១. បទសោធនវារោ

(ក) អនុលោមំ

១០. (ក) ចក្ខុ ចក្ខាយតនន្តិ?

ទិព្ពចក្ខុ បញ្ញាចក្ខុ ចក្ខុ, ន ចក្ខាយតនំ. ចក្ខាយតនំ ចក្ខុ ចេវ ចក្ខាយតនញ្ច.

(ខ) ចក្ខាយតនំ ចក្ខូតិ? អាមន្តា.

(ក) សោតំ សោតាយតនន្តិ?

ទិព្ពសោតំ តណ្ហាសោតំ សោតំ, ន សោតាយតនំ. សោតាយតនំ សោតញ្ចេវ សោតាយតនញ្ច.

(ខ) សោតាយតនំ សោតន្តិ? អាមន្តា.

(ក) ឃានំ ឃានាយតនន្តិ? អាមន្តា.

(ខ) ឃានាយតនំ ឃានន្តិ? អាមន្តា.

(ក) ជិវ្ហា ជិវ្ហាយតនន្តិ? អាមន្តា.

(ខ) ជិវ្ហាយតនំ ជិវ្ហាតិ? អាមន្តា.

(ក) កាយោ កាយាយតនន្តិ?

កាយាយតនំ ឋបេត្វា អវសេសោ កាយោ, ន កាយាយតនំ. កាយាយតនំ កាយោ ចេវ កាយាយតនញ្ច.

(ខ) កាយាយតនំ កាយោតិ? អាមន្តា.

(ក) រូបំ រូបាយតនន្តិ?

រូបាយតនំ ឋបេត្វា អវសេសំ រូបំ, ន រូបាយតនំ. រូបាយតនំ រូបញ្ចេវ រូបាយតនញ្ច.

(ខ) រូបាយតនំ រូបន្តិ? អាមន្តា.

(ក) សទ្ទោ សទ្ទាយតនន្តិ? អាមន្តា.

(ខ) សទ្ទាយតនំ សទ្ទោតិ? អាមន្តា.

(ក) គន្ធោ គន្ធាយតនន្តិ?

សីលគន្ធោ សមាធិគន្ធោ បញ្ញាគន្ធោ គន្ធោ, ន គន្ធាយតនំ. គន្ធាយតនំ គន្ធោ ចេវ គន្ធាយតនញ្ច.

(ខ) គន្ធាយតនំ គន្ធោតិ? អាមន្តា.

(ក) រសោ រសាយតនន្តិ?

អត្ថរសោ ធម្មរសោ វិមុត្តិរសោ រសោ, ន រសាយតនំ. រសាយតនំ រសោ ចេវ រសាយតនញ្ច.

(ខ) រសាយតនំ រសោតិ? អាមន្តា.

(ក) ផោដ្ឋព្ពោ ផោដ្ឋព្ពាយតនន្តិ? អាមន្តា.

(ខ) ផោដ្ឋព្ពាយតនំ ផោដ្ឋព្ពោតិ? អាមន្តា.

(ក) មនោ មនាយតនន្តិ? អាមន្តា.

(ខ) មនាយតនំ មនោតិ? អាមន្តា.

(ក) ធម្មោ ធម្មាយតនន្តិ?

ធម្មាយតនំ ឋបេត្វា អវសេសោ ធម្មោ, ន ធម្មាយតនំ. ធម្មាយតនំ ធម្មោ ចេវ ធម្មាយតនញ្ច.

(ខ) ធម្មាយតនំ ធម្មោតិ? អាមន្តា.

(ខ) បច្ចនីកំ

១១. (ក) ន ចក្ខុ ន ចក្ខាយតនន្តិ? អាមន្តា.

(ខ) ន ចក្ខាយតនំ ន ចក្ខូតិ?

ទិព្ពចក្ខុ បញ្ញាចក្ខុ ន ចក្ខាយតនំ, ចក្ខុ. ចក្ខុញ្ច ចក្ខាយតនញ្ច ឋបេត្វា អវសេសំ [អវសេសា (ស្យា. បី.)] ន ចេវ ចក្ខុ ន ច ចក្ខាយតនំ.

