(៤) បច្ចុប្បន្នាតីតវារោ

(ក) អនុលោមបុគ្គលោ

៥៨. (ក) យស្ស ទុក្ខសច្ចំ ឧប្បជ្ជតិ តស្ស សមុទយសច្ចំ ឧប្បជ្ជិត្ថាតិ? អាមន្តា.

(ខ) យស្ស វា បន សមុទយសច្ចំ ឧប្បជ្ជិត្ថ តស្ស ទុក្ខសច្ចំ ឧប្បជ្ជតីតិ?

សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ សមុទយសច្ចំ ឧប្បជ្ជិត្ថ, នោ ច តេសំ ទុក្ខសច្ចំ ឧប្បជ្ជតិ. សព្ពេសំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ សមុទយសច្ចញ្ច ឧប្បជ្ជិត្ថ ទុក្ខសច្ចញ្ច ឧប្បជ្ជតិ.

(ក) យស្ស ទុក្ខសច្ចំ ឧប្បជ្ជតិ តស្ស មគ្គសច្ចំ ឧប្បជ្ជិត្ថាតិ? អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ ទុក្ខសច្ចំ ឧប្បជ្ជតិ, នោ ច តេសំ មគ្គសច្ចំ ឧប្បជ្ជិត្ថ. អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ ទុក្ខសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជិត្ថ.

(ខ) យស្ស វា បន មគ្គសច្ចំ ឧប្បជ្ជិត្ថ តស្ស ទុក្ខសច្ចំ ឧប្បជ្ជតីតិ?

អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ មគ្គសច្ចំ ឧប្បជ្ជិត្ថ, នោ ច តេសំ ទុក្ខសច្ចំ ឧប្បជ្ជតិ. អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ មគ្គសច្ចញ្ច ឧប្បជ្ជិត្ថ ទុក្ខសច្ចញ្ច ឧប្បជ្ជតិ.

៥៩. (ក) យស្ស សមុទយសច្ចំ ឧប្បជ្ជតិ តស្ស មគ្គសច្ចំ ឧប្បជ្ជិត្ថាតិ?

អនភិសមេតាវីនំ តណ្ហាយ ឧប្បាទក្ខណេ តេសំ សមុទយសច្ចំ ឧប្បជ្ជតិ, នោ ច តេសំ មគ្គសច្ចំ ឧប្បជ្ជិត្ថ. អភិសមេតាវីនំ តណ្ហាយ ឧប្បាទក្ខណេ តេសំ សមុទយសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជិត្ថ.

(ខ) យស្ស វា បន មគ្គសច្ចំ ឧប្បជ្ជិត្ថ តស្ស សមុទយសច្ចំ ឧប្បជ្ជតីតិ?

អភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ និរោធសមាបន្នានំ តេសំ មគ្គសច្ចំ ឧប្បជ្ជិត្ថ, នោ ច តេសំ សមុទយសច្ចំ ឧប្បជ្ជតិ. អភិសមេតាវីនំ តណ្ហាយ ឧប្បាទក្ខណេ តេសំ មគ្គសច្ចញ្ច ឧប្បជ្ជិត្ថ សមុទយសច្ចញ្ច ឧប្បជ្ជតិ.

(ខ) អនុលោមឱកាសោ

៦០. យត្ថ ទុក្ខសច្ចំ ឧប្បជ្ជតិ…បេ… (យត្ថកា សទិសា សព្ពេ).

(គ) អនុលោមបុគ្គលោកាសា

៦១. (ក) យស្ស យត្ថ ទុក្ខសច្ចំ ឧប្បជ្ជតិ តស្ស តត្ថ សមុទយសច្ចំ ឧប្បជ្ជិត្ថាតិ?

