(៣) អនាគតវារោ

(ក) អនុលោមបុគ្គលោ

៤៨. (ក) យស្ស ទុក្ខសច្ចំ ឧប្បជ្ជិស្សតិ តស្ស សមុទយសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ ទុក្ខសច្ចំ ឧប្បជ្ជិស្សតិ, នោ ច តេសំ សមុទយសច្ចំ ឧប្បជ្ជិស្សតិ. ឥតរេសំ តេសំ ទុក្ខសច្ចញ្ច ឧប្បជ្ជិស្សតិ សមុទយសច្ចញ្ច ឧប្បជ្ជិស្សតិ.

(ខ) យស្ស វា បន…បេ…? អាមន្តា.

(ក) យស្ស ទុក្ខសច្ចំ ឧប្បជ្ជិស្សតិ តស្ស មគ្គសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ ទុក្ខសច្ចំ ឧប្បជ្ជិស្សតិ, នោ ច តេសំ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ យេ ចញ្ញេ មគ្គំ បដិលភិស្សន្តិ តេសំ ទុក្ខសច្ចញ្ច ឧប្បជ្ជិស្សតិ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន…បេ… ឧប្បជ្ជិស្សតីតិ? អាមន្តា.

៤៩. (ក) យស្ស សមុទយសច្ចំ ឧប្បជ្ជិស្សតិ តស្ស មគ្គសច្ចំ ឧប្បជ្ជិស្សតីតិ?

យេ បុថុជ្ជនា មគ្គំ ន បដិលភិស្សន្តិ តេសំ សមុទយសច្ចំ ឧប្បជ្ជិស្សតិ, នោ ច តេសំ មគ្គសច្ចំ ឧប្បជ្ជិស្សតិ. យេ មគ្គំ បដិលភិស្សន្តិ តេសំ សមុទយសច្ចញ្ច ឧប្បជ្ជិស្សតិ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន មគ្គសច្ចំ ឧប្បជ្ជិស្សតិ តស្ស សមុទយសច្ចំ ឧប្បជ្ជិស្សតីតិ?

យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ មគ្គសច្ចំ ឧប្បជ្ជិស្សតិ, នោ ច តេសំ សមុទយសច្ចំ ឧប្បជ្ជិស្សតិ. យេ មគ្គំ បដិលភិស្សន្តិ តេសំ មគ្គសច្ចញ្ច ឧប្បជ្ជិស្សតិ សមុទយសច្ចញ្ច ឧប្បជ្ជិស្សតិ.

(ខ) អនុលោមឱកាសោ

៥០. យត្ថ ទុក្ខសច្ចំ ឧប្បជ្ជិស្សតិ…បេ….

(គ) អនុលោមបុគ្គលោកាសា

៥១. (ក) យស្ស យត្ថ ទុក្ខសច្ចំ ឧប្បជ្ជិស្សតិ តស្ស តត្ថ សមុទយសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិស្សតិ, នោ ច តេសំ តត្ថ សមុទយសច្ចំ ឧប្បជ្ជិស្សតិ. ឥតរេសំ ចតុវោការានំ បញ្ចវោការានំ តេសំ តត្ថ ទុក្ខសច្ចញ្ច ឧប្បជ្ជិស្សតិ សមុទយសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ សមុទយសច្ចំ ឧប្បជ្ជិស្សតិ…បេ… ឧប្បជ្ជិស្សតីតិ? អាមន្តា.

(ក) យស្ស យត្ថ ទុក្ខសច្ចំ ឧប្បជ្ជិស្សតិ តស្ស តត្ថ មគ្គសច្ចំ ឧប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិស្សតិ, នោ ច តេសំ តត្ថ មគ្គសច្ចំ ឧប្បជ្ជិស្សតិ. យស្ស ចិត្តស្ស អនន្តរា អគ្គមគ្គំ បដិលភិស្សន្តិ, យេ ចញ្ញេ មគ្គំ បដិលភិស្សន្តិ តេសំ តត្ថ ទុក្ខសច្ចញ្ច ឧប្បជ្ជិស្សតិ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ មគ្គសច្ចំ ឧប្បជ្ជិស្សតិ តស្ស តត្ថ ទុក្ខសច្ចំ ឧប្បជ្ជិស្សតីតិ? អាមន្តា.

