១. បទសោធនវារោ

(ក) អនុលោមំ

១០. (ក) ចក្ខុ ចក្ខុធាតូតិ?

ទិព្ពចក្ខុ បញ្ញាចក្ខុ ចក្ខុ, ន ចក្ខុធាតុ. ចក្ខុធាតុ ចក្ខុ ចេវ ចក្ខុធាតុ ច.

(ខ) ចក្ខុធាតុ ចក្ខូតិ? អាមន្តា.

(ក) សោតំ សោតធាតូតិ?

ទិព្ពសោតំ តណ្ហាសោតំ សោតំ, ន សោតធាតុ. សោតធាតុ សោតញ្ចេវ សោតធាតុ ច.

(ខ) សោតធាតុ សោតន្តិ? អាមន្តា.

(ក) ឃានំ ឃានធាតូតិ? អាមន្តា.

(ខ) ឃានធាតុ ឃានន្តិ? អាមន្តា. (ជិវ្ហាបិ ឃានធាតុសទិសា).

(ក) កាយោ កាយធាតូតិ?

កាយធាតុំ ឋបេត្វា អវសេសោ កាយោ [អវសេសោ កាយោ កាយោ (ស្យា.)], ន កាយធាតុ. កាយធាតុ កាយោ ចេវ កាយធាតុ ច.

(ខ) កាយធាតុ កាយោតិ? អាមន្តា.

(ក) រូបំ រូបធាតូតិ?

រូបធាតុំ ឋបេត្វា អវសេសំ រូបំ, ន រូបធាតុ. រូបធាតុ រូបញ្ចេវ រូបធាតុ ច.

(ខ) រូបធាតុ រូបន្តិ? អាមន្តា. (សទ្ទោ ឃានសទិសោ).

(ក) គន្ធោ គន្ធធាតូតិ?

សីលគន្ធោ សមាធិគន្ធោ បញ្ញាគន្ធោ គន្ធោ, ន គន្ធធាតុ. គន្ធធាតុ គន្ធោ ចេវ គន្ធធាតុ ច.

(ខ) គន្ធធាតុ គន្ធោតិ? អាមន្តា.

(ក) រសោ រសធាតូតិ?

អត្ថរសោ ធម្មរសោ វិមុត្តិរសោ រសោ, ន រសធាតុ. រសធាតុ រសោ ចេវ រសធាតុ ច.

(ខ) រសធាតុ រសោតិ? អាមន្តា. (ផោដ្ឋព្ពោ ឃានសទិសោ).

(ក) ចក្ខុវិញ្ញាណំ ចក្ខុវិញ្ញាណធាតូតិ? អាមន្តា.

(ខ) ចក្ខុវិញ្ញាណធាតុ ចក្ខុវិញ្ញាណន្តិ? អាមន្តា.

សោតវិញ្ញាណំ…បេ… ឃានវិញ្ញាណំ… ជិវ្ហាវិញ្ញាណំ… កាយវិញ្ញាណំ….

(ក) មនោ មនោធាតូតិ?

មនោធាតុំ ឋបេត្វា អវសេសោ មនោ, ន មនោធាតុ. មនោធាតុ មនោ ចេវ មនោធាតុ ច.

(ខ) មនោធាតុ មនោតិ? អាមន្តា.

(ក) មនោវិញ្ញាណំ មនោវិញ្ញាណធាតូតិ? អាមន្តា.

(ខ) មនោវិញ្ញាណធាតុ មនោវិញ្ញាណន្តិ? អាមន្តា.

(ក) ធម្មោ ធម្មធាតូតិ?

ធម្មធាតុំ ឋបេត្វា អវសេសោ ធម្មោ, ន ធម្មធាតុ. ធម្មធាតុ ធម្មោ ចេវ ធម្មធាតុ ច.

(ខ) ធម្មធាតុ ធម្មោតិ? អាមន្តា.

(ខ) បច្ចនីកំ

១១. (ក) ន ចក្ខុ ន ចក្ខុធាតូតិ? អាមន្តា.

(ខ) ន ចក្ខុធាតុ ន ចក្ខូតិ?

ទិព្ពចក្ខុ បញ្ញាចក្ខុ ន ចក្ខុធាតុ, ចក្ខុ. ចក្ខុញ្ច ចក្ខុធាតុញ្ច ឋបេត្វា អវសេសំ ន ចេវ ចក្ខុ ន ច ចក្ខុធាតុ.