សុទ្ធាវាសានំ ឧបបត្តិចិត្តស្ស [ឧប្បត្តិចិត្តស្ស (ស្យា.)] ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ ទុក្ខសច្ចំ ឧប្បជ្ជតិ, នោ ច តេសំ តត្ថ សមុទយសច្ចំ ឧប្បជ្ជិត្ថ. ឥតរេសំ ចតុវោការំ បញ្ចវោការំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ តត្ថ ទុក្ខសច្ចញ្ច ឧប្បជ្ជតិ សមុទយសច្ចញ្ច ឧប្បជ្ជិត្ថ.

(ខ) យស្ស វា បន យត្ថ សមុទយសច្ចំ ឧប្បជ្ជិត្ថ តស្ស តត្ថ ទុក្ខសច្ចំ ឧប្បជ្ជតីតិ?

ចតុវោការា បញ្ចវោការា ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ តត្ថ សមុទយសច្ចំ ឧប្បជ្ជិត្ថ, នោ ច តេសំ តត្ថ ទុក្ខសច្ចំ ឧប្បជ្ជតិ. ចតុវោការំ បញ្ចវោការំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ តត្ថ សមុទយសច្ចញ្ច ឧប្បជ្ជិត្ថ ទុក្ខសច្ចញ្ច ឧប្បជ្ជតិ.

(ក) យស្ស យត្ថ ទុក្ខសច្ចំ ឧប្បជ្ជតិ តស្ស តត្ថ មគ្គសច្ចំ ឧប្បជ្ជិត្ថាតិ?

សុទ្ធាវាសានំ ឧបបត្តិចិត្តស្ស ឧប្បាទក្ខណេ អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ ទុក្ខសច្ចំ ឧប្បជ្ជតិ, នោ ច តេសំ តត្ថ មគ្គសច្ចំ ឧប្បជ្ជិត្ថ. អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ តត្ថ ទុក្ខសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជិត្ថ.

(ខ) យស្ស វា បន យត្ថ មគ្គសច្ចំ ឧប្បជ្ជិត្ថ តស្ស តត្ថ ទុក្ខសច្ចំ ឧប្បជ្ជតីតិ?

អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ តត្ថ មគ្គសច្ចំ ឧប្បជ្ជិត្ថ, នោ ច តេសំ តត្ថ ទុក្ខសច្ចំ ឧប្បជ្ជតិ. អភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ តត្ថ មគ្គសច្ចញ្ច ឧប្បជ្ជិត្ថ ទុក្ខសច្ចញ្ច ឧប្បជ្ជតិ.

៦២. (ក) យស្ស យត្ថ សមុទយសច្ចំ ឧប្បជ្ជតិ តស្ស តត្ថ មគ្គសច្ចំ ឧប្បជ្ជិត្ថាតិ?

អនភិសមេតាវីនំ តណ្ហាយ ឧប្បាទក្ខណេ តេសំ តត្ថ សមុទយសច្ចំ ឧប្បជ្ជតិ, នោ ច តេសំ តត្ថ មគ្គសច្ចំ ឧប្បជ្ជិត្ថ. អភិសមេតាវីនំ តណ្ហាយ ឧប្បាទក្ខណេ តេសំ តត្ថ សមុទយសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជិត្ថ.

(ខ) យស្ស វា បន យត្ថ មគ្គសច្ចំ ឧប្បជ្ជិត្ថ តស្ស តត្ថ សមុទយសច្ចំ ឧប្បជ្ជតីតិ?

អភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ តេសំ តត្ថ មគ្គសច្ចំ ឧប្បជ្ជិត្ថ, នោ ច តេសំ តត្ថ សមុទយសច្ចំ ឧប្បជ្ជតិ. អភិសមេតាវីនំ តណ្ហាយ ឧប្បាទក្ខណេ តេសំ តត្ថ មគ្គសច្ចញ្ច ឧប្បជ្ជិត្ថ សមុទយសច្ចញ្ច ឧប្បជ្ជតិ.