៥២. (ក) យស្ស យត្ថ សមុទយសច្ចំ ឧប្បជ្ជិស្សតិ តស្ស តត្ថ មគ្គសច្ចំ ឧប្បជ្ជិស្សតីតិ?

អាបាយិកានំ យេ ច បុថុជ្ជនា មគ្គំ ន បដិលភិស្សន្តិ តេសំ តត្ថ សមុទយសច្ចំ ឧប្បជ្ជិស្សតិ, នោ ច តេសំ តត្ថ មគ្គសច្ចំ ឧប្បជ្ជិស្សតិ. យេ មគ្គំ បដិលភិស្សន្តិ តេសំ តត្ថ សមុទយសច្ចញ្ច ឧប្បជ្ជិស្សតិ មគ្គសច្ចញ្ច ឧប្បជ្ជិស្សតិ.

(ខ) យស្ស វា បន យត្ថ មគ្គសច្ចំ ឧប្បជ្ជិស្សតិ តស្ស តត្ថ សមុទយសច្ចំ ឧប្បជ្ជិស្សតីតិ?

យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ តត្ថ មគ្គសច្ចំ ឧប្បជ្ជិស្សតិ, នោ ច តេសំ តត្ថ សមុទយសច្ចំ ឧប្បជ្ជិស្សតិ. យេ មគ្គំ បដិលភិស្សន្តិ តេសំ តត្ថ មគ្គសច្ចញ្ច ឧប្បជ្ជិស្សតិ សមុទយសច្ចញ្ច ឧប្បជ្ជិស្សតិ.

(ឃ) បច្ចនីកបុគ្គលោ

៥៣. (ក) យស្ស ទុក្ខសច្ចំ នុប្បជ្ជិស្សតិ តស្ស សមុទយសច្ចំ នុប្បជ្ជិស្សតីតិ? អាមន្តា.

(ខ) យស្ស វា បន សមុទយសច្ចំ នុប្បជ្ជិស្សតិ តស្ស ទុក្ខសច្ចំ នុប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ សមុទយសច្ចំ នុប្បជ្ជិស្សតិ, នោ ច តេសំ ទុក្ខសច្ចំ នុប្បជ្ជិស្សតិ. បច្ឆិមចិត្តសមង្គីនំ តេសំ សមុទយសច្ចញ្ច នុប្បជ្ជិស្សតិ ទុក្ខសច្ចញ្ច នុប្បជ្ជិស្សតិ.

(ក) យស្ស ទុក្ខសច្ចំ នុប្បជ្ជិស្សតិ តស្ស មគ្គសច្ចំ នុប្បជ្ជិស្សតីតិ? អាមន្តា.

(ខ) យស្ស វា បន មគ្គសច្ចំ នុប្បជ្ជិស្សតិ តស្ស ទុក្ខសច្ចំ នុប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ តេសំ មគ្គសច្ចំ នុប្បជ្ជិស្សតិ, នោ ច តេសំ ទុក្ខសច្ចំ នុប្បជ្ជិស្សតិ. បច្ឆិមចិត្តសមង្គីនំ តេសំ មគ្គសច្ចញ្ច នុប្បជ្ជិស្សតិ ទុក្ខសច្ចញ្ច នុប្បជ្ជិស្សតិ.

៥៤. (ក) យស្ស សមុទយសច្ចំ នុប្បជ្ជិស្សតិ តស្ស មគ្គសច្ចំ នុប្បជ្ជិស្សតីតិ?

យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ សមុទយសច្ចំ នុប្បជ្ជិស្សតិ, នោ ច តេសំ មគ្គសច្ចំ នុប្បជ្ជិស្សតិ. អគ្គមគ្គសមង្គីនំ អរហន្តានំ តេសំ សមុទយសច្ចញ្ច នុប្បជ្ជិស្សតិ មគ្គសច្ចញ្ច នុប្បជ្ជិស្សតិ.

(ខ) យស្ស វា បន មគ្គសច្ចំ នុប្បជ្ជិស្សតិ តស្ស សមុទយសច្ចំ នុប្បជ្ជិស្សតីតិ?