(ក) ន សោតំ ន សោតាយតនន្តិ? អាមន្តា.

(ខ) ន សោតាយតនំ ន សោតន្តិ?

ទិព្ពសោតំ តណ្ហាសោតំ ន សោតាយតនំ, សោតំ. សោតញ្ច សោតាយតនញ្ច ឋបេត្វា អវសេសំ ន ចេវ សោតំ ន ច សោតាយតនំ.

(ក) ន ឃានំ ន ឃានាយតនន្តិ? អាមន្តា.

(ខ) ន ឃានាយតនំ ន ឃានន្តិ? អាមន្តា.

(ក) ន ជិវ្ហា ន ជិវ្ហាយតនន្តិ? អាមន្តា.

(ខ) ន ជិវ្ហាយតនំ ន ជិវ្ហាតិ? អាមន្តា.

(ក) ន កាយោ ន កាយាយតនន្តិ? អាមន្តា.

(ខ) ន កាយាយតនំ ន កាយោតិ?

កាយាយតនំ ឋបេត្វា អវសេសោ ន កាយាយតនំ, កាយោ. កាយញ្ច កាយាយតនញ្ច ឋបេត្វា អវសេសំ [អវសេសោ (ស្យា.)] ន ចេវ កាយោ ន ច កាយាយតនំ.

(ក) ន រូបំ ន រូបាយតនន្តិ? អាមន្តា.

(ខ) ន រូបាយតនំ ន រូបន្តិ?

រូបាយតនំ ឋបេត្វា អវសេសំ ន រូបាយតនំ, រូបំ. រូបញ្ច រូបាយតនញ្ច ឋបេត្វា អវសេសំ ន ចេវ រូបំ ន ច រូបាយតនំ.

(ក) ន សទ្ទោ ន សទ្ទាយតនន្តិ? អាមន្តា.

(ខ) ន សទ្ទាយតនំ ន សទ្ទោតិ? អាមន្តា.

(ក) ន គន្ធោ ន គន្ធាយតនន្តិ? អាមន្តា.

(ខ) ន គន្ធាយតនំ ន គន្ធោតិ?

សីលគន្ធោ សមាធិគន្ធោ បញ្ញាគន្ធោ ន គន្ធាយតនំ, គន្ធោ. គន្ធញ្ច គន្ធាយតនញ្ច ឋបេត្វា អវសេសំ [អវសេសា (ស្យា.)] ន ចេវ គន្ធោ ន ច គន្ធាយតនំ.

(ក) ន រសោ ន រសាយតនន្តិ? អាមន្តា.

(ខ) ន រសាយតនំ ន រសោតិ?

អត្ថរសោ ធម្មរសោ វិមុត្តិរសោ ន រសាយតនំ, រសោ. រសញ្ច រសាយតនញ្ច ឋបេត្វា អវសេសំ ន ចេវ រសោ ន ច រសាយតនំ.

(ក) ន ផោដ្ឋព្ពោ ន ផោដ្ឋព្ពាយតនន្តិ? អាមន្តា.

(ខ) ន ផោដ្ឋព្ពាយតនំ ន ផោដ្ឋព្ពោតិ? អាមន្តា.

(ក) ន មនោ ន មនាយតនន្តិ? អាមន្តា.

(ខ) ន មនាយតនំ ន មនោតិ? អាមន្តា.

(ក) ន ធម្មោ ន ធម្មាយតនន្តិ? អាមន្តា.

(ខ) ន ធម្មាយតនំ ន ធម្មោតិ?

ធម្មាយតនំ ឋបេត្វា អវសេសោ ន ធម្មាយតនំ, ធម្មោ. ធម្មញ្ច ធម្មាយតនញ្ច ឋបេត្វា អវសេសំ ន ចេវ ធម្មោ ន ច ធម្មាយតនំ.