(១) បច្ចុប្បន្នវារោ

(ក) អនុលោមបុគ្គលោ

២៧. (ក) យស្ស ទុក្ខសច្ចំ ឧប្បជ្ជតិ តស្ស សមុទយសច្ចំ ឧប្បជ្ជតីតិ?

សព្ពេសំ ឧបបជ្ជន្តានំ បវត្តេ តណ្ហាវិប្បយុត្តចិត្តស្ស ឧប្បាទក្ខណេ តេសំ ទុក្ខសច្ចំ ឧប្បជ្ជតិ, នោ ច តេសំ សមុទយសច្ចំ ឧប្បជ្ជតិ. តណ្ហាយ ឧប្បាទក្ខណេ តេសំ ទុក្ខសច្ចញ្ច ឧប្បជ្ជតិ សមុទយសច្ចញ្ច ឧប្បជ្ជតិ.

(ខ) យស្ស វា បន សមុទយសច្ចំ ឧប្បជ្ជតិ តស្ស ទុក្ខសច្ចំ ឧប្បជ្ជតីតិ? អាមន្តា.

(ក) យស្ស ទុក្ខសច្ចំ ឧប្បជ្ជតិ តស្ស មគ្គសច្ចំ ឧប្បជ្ជតីតិ?

សព្ពេសំ ឧបបជ្ជន្តានំ បវត្តេ មគ្គវិប្បយុត្តចិត្តស្ស ឧប្បាទក្ខណេ តេសំ ទុក្ខសច្ចំ ឧប្បជ្ជតិ, នោ ច តេសំ មគ្គសច្ចំ ឧប្បជ្ជតិ. បញ្ចវោការេ មគ្គស្ស ឧប្បាទក្ខណេ តេសំ ទុក្ខសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជតិ.

(ខ) យស្ស វា បន មគ្គសច្ចំ ឧប្បជ្ជតិ តស្ស ទុក្ខសច្ចំ ឧប្បជ្ជតីតិ?

អរូបេ មគ្គស្ស ឧប្បាទក្ខណេ តេសំ មគ្គសច្ចំ ឧប្បជ្ជតិ, នោ ច តេសំ ទុក្ខសច្ចំ ឧប្បជ្ជតិ. បញ្ចវោការេ មគ្គស្ស ឧប្បាទក្ខណេ តេសំ មគ្គសច្ចញ្ច ឧប្បជ្ជតិ ទុក្ខសច្ចញ្ច ឧប្បជ្ជតិ.

២៨. (ក) យស្ស សមុទយសច្ចំ ឧប្បជ្ជតិ តស្ស មគ្គសច្ចំ ឧប្បជ្ជតីតិ? នោ.

(ខ) យស្ស វា បន មគ្គសច្ចំ ឧប្បជ្ជតិ តស្ស សមុទយសច្ចំ ឧប្បជ្ជតីតិ? នោ.

(ខ) អនុលោមឱកាសោ

២៩. (ក) យត្ថ ទុក្ខសច្ចំ ឧប្បជ្ជតិ តត្ថ សមុទយសច្ចំ ឧប្បជ្ជតីតិ?

អសញ្ញសត្តេ តត្ថ ទុក្ខសច្ចំ ឧប្បជ្ជតិ, នោ ច តត្ថ សមុទយសច្ចំ ឧប្បជ្ជតិ. ចតុវោការេ បញ្ចវោការេ តត្ថ ទុក្ខសច្ចញ្ច ឧប្បជ្ជតិ សមុទយសច្ចញ្ច ឧប្បជ្ជតិ.

(ខ) យត្ថ វា បន…បេ…? អាមន្តា.

(ក) យត្ថ ទុក្ខសច្ចំ ឧប្បជ្ជតិ តត្ថ មគ្គសច្ចំ ឧប្បជ្ជតីតិ?

អបាយេ អសញ្ញសត្តេ តត្ថ ទុក្ខសច្ចំ ឧប្បជ្ជតិ, នោ ច តត្ថ មគ្គសច្ចំ ឧប្បជ្ជតិ. អវសេសេ ចតុវោការេ បញ្ចវោការេ តត្ថ ទុក្ខសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជតិ.

(ខ) យត្ថ វា បន មគ្គសច្ចំ ឧប្បជ្ជតិ តត្ថ ទុក្ខសច្ចំ ឧប្បជ្ជតីតិ? អាមន្តា.

៣០. (ក) យត្ថ សមុទយសច្ចំ ឧប្បជ្ជតិ តត្ថ មគ្គសច្ចំ ឧប្បជ្ជតីតិ?

អបាយេ តត្ថ សមុទយសច្ចំ ឧប្បជ្ជតិ, នោ ច តត្ថ មគ្គសច្ចំ ឧប្បជ្ជតិ. អវសេសេ ចតុវោការេ បញ្ចវោការេ តត្ថ សមុទយសច្ចញ្ច ឧប្បជ្ជតិ មគ្គសច្ចញ្ច ឧប្បជ្ជតិ.