យេ បុថុជ្ជនា មគ្គំ ន បដិលភិស្សន្តិ តេសំ មគ្គសច្ចំ នុប្បជ្ជិស្សតិ, នោ ច តេសំ សមុទយសច្ចំ នុប្បជ្ជិស្សតិ. អគ្គមគ្គសមង្គីនំ អរហន្តានំ តេសំ មគ្គសច្ចញ្ច នុប្បជ្ជិស្សតិ សមុទយសច្ចញ្ច នុប្បជ្ជិស្សតិ.

(ង) បច្ចនីកឱកាសោ

៥៥. យត្ថ ទុក្ខសច្ចំ នុប្បជ្ជិស្សតិ…បេ….

(ច) បច្ចនីកបុគ្គលោកាសា

៥៦. (ក) យស្ស យត្ថ ទុក្ខសច្ចំ នុប្បជ្ជិស្សតិ តស្ស តត្ថ សមុទយសច្ចំ នុប្បជ្ជិស្សតីតិ? អាមន្តា.

(ខ) យស្ស វា បន យត្ថ សមុទយសច្ចំ នុប្បជ្ជិស្សតិ តស្ស តត្ថ ទុក្ខសច្ចំ នុប្បជ្ជិស្សតីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ អសញ្ញសត្តានំ តេសំ តត្ថ សមុទយសច្ចំ នុប្បជ្ជិស្សតិ, នោ ច តេសំ តត្ថ ទុក្ខសច្ចំ នុប្បជ្ជិស្សតិ. បច្ឆិមចិត្តសមង្គីនំ តេសំ តត្ថ សមុទយសច្ចញ្ច នុប្បជ្ជិស្សតិ ទុក្ខសច្ចញ្ច នុប្បជ្ជិស្សតិ.

(ក) យស្ស យត្ថ ទុក្ខសច្ចំ នុប្បជ្ជិស្សតិ តស្ស តត្ថ មគ្គសច្ចំ នុប្បជ្ជិស្សតីតិ? អាមន្តា.

(ខ) យស្ស វា បន យត្ថ មគ្គសច្ចំ នុប្បជ្ជិស្សតិ តស្ស តត្ថ ទុក្ខសច្ចំ នុប្បជ្ជិស្សតីតិ?

អគ្គមគ្គសមង្គីនំ អរហន្តានំ យេ ច បុថុជ្ជនា មគ្គំ ន បដិលភិស្សន្តិ អាបាយិកានំ អសញ្ញសត្តានំ តេសំ តត្ថ មគ្គសច្ចំ នុប្បជ្ជិស្សតិ, នោ ច តេសំ តត្ថ ទុក្ខសច្ចំ នុប្បជ្ជិស្សតិ. បច្ឆិមចិត្តសមង្គីនំ តេសំ តត្ថ មគ្គសច្ចញ្ច នុប្បជ្ជិស្សតិ ទុក្ខសច្ចញ្ច នុប្បជ្ជិស្សតិ.

៥៧. (ក) យស្ស យត្ថ សមុទយសច្ចំ នុប្បជ្ជិស្សតិ តស្ស តត្ថ មគ្គសច្ចំ នុប្បជ្ជិស្សតីតិ?

យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ តត្ថ សមុទយសច្ចំ នុប្បជ្ជិស្សតិ, នោ ច តេសំ តត្ថ មគ្គសច្ចំ នុប្បជ្ជិស្សតិ. អគ្គមគ្គសមង្គីនំ អរហន្តានំ អសញ្ញសត្តានំ តេសំ តត្ថ សមុទយសច្ចញ្ច នុប្បជ្ជិស្សតិ មគ្គសច្ចញ្ច នុប្បជ្ជិស្សតិ.

(ខ) យស្ស វា បន យត្ថ មគ្គសច្ចំ នុប្បជ្ជិស្សតិ តស្ស តត្ថ សមុទយសច្ចំ នុប្បជ្ជិស្សតីតិ?

អាបាយិកានំ យេ ច បុថុជ្ជនា មគ្គំ ន បដិលភិស្សន្តិ តេសំ តត្ថ មគ្គសច្ចំ នុប្បជ្ជិស្សតិ, នោ ច តេសំ តត្ថ សមុទយសច្ចំ នុប្បជ្ជិស្សតិ. អគ្គមគ្គសមង្គីនំ អរហន្តានំ អសញ្ញសត្តានំ តេសំ តត្ថ មគ្គសច្ចញ្ច នុប្បជ្ជិស្សតិ សមុទយសច្ចញ្ច នុប្បជ្ជិស្សតិ.