(៣) អនាគតវារោ

(ក) អនុលោមបុគ្គលោ

៩៧. (ក) យស្ស ទុក្ខសច្ចំ និរុជ្ឈិស្សតិ តស្ស សមុទយសច្ចំ និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ [បដិលភិស្សន្តិ តស្ស ចិត្តស្ស ឧប្បាទក្ខណេ (សី. ស្យា.) ឧប្បាទវារេ បន បាឋន្តរំ នត្ថិ] តេសំ ទុក្ខសច្ចំ និរុជ្ឈិស្សតិ, នោ ច តេសំ សមុទយសច្ចំ និរុជ្ឈិស្សតិ. ឥតរេសំ តេសំ ទុក្ខសច្ចញ្ច និរុជ្ឈិស្សតិ សមុទយសច្ចញ្ច និរុជ្ឈិស្សតិ.

(ខ) យស្ស វា បន…បេ…? អាមន្តា.

(ក) យស្ស ទុក្ខសច្ចំ និរុជ្ឈិស្សតិ តស្ស មគ្គសច្ចំ និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ ទុក្ខសច្ចំ និរុជ្ឈិស្សតិ, នោ ច តេសំ មគ្គសច្ចំ និរុជ្ឈិស្សតិ. អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ ទុក្ខសច្ចញ្ច និរុជ្ឈិស្សតិ មគ្គសច្ចញ្ច និរុជ្ឈិស្សតិ.

(ខ) យស្ស វា បន…បេ…. អាមន្តា.

៩៨. (ក) យស្ស សមុទយសច្ចំ និរុជ្ឈិស្សតិ តស្ស មគ្គសច្ចំ និរុជ្ឈិស្សតីតិ?

យេ បុថុជ្ជនា មគ្គំ ន បដិលភិស្សន្តិ តេសំ សមុទយសច្ចំ និរុជ្ឈិស្សតិ, នោ ច តេសំ មគ្គសច្ចំ និរុជ្ឈិស្សតិ. យេ មគ្គំ បដិលភិស្សន្តិ តេសំ សមុទយសច្ចញ្ច និរុជ្ឈិស្សតិ មគ្គសច្ចញ្ច និរុជ្ឈិស្សតិ.

(ខ) យស្ស វា បន មគ្គសច្ចំ និរុជ្ឈិស្សតិ តស្ស សមុទយសច្ចំ និរុជ្ឈិស្សតីតិ?

អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ មគ្គសច្ចំ និរុជ្ឈិស្សតិ, នោ ច តេសំ សមុទយសច្ចំ និរុជ្ឈិស្សតិ. យេ មគ្គំ បដិលភិស្សន្តិ តេសំ មគ្គសច្ចញ្ច និរុជ្ឈិស្សតិ សមុទយសច្ចញ្ច និរុជ្ឈិស្សតិ.

(ខ) អនុលោមឱកាសោ

៩៩. យត្ថ ទុក្ខសច្ចំ និរុជ្ឈិស្សតិ…បេ….

(គ) អនុលោមបុគ្គលោកាសា

១០០. យស្ស យត្ថ ទុក្ខសច្ចំ និរុជ្ឈិស្សតិ តស្ស តត្ថ សមុទយសច្ចំ និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ ទុក្ខសច្ចំ និរុជ្ឈិស្សតិ, នោ ច តេសំ តត្ថ សមុទយសច្ចំ និរុជ្ឈិស្សតិ. ឥតរេសំ ចតុវោការានំ បញ្ចវោការានំ តេសំ តត្ថ ទុក្ខសច្ចញ្ច និរុជ្ឈិស្សតិ សមុទយសច្ចញ្ច និរុជ្ឈិស្សតិ…បេ….

(យស្សកម្បិ យស្សយត្ថកម្បិ សទិសំ).

(ឃ) បច្ចនីកបុគ្គលោ

១០១. (ក) យស្ស ទុក្ខសច្ចំ ន និរុជ្ឈិស្សតិ តស្ស សមុទយសច្ចំ ន និរុជ្ឈិស្សតីតិ? អាមន្តា.

(ខ) យស្ស វា បន សមុទយសច្ចំ ន និរុជ្ឈិស្សតិ តស្ស ទុក្ខសច្ចំ ន និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ សមុទយសច្ចំ ន និរុជ្ឈិស្សតិ, នោ ច តេសំ ទុក្ខសច្ចំ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ សមុទយសច្ចញ្ច ន និរុជ្ឈិស្សតិ ទុក្ខសច្ចញ្ច ន និរុជ្ឈិស្សតិ.

(ក) យស្ស ទុក្ខសច្ចំ ន និរុជ្ឈិស្សតិ តស្ស មគ្គសច្ចំ ន និរុជ្ឈិស្សតីតិ? អាមន្តា.

(ខ) យស្ស វា បន មគ្គសច្ចំ ន និរុជ្ឈិស្សតិ តស្ស ទុក្ខសច្ចំ ន និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ មគ្គសច្ចំ ន និរុជ្ឈិស្សតិ, នោ ច តេសំ ទុក្ខសច្ចំ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ មគ្គសច្ចញ្ច ន និរុជ្ឈិស្សតិ ទុក្ខសច្ចញ្ច ន និរុជ្ឈិស្សតិ.