(ខ) យត្ថ វា បន…បេ…? អាមន្តា.

(គ) អនុលោមបុគ្គលោកាសា

៣១. យស្ស យត្ថ ទុក្ខសច្ចំ ឧប្បជ្ជតិ តស្ស តត្ថ សមុទយសច្ចំ ឧប្បជ្ជតីតិ?…បេ….

(យស្សកម្បិ យស្សយត្ថកម្បិ សទិសំ វិត្ថារេតព្ពំ).

(ឃ) បច្ចនីកបុគ្គលោ

៣២. (ក) យស្ស ទុក្ខសច្ចំ នុប្បជ្ជតិ តស្ស សមុទយសច្ចំ នុប្បជ្ជតីតិ? អាមន្តា.

(ខ) យស្ស វា បន សមុទយសច្ចំ នុប្បជ្ជតិ តស្ស ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ តណ្ហាវិប្បយុត្តចិត្តស្ស ឧប្បាទក្ខណេ តេសំ សមុទយសច្ចំ នុប្បជ្ជតិ, នោ ច តេសំ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ សមុទយសច្ចញ្ច នុប្បជ្ជតិ ទុក្ខសច្ចញ្ច នុប្បជ្ជតិ.

(ក) យស្ស ទុក្ខសច្ចំ នុប្បជ្ជតិ តស្ស មគ្គសច្ចំ នុប្បជ្ជតីតិ?

អរូបេ មគ្គស្ស ឧប្បាទក្ខណេ តេសំ ទុក្ខសច្ចំ នុប្បជ្ជតិ, នោ ច តេសំ មគ្គសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ ផលស្ស ឧប្បាទក្ខណេ តេសំ ទុក្ខសច្ចញ្ច នុប្បជ្ជតិ មគ្គសច្ចញ្ច នុប្បជ្ជតិ.

(ខ) យស្ស វា បន មគ្គសច្ចំ នុប្បជ្ជតិ តស្ស ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ មគ្គវិប្បយុត្តចិត្តស្ស ឧប្បាទក្ខណេ តេសំ មគ្គសច្ចំ នុប្បជ្ជតិ, នោ ច តេសំ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ ផលស្ស ឧប្បាទក្ខណេ តេសំ មគ្គសច្ចញ្ច នុប្បជ្ជតិ ទុក្ខសច្ចញ្ច នុប្បជ្ជតិ.

៣៣. (ក) យស្ស សមុទយសច្ចំ នុប្បជ្ជតិ តស្ស មគ្គសច្ចំ នុប្បជ្ជតីតិ?

មគ្គស្ស ឧប្បាទក្ខណេ តេសំ សមុទយសច្ចំ នុប្បជ្ជតិ, នោ ច តេសំ មគ្គសច្ចំ នុប្បជ្ជតិ. សព្ពេសំ ចិត្តស្ស ភង្គក្ខណេ តណ្ហាវិប្បយុត្តមគ្គវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ សមុទយសច្ចញ្ច នុប្បជ្ជតិ មគ្គសច្ចញ្ច នុប្បជ្ជតិ.

(ខ) យស្ស វា បន មគ្គសច្ចំ នុប្បជ្ជតិ តស្ស សមុទយសច្ចំ នុប្បជ្ជតីតិ?

តណ្ហាយ ឧប្បាទក្ខណេ តេសំ មគ្គសច្ចំ នុប្បជ្ជតិ, នោ ច តេសំ សមុទយសច្ចំ នុប្បជ្ជតិ. សព្ពេសំ ចិត្តស្ស ភង្គក្ខណេ មគ្គវិប្បយុត្តតណ្ហាវិប្បយុត្តចិត្តស្ស [តណ្ហាវិប្បយុត្តមគ្គវិប្បយុត្តចិត្តស្ស (សី.) ឯវំ បុគ្គលោកាសេបិ និរោធវារេបិ] ឧប្បាទក្ខណេ និរោធសមាបន្នានំ អសញ្ញសត្តានំ តេសំ មគ្គសច្ចញ្ច នុប្បជ្ជតិ សមុទយសច្ចញ្ច នុប្បជ្ជតិ.

(ង) បច្ចនីកឱកាសោ

៣៤. (ក) យត្ថ ទុក្ខសច្ចំ នុប្បជ្ជតិ តត្ថ សមុទយសច្ចំ នុប្បជ្ជតីតិ? នត្ថិ.

(ខ) យត្ថ វា បន សមុទយសច្ចំ នុប្បជ្ជតិ តត្ថ ទុក្ខសច្ចំ នុប្បជ្ជតីតិ? ឧប្បជ្ជតិ.

(ក) យត្ថ ទុក្ខសច្ចំ នុប្បជ្ជតិ តត្ថ មគ្គសច្ចំ នុប្បជ្ជតីតិ? នត្ថិ.

(ខ) យត្ថ វា បន មគ្គសច្ចំ នុប្បជ្ជតិ តត្ថ ទុក្ខសច្ចំ នុប្បជ្ជតីតិ? ឧប្បជ្ជតិ.

