(២) អតីតវារោ

(ក) អនុលោមបុគ្គលោ

៣៨. (ក) យស្ស ទុក្ខសច្ចំ ឧប្បជ្ជិត្ថ តស្ស សមុទយសច្ចំ ឧប្បជ្ជិត្ថាតិ? អាមន្តា.

(ខ) យស្ស វា បន សមុទយសច្ចំ ឧប្បជ្ជិត្ថ តស្ស ទុក្ខសច្ចំ ឧប្បជ្ជិត្ថាតិ? អាមន្តា.

(ក) យស្ស ទុក្ខសច្ចំ ឧប្បជ្ជិត្ថ តស្ស មគ្គសច្ចំ ឧប្បជ្ជិត្ថាតិ?

អនភិសមេតាវីនំ តេសំ ទុក្ខសច្ចំ ឧប្បជ្ជិត្ថ, នោ ច តេសំ មគ្គសច្ចំ ឧប្បជ្ជិត្ថ. អភិសមេតាវីនំ តេសំ ទុក្ខសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិត្ថ.

(ខ) យស្ស វា បន…បេ… ឧប្បជ្ជិត្ថាតិ? អាមន្តា.

៣៩. (ក) យស្ស សមុទយសច្ចំ ឧប្បជ្ជិត្ថ តស្ស មគ្គសច្ចំ ឧប្បជ្ជិត្ថាតិ?

អនភិសមេតាវីនំ តេសំ សមុទយសច្ចំ ឧប្បជ្ជិត្ថ, នោ ច តេសំ មគ្គសច្ចំ ឧប្បជ្ជិត្ថ. អភិសមេតាវីនំ តេសំ សមុទយសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិត្ថ.

(ខ) យស្ស វា បន…បេ… ឧប្បជ្ជិត្ថាតិ? អាមន្តា.

(ខ) អនុលោមឱកាសោ

៤០. យត្ថ ទុក្ខសច្ចំ ឧប្បជ្ជិត្ថ…បេ….

(យត្ថកម្បិ សព្ពត្ថ សទិសំ. តន្តិនានាករណំ ហេដ្ឋា យត្ថកសទិសំ).

(គ) អនុលោមបុគ្គលោកាសា

៤១. (ក) យស្ស យត្ថ ទុក្ខសច្ចំ ឧប្បជ្ជិត្ថ តស្ស តត្ថ សមុទយសច្ចំ ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិត្ថ, នោ ច តេសំ តត្ថ សមុទយសច្ចំ ឧប្បជ្ជិត្ថ. ឥតរេសំ ចតុវោការានំ បញ្ចវោការានំ តេសំ តត្ថ ទុក្ខសច្ចញ្ច ឧប្បជ្ជិត្ថ សមុទយសច្ចញ្ច ឧប្បជ្ជិត្ថ.

(ខ) យស្ស វា បន យត្ថ…បេ… ឧប្បជ្ជិត្ថាតិ? អាមន្តា.

(ក) យស្ស យត្ថ ទុក្ខសច្ចំ ឧប្បជ្ជិត្ថ តស្ស តត្ថ មគ្គសច្ចំ ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ អសញ្ញសត្តានំ តេសំ តត្ថ ទុក្ខសច្ចំ ឧប្បជ្ជិត្ថ, នោ ច តេសំ តត្ថ មគ្គសច្ចំ ឧប្បជ្ជិត្ថ. អភិសមេតាវីនំ តេសំ តត្ថ ទុក្ខសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិត្ថ.

(ខ) យស្ស វា បន យត្ថ…បេ… ឧប្បជ្ជិត្ថាតិ? អាមន្តា.

៤២. (ក) យស្ស យត្ថ សមុទយសច្ចំ ឧប្បជ្ជិត្ថ តស្ស តត្ថ មគ្គសច្ចំ ឧប្បជ្ជិត្ថាតិ?

សុទ្ធាវាសានំ ទុតិយេ អកុសលេ ចិត្តេ វត្តមានេ អនភិសមេតាវីនំ តេសំ តត្ថ សមុទយសច្ចំ ឧប្បជ្ជិត្ថ, នោ ច តេសំ តត្ថ មគ្គសច្ចំ ឧប្បជ្ជិត្ថ. អភិសមេតាវីនំ តេសំ តត្ថ សមុទយសច្ចញ្ច ឧប្បជ្ជិត្ថ មគ្គសច្ចញ្ច ឧប្បជ្ជិត្ថ.