(ឃ) បច្ចនីកបុគ្គលោ

៦៣. (ក) យស្ស ទុក្ខសច្ចំ នុប្បជ្ជតិ តស្ស សមុទយសច្ចំ នុប្បជ្ជិត្ថាតិ?

ឧប្បជ្ជិត្ថ.

(ខ) យស្ស វា បន សមុទយសច្ចំ នុប្បជ្ជិត្ថ តស្ស ទុក្ខសច្ចំ នុប្បជ្ជតីតិ? នត្ថិ.

(ក) យស្ស ទុក្ខសច្ចំ នុប្បជ្ជតិ តស្ស មគ្គសច្ចំ នុប្បជ្ជិត្ថាតិ?

អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ ទុក្ខសច្ចំ នុប្បជ្ជតិ, នោ ច តេសំ មគ្គសច្ចំ នុប្បជ្ជិត្ថ. អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ ទុក្ខសច្ចញ្ច នុប្បជ្ជតិ មគ្គសច្ចញ្ច នុប្បជ្ជិត្ថ.

(ខ) យស្ស វា បន មគ្គសច្ចំ នុប្បជ្ជិត្ថ តស្ស ទុក្ខសច្ចំ នុប្បជ្ជតីតិ?

អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ តេសំ មគ្គសច្ចំ នុប្បជ្ជិត្ថ, នោ ច តេសំ ទុក្ខសច្ចំ នុប្បជ្ជតិ. អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ តេសំ មគ្គសច្ចញ្ច នុប្បជ្ជិត្ថ ទុក្ខសច្ចញ្ច នុប្បជ្ជតិ.

៦៤. (ក) យស្ស សមុទយសច្ចំ នុប្បជ្ជតិ តស្ស មគ្គសច្ចំ នុប្បជ្ជិត្ថាតិ?

អភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ និរោធសមាបន្នានំ តេសំ សមុទយសច្ចំ នុប្បជ្ជតិ, នោ ច តេសំ មគ្គសច្ចំ នុប្បជ្ជិត្ថ. អនភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ សមុទយសច្ចញ្ច នុប្បជ្ជតិ មគ្គសច្ចញ្ច នុប្បជ្ជិត្ថ.

(ខ) យស្ស វា បន មគ្គសច្ចំ នុប្បជ្ជិត្ថ តស្ស សមុទយសច្ចំ នុប្បជ្ជតីតិ?

អនភិសមេតាវីនំ តណ្ហាយ ឧប្បាទក្ខណេ តេសំ មគ្គសច្ចំ នុប្បជ្ជិត្ថ, នោ ច តេសំ សមុទយសច្ចំ នុប្បជ្ជតិ. អនភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ មគ្គសច្ចញ្ច នុប្បជ្ជិត្ថ សមុទយសច្ចញ្ច នុប្បជ្ជតិ.

(ង) បច្ចនីកឱកាសោ

៦៥. យត្ថ ទុក្ខសច្ចំ នុប្បជ្ជតិ…បេ….

(ច) បច្ចនីកបុគ្គលោកាសា

៦៦. (ក) យស្ស យត្ថ ទុក្ខសច្ចំ នុប្បជ្ជតិ តស្ស តត្ថ សមុទយសច្ចំ នុប្បជ្ជិត្ថាតិ?

ចតុវោការា បញ្ចវោការា ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ តត្ថ ទុក្ខសច្ចំ នុប្បជ្ជតិ, នោ ច តេសំ តត្ថ សមុទយសច្ចំ នុប្បជ្ជិត្ថ. សុទ្ធាវាសានំ ឧបបត្តិចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ ទុក្ខសច្ចញ្ច នុប្បជ្ជតិ សមុទយសច្ចញ្ច នុប្បជ្ជិត្ថ.

(ខ) យស្ស វា បន យត្ថ សមុទយសច្ចំ នុប្បជ្ជិត្ថ តស្ស តត្ថ ទុក្ខសច្ចំ នុប្បជ្ជតីតិ?