៣៥. (ក) យត្ថ សមុទយសច្ចំ នុប្បជ្ជតិ តត្ថ មគ្គសច្ចំ នុប្បជ្ជតីតិ? អាមន្តា.

(ខ) យត្ថ វា បន មគ្គសច្ចំ នុប្បជ្ជតិ តត្ថ សមុទយសច្ចំ នុប្បជ្ជតីតិ?

អបាយេ តត្ថ មគ្គសច្ចំ នុប្បជ្ជតិ, នោ ច តត្ថ សមុទយសច្ចំ នុប្បជ្ជតិ. អសញ្ញសត្តេ តត្ថ មគ្គសច្ចញ្ច នុប្បជ្ជតិ សមុទយសច្ចញ្ច នុប្បជ្ជតិ.

(ច) បច្ចនីកបុគ្គលោកាសា

៣៦. (ក) យស្ស យត្ថ ទុក្ខសច្ចំ នុប្បជ្ជតិ តស្ស តត្ថ សមុទយសច្ចំ នុប្បជ្ជតីតិ? អាមន្តា.

(ខ) យស្ស វា បន យត្ថ សមុទយសច្ចំ នុប្បជ្ជតិ តស្ស តត្ថ ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ តណ្ហាវិប្បយុត្តចិត្តស្ស ឧប្បាទក្ខណេ តេសំ តត្ថ សមុទយសច្ចំ នុប្បជ្ជតិ, នោ ច តេសំ តត្ថ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ មគ្គស្ស ច ផលស្ស ច ឧប្បាទក្ខណេ តេសំ តត្ថ សមុទយសច្ចញ្ច នុប្បជ្ជតិ ទុក្ខសច្ចញ្ច នុប្បជ្ជតិ.

(ក) យស្ស យត្ថ ទុក្ខសច្ចំ នុប្បជ្ជតិ តស្ស តត្ថ មគ្គសច្ចំ នុប្បជ្ជតីតិ?

អរូបេ មគ្គស្ស ឧប្បាទក្ខណេ តេសំ តត្ថ ទុក្ខសច្ចំ នុប្បជ្ជតិ, នោ ច តេសំ តត្ថ មគ្គសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ ផលស្ស ឧប្បាទក្ខណេ តេសំ តត្ថ ទុក្ខសច្ចញ្ច នុប្បជ្ជតិ មគ្គសច្ចញ្ច នុប្បជ្ជតិ.

(ខ) យស្ស វា បន យត្ថ មគ្គសច្ចំ នុប្បជ្ជតិ តស្ស តត្ថ ទុក្ខសច្ចំ នុប្បជ្ជតីតិ?

សព្ពេសំ ឧបបជ្ជន្តានំ បវត្តេ មគ្គវិប្បយុត្តចិត្តស្ស ឧប្បាទក្ខណេ តេសំ តត្ថ មគ្គសច្ចំ នុប្បជ្ជតិ, នោ ច តេសំ តត្ថ ទុក្ខសច្ចំ នុប្បជ្ជតិ. សព្ពេសំ ចវន្តានំ បវត្តេ ចិត្តស្ស ភង្គក្ខណេ អរូបេ ផលស្ស ឧប្បាទក្ខណេ តេសំ តត្ថ មគ្គសច្ចញ្ច នុប្បជ្ជតិ ទុក្ខសច្ចញ្ច នុប្បជ្ជតិ.

៣៧. (ក) យស្ស យត្ថ សមុទយសច្ចំ នុប្បជ្ជតិ តស្ស តត្ថ មគ្គសច្ចំ នុប្បជ្ជតីតិ?

មគ្គស្ស ឧប្បាទក្ខណេ តេសំ តត្ថ សមុទយសច្ចំ នុប្បជ្ជតិ, នោ ច តេសំ តត្ថ មគ្គសច្ចំ នុប្បជ្ជតិ. សព្ពេសំ ចិត្តស្ស ភង្គក្ខណេ តណ្ហាវិប្បយុត្តមគ្គវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ សមុទយសច្ចញ្ច នុប្បជ្ជតិ មគ្គសច្ចញ្ច នុប្បជ្ជតិ.

(ខ) យស្ស វា បន យត្ថ មគ្គសច្ចំ នុប្បជ្ជតិ តស្ស តត្ថ សមុទយសច្ចំ នុប្បជ្ជតីតិ?

តណ្ហាយ ឧប្បាទក្ខណេ តេសំ តត្ថ មគ្គសច្ចំ នុប្បជ្ជតិ, នោ ច តេសំ តត្ថ សមុទយសច្ចំ នុប្បជ្ជតិ. សព្ពេសំ ចិត្តស្ស ភង្គក្ខណេ មគ្គវិប្បយុត្តតណ្ហាវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ មគ្គសច្ចញ្ច នុប្បជ្ជតិ សមុទយសច្ចញ្ច នុប្បជ្ជតិ.