១០២. (ក) យស្ស សមុទយសច្ចំ ន និរុជ្ឈិស្សតិ តស្ស មគ្គសច្ចំ ន និរុជ្ឈិស្សតីតិ?

អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ សមុទយសច្ចំ ន និរុជ្ឈិស្សតិ, នោ ច តេសំ មគ្គសច្ចំ ន និរុជ្ឈិស្សតិ. អគ្គមគ្គស្ស ភង្គក្ខណេ អរហន្តានំ តេសំ សមុទយសច្ចញ្ច ន និរុជ្ឈិស្សតិ មគ្គសច្ចញ្ច ន និរុជ្ឈិស្សតិ.

(ខ) យស្ស វា បន មគ្គសច្ចំ ន និរុជ្ឈិស្សតិ តស្ស សមុទយសច្ចំ ន និរុជ្ឈិស្សតីតិ?

យេ បុថុជ្ជនា មគ្គំ ន បដិលភិស្សន្តិ តេសំ មគ្គសច្ចំ ន និរុជ្ឈិស្សតិ, នោ ច តេសំ សមុទយសច្ចំ ន និរុជ្ឈិស្សតិ. អគ្គមគ្គស្ស ភង្គក្ខណេ អរហន្តានំ តេសំ មគ្គសច្ចញ្ច ន និរុជ្ឈិស្សតិ សមុទយសច្ចញ្ច ន និរុជ្ឈិស្សតិ.

(ង) បច្ចនីកឱកាសោ

១០៣. យត្ថ ទុក្ខសច្ចំ ន និរុជ្ឈិស្សតិ…បេ….

(ច) បច្ចនីកបុគ្គលោកាសា

១០៤. (ក) យស្ស យត្ថ ទុក្ខសច្ចំ ន និរុជ្ឈិស្សតិ តស្ស តត្ថ សមុទយសច្ចំ ន និរុជ្ឈិស្សតីតិ? អាមន្តា.

(ខ) យស្ស វា បន យត្ថ សមុទយសច្ចំ ន និរុជ្ឈិស្សតិ តស្ស តត្ថ ទុក្ខសច្ចំ ន និរុជ្ឈិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ សមុទយសច្ចំ ន និរុជ្ឈិស្សតិ, នោ ច តេសំ តត្ថ ទុក្ខសច្ចំ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ តត្ថ សមុទយសច្ចញ្ច ន និរុជ្ឈិស្សតិ ទុក្ខសច្ចញ្ច ន និរុជ្ឈិស្សតិ.

(ក) យស្ស យត្ថ ទុក្ខសច្ចំ ន និរុជ្ឈិស្សតិ តស្ស តត្ថ មគ្គសច្ចំ ន និរុជ្ឈិស្សតីតិ? អាមន្តា.

(ខ) យស្ស វា បន យត្ថ មគ្គសច្ចំ ន និរុជ្ឈិស្សតិ តស្ស តត្ថ ទុក្ខសច្ចំ ន និរុជ្ឈិស្សតីតិ?

អគ្គមគ្គស្ស ភង្គក្ខណេ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ អសញ្ញសត្តានំ តេសំ តត្ថ មគ្គសច្ចំ ន និរុជ្ឈិស្សតិ, នោ ច តេសំ តត្ថ ទុក្ខសច្ចំ ន និរុជ្ឈិស្សតិ. បច្ឆិមចិត្តស្ស ភង្គក្ខណេ តេសំ តត្ថ មគ្គសច្ចញ្ច ន និរុជ្ឈិស្សតិ ទុក្ខសច្ចញ្ច ន និរុជ្ឈិស្សតិ.

១០៥. (ក) យស្ស យត្ថ សមុទយសច្ចំ ន និរុជ្ឈិស្សតិ តស្ស តត្ថ មគ្គសច្ចំ ន និរុជ្ឈិស្សតីតិ?

អគ្គមគ្គស្ស ឧប្បាទក្ខណេ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ តត្ថ សមុទយសច្ចំ ន និរុជ្ឈិស្សតិ, នោ ច តេសំ តត្ថ មគ្គសច្ចំ ន និរុជ្ឈិស្សតិ. អគ្គមគ្គស្ស ភង្គក្ខណេ អរហន្តានំ អសញ្ញសត្តានំ តេសំ តត្ថ សមុទយសច្ចញ្ច ន និរុជ្ឈិស្សតិ មគ្គសច្ចញ្ច ន និរុជ្ឈិស្សតិ.

(ខ) យស្ស វា បន យត្ថ មគ្គសច្ចំ ន និរុជ្ឈិស្សតិ តស្ស តត្ថ សមុទយសច្ចំ ន និរុជ្ឈិស្សតីតិ?

អាបាយិកានំ យេ ច បុថុជ្ជនា មគ្គំ ន បដិលភិស្សន្តិ តេសំ តត្ថ មគ្គសច្ចំ ន និរុជ្ឈិស្សតិ, នោ ច តេសំ តត្ថ សមុទយសច្ចំ ន និរុជ្ឈិស្សតិ. អគ្គមគ្គស្ស ភង្គក្ខណេ អរហន្តានំ អសញ្ញសត្តានំ តេសំ តត្ថ មគ្គសច្ចញ្ច ន និរុជ្ឈិស្សតិ សមុទយសច្ចញ្ច ន និរុជ្ឈិស្សតិ.