៥. បច្ចុប្បន្នានាគតវារោ

២៥៣. (ក) យោ ចក្ខាយតