ចំ ន និរុជ្ឈិត្ថាតិ?

អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អរូបេ មគ្គស្ស ច ផលស្ស ច ភង្គក្ខណេ តេសំ តត្ថ ទុក្ខសច្ចំ ន និរុជ្ឈតិ, នោ ច តេសំ តត្ថ មគ្គសច្ចំ ន និរុជ្ឈិត្ថ. សុទ្ធាវាសានំ ឧបបត្តិចិត្តស្ស ឧប្បាទក្ខណេ អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ ទុក្ខសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈិត្ថ.

(ខ) យស្ស វា បន យត្ថ មគ្គសច្ចំ ន និរុជ្ឈិត្ថ តស្ស តត្ថ ទុក្ខសច្ចំ ន និរុជ្ឈតីតិ?

សុទ្ធាវាសានំ ឧបបត្តិចិត្តស្ស ភង្គក្ខណេ អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ មគ្គសច្ចំ ន និរុជ្ឈិត្ថ, នោ ច តេសំ តត្ថ ទុក្ខសច្ចំ ន និរុជ្ឈតិ. សុទ្ធាវាសានំ ឧបបត្តិចិត្តស្ស ឧប្បាទក្ខណេ អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ មគ្គសច្ចញ្ច ន និរុជ្ឈិត្ថ ទុក្ខសច្ចញ្ច ន និរុជ្ឈតិ.

១១៥. (ក) យស្ស យត្ថ សមុទយសច្ចំ ន និរុជ្ឈតិ តស្ស តត្ថ មគ្គសច្ចំ ន និរុជ្ឈិត្ថាតិ?

អភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ តេសំ តត្ថ សមុទយសច្ចំ ន និរុជ្ឈតិ, នោ ច តេសំ តត្ថ មគ្គសច្ចំ ន និរុជ្ឈិត្ថ. សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ តត្ថ សមុទយសច្ចញ្ច ន និរុជ្ឈតិ មគ្គសច្ចញ្ច ន និរុជ្ឈិត្ថ.

(ខ) យស្ស វា បន យត្ថ មគ្គសច្ចំ ន និរុជ្ឈិត្ថ តស្ស តត្ថ សមុទយសច្ចំ ន និរុជ្ឈតីតិ?

អនភិសមេតាវីនំ តណ្ហាយ ភង្គក្ខណេ តេសំ តត្ថ មគ្គសច្ចំ ន និរុជ្ឈិត្ថ, នោ ច តេសំ តត្ថ សមុទយសច្ចំ ន និរុជ្ឈតិ. សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ តណ្ហាយ ឧប្បាទក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ តត្ថ មគ្គសច្ចញ្ច ន និរុជ្ឈិត្ថ សមុទយសច្ចញ្ច ន និរុជ្ឈតិ.