សុទ្ធាវាសានំ ឧបបត្តិចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ សមុទយសច្ចំ នុប្បជ្ជិត្ថ, នោ ច តេសំ តត្ថ ទុក្ខសច្ចំ នុប្បជ្ជតិ. សុទ្ធាវាសានំ ឧបបត្តិចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ សមុទយសច្ចញ្ច នុប្បជ្ជិត្ថ ទុក្ខសច្ចញ្ច នុប្បជ្ជតិ.

(ក) យស្ស យត្ថ ទុក្ខសច្ចំ នុប្បជ្ជតិ តស្ស តត្ថ មគ្គសច្ចំ នុប្បជ្ជិត្ថាតិ?

អភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ តត្ថ ទុក្ខសច្ចំ នុប្បជ្ជតិ, នោ ច តេសំ តត្ថ មគ្គសច្ចំ នុប្បជ្ជិត្ថ. សុទ្ធាវាសានំ ឧបបត្តិចិត្តស្ស ភង្គក្ខណេ អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ ទុក្ខសច្ចញ្ច នុប្បជ្ជតិ មគ្គសច្ចញ្ច នុប្បជ្ជិត្ថ.

(ខ) យស្ស វា បន យត្ថ មគ្គសច្ចំ នុប្បជ្ជិត្ថ តស្ស តត្ថ ទុក្ខសច្ចំ នុប្បជ្ជតីតិ?

សុទ្ធាវាសានំ ឧបបត្តិចិត្តស្ស ឧប្បាទក្ខណេ អនភិសមេតាវីនំ ឧបបជ្ជន្តានំ បវត្តេ ចិត្តស្ស ឧប្បាទក្ខណេ អសញ្ញសត្តំ ឧបបជ្ជន្តានំ តេសំ តត្ថ មគ្គសច្ចំ នុប្បជ្ជិត្ថ, នោ ច តេសំ តត្ថ ទុក្ខសច្ចំ នុប្បជ្ជតិ. សុទ្ធាវាសានំ ឧបបត្តិចិត្តស្ស ភង្គក្ខណេ អនភិសមេតាវីនំ ចវន្តានំ បវត្តេ ចិត្តស្ស ភង្គក្ខណេ អសញ្ញសត្តា ចវន្តានំ តេសំ តត្ថ មគ្គសច្ចញ្ច នុប្បជ្ជិត្ថ ទុក្ខសច្ចញ្ច នុប្បជ្ជតិ.

៦៧. (ក) យស្ស យត្ថ សមុទយសច្ចំ នុប្បជ្ជតិ តស្ស តត្ថ មគ្គសច្ចំ នុប្បជ្ជិត្ថាតិ?

អភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ តេសំ តត្ថ សមុទយសច្ចំ នុប្បជ្ជតិ, នោ ច តេសំ តត្ថ មគ្គសច្ចំ នុប្បជ្ជិត្ថ. សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ តត្ថ សមុទយសច្ចញ្ច នុប្បជ្ជតិ មគ្គសច្ចញ្ច នុប្បជ្ជិត្ថ.

(ខ) យស្ស វា បន យត្ថ មគ្គសច្ចំ នុប្បជ្ជិត្ថ តស្ស តត្ថ សមុទយសច្ចំ នុប្បជ្ជតីតិ?

អនភិសមេតាវីនំ តណ្ហាយ ឧប្បាទក្ខណេ តេសំ តត្ថ មគ្គសច្ចំ នុប្បជ្ជិត្ថ, នោ ច តេសំ តត្ថ សមុទយសច្ចំ នុប្បជ្ជតិ. សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ តណ្ហាយ ភង្គក្ខណេ តណ្ហាវិប្បយុត្តចិត្តេ វត្តមានេ អសញ្ញសត្តានំ តេសំ តត្ថ មគ្គសច្ចញ្ច នុប្បជ្ជិត្ថ សមុទយសច្ចញ្ច នុប្បជ្ជតិ.