(ក) ន សោតំ ន សោតធាតូតិ? អាមន្តា.

(ខ) ន សោតធាតុ ន សោតន្តិ?

ទិព្ពសោតំ តណ្ហាសោតំ ន សោតធាតុ, សោតំ. សោតញ្ច សោតធាតុញ្ច ឋបេត្វា អវសេសំ ន ចេវ សោតំ ន ច សោតធាតុ.

(ក) ន ឃានំ ន ឃានធាតូតិ? អាមន្តា.

(ខ) ន ឃានធាតុ ន ឃានន្តិ? អាមន្តា.

ន ជិវ្ហា… (សំខិត្តំ [យំ សំខិត្តំ (ស្យា.)], ឧភតោ អាមន្តា).

(ក) ន កាយោ ន កាយធាតូតិ? អាមន្តា.

(ខ) ន កាយធាតុ ន កាយោតិ?

កាយធាតុំ ឋបេត្វា អវសេសោ ន កាយធាតុ, កាយោ. កាយញ្ច កាយធាតុញ្ច ឋបេត្វា អវសេសោ [អវសេសោ កាយោ (ស្យា.)] ន ចេវ កាយោ ន ច កាយធាតុ.

(ក) ន រូបំ ន រូបធាតូតិ? អាមន្តា.

(ខ) ន រូបធាតុ ន រូបន្តិ?

រូបធាតុំ ឋបេត្វា អវសេសំ ន រូបធាតុ, រូបំ. រូបញ្ច រូបធាតុញ្ច ឋបេត្វា អវសេសំ ន ចេវ រូបំ ន ច រូបធាតុ.

ន សទ្ទោ…បេ… ន គន្ធោ ន គន្ធធាតូតិ? អាមន្តា.

ន គន្ធធាតុ ន គន្ធោតិ?

សីលគន្ធោ សមាធិគន្ធោ បញ្ញាគន្ធោ ន គន្ធធាតុ, គន្ធោ. គន្ធញ្ច គន្ធធាតុញ្ច ឋបេត្វា អវសេសោ ន ចេវ គន្ធោ ន ច គន្ធធាតុ.

(ក) ន រសោ ន រសធាតូតិ? អាមន្តា.

(ខ) ន រសធាតុ ន រសោតិ?

អត្ថរសោ ធម្មរសោ វិមុត្តិរសោ ន រសធាតុ, រសោ. រសញ្ច រសធាតុញ្ច ឋបេត្វា អវសេសោ ន ចេវ រសោ ន ច រសធាតុ.

ន ផោដ្ឋព្ពោ…បេ… ន ចក្ខុវិញ្ញាណំ ន ចក្ខុវិញ្ញាណធាតូតិ? អាមន្តា.

ន ចក្ខុវិញ្ញាណធាតុ ន ចក្ខុវិញ្ញាណន្តិ? អាមន្តា.

ន សោតវិញ្ញាណំ…បេ… ន ឃានវិញ្ញាណំ… ន ជិវ្ហាវិញ្ញាណំ… ន កាយវិញ្ញាណំ….

(ក) ន មនោ ន មនោធាតូតិ? អាមន្តា.

(ខ) ន មនោធាតុ ន មនោតិ?

មនោធាតុំ ឋបេត្វា អវសេសោ ន មនោធាតុ, មនោ. មនញ្ច មនោធាតុញ្ច ឋបេត្វា អវសេសោ ន ចេវ មនោ ន ច មនោធាតុ.

(ក) ន មនោវិញ្ញាណំ ន មនោវិញ្ញាណធាតូតិ? អាមន្តា.

(ខ) ន មនោវិញ្ញាណធាតុ ន មនោវិញ្ញាណន្តិ? អាមន្តា.

(ក) ន ធម្មោ ន ធម្មធាតូតិ? អាមន្តា.

(ខ) ន ធម្មធាតុ ន ធម្មោតិ?

ធម្មធាតុំ ឋបេត្វា អវសេសោ ន ធម្មធាតុ, ធម្មោ. ធម្មញ្ច ធម្មធាតុញ្ច ឋបេត្វា អវសេសោ ន ចេវ ធម្មោ ន ច ធម្មធាតុ.