(ខ) យស្ស វា បន យត្ថ…បេ… ឧប្បជ្ជិត្ថាតិ? អាមន្តា.

(ឃ) បច្ចនីកបុគ្គលោ

៤៣. (ក) យស្ស ទុក្ខសច្ចំ នុប្បជ្ជិត្ថ តស្ស សមុទយសច្ចំ នុប្បជ្ជិត្ថាតិ? នត្ថិ.

(ខ) យស្ស វា បន…បេ… នុប្បជ្ជិត្ថាតិ? នត្ថិ.

(ក) យស្ស ទុក្ខសច្ចំ នុប្បជ្ជិត្ថ តស្ស មគ្គសច្ចំ នុប្បជ្ជិត្ថាតិ? នត្ថិ.

(ខ) យស្ស វា បន មគ្គសច្ចំ នុប្បជ្ជិត្ថ តស្ស ទុក្ខសច្ចំ នុប្បជ្ជិត្ថាតិ? ឧប្បជ្ជិត្ថ.

៤៤. (ក) យស្ស សមុទយសច្ចំ នុប្បជ្ជិត្ថ តស្ស មគ្គសច្ចំ នុប្បជ្ជិត្ថាតិ? នត្ថិ.

(ខ) យស្ស វា បន…បេ… នុប្បជ្ជិត្ថាតិ? ឧប្បជ្ជិត្ថ.

(ង) បច្ចនីកឱកាសោ

៤៥. យត្ថ ទុក្ខសច្ចំ នុប្បជ្ជិត្ថ…បេ….

(ច) បច្ចនីកបុគ្គលោកាសា

៤៦. (ក) យស្ស យត្ថ ទុក្ខសច្ចំ នុប្បជ្ជិត្ថ តស្ស តត្ថ សមុទយសច្ចំ នុប្បជ្ជិត្ថាតិ? អាមន្តា.

(ខ) យស្ស វា បន យត្ថ សមុទយសច្ចំ នុប្បជ្ជិត្ថ តស្ស តត្ថ ទុក្ខសច្ចំ នុប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ សមុទយសច្ចំ នុប្បជ្ជិត្ថ, នោ ច តេសំ តត្ថ ទុក្ខសច្ចំ នុប្បជ្ជិត្ថ. សុទ្ធាវាសំ ឧបបជ្ជន្តានំ តេសំ តត្ថ សមុទយសច្ចញ្ច នុប្បជ្ជិត្ថ ទុក្ខសច្ចញ្ច នុប្បជ្ជិត្ថ.

(ក) យស្ស យត្ថ ទុក្ខសច្ចំ នុប្បជ្ជិត្ថ តស្ស តត្ថ មគ្គសច្ចំ នុប្បជ្ជិត្ថាតិ? អាមន្តា.

(ខ) យស្ស វា បន យត្ថ មគ្គសច្ចំ នុប្បជ្ជិត្ថ តស្ស តត្ថ ទុក្ខសច្ចំ នុប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អនភិសមេតាវីនំ អសញ្ញសត្តានំ តេសំ តត្ថ មគ្គសច្ចំ នុប្បជ្ជិត្ថ, នោ ច តេសំ តត្ថ ទុក្ខសច្ចំ នុប្បជ្ជិត្ថ. សុទ្ធាវាសំ ឧបបជ្ជន្តានំ តេសំ តត្ថ មគ្គសច្ចញ្ច នុប្បជ្ជិត្ថ ទុក្ខសច្ចញ្ច នុប្បជ្ជិត្ថ.

៤៧. (ក) យស្ស យត្ថ សមុទយសច្ចំ នុប្បជ្ជិត្ថ តស្ស តត្ថ មគ្គសច្ចំ នុប្បជ្ជិត្ថាតិ? អាមន្តា.

(ខ) យស្ស វា បន យត្ថ មគ្គសច្ចំ នុប្បជ្ជិត្ថ តស្ស តត្ថ សមុទយសច្ចំ នុប្បជ្ជិត្ថាតិ?

សុទ្ធាវាសានំ ទុតិយេ អកុសលេ ចិត្តេ វត្តមានេ អនភិសមេតាវីនំ តេសំ តត្ថ មគ្គសច្ចំ នុប្បជ្ជិត្ថ, នោ ច តេសំ តត្ថ សមុទយសច្ចំ នុប្បជ្ជិត្ថ. សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ មគ្គសច្ចញ្ច នុប្បជ្ជិត្ថ សមុទយសច្ចញ្ច នុប្បជ្ជិត្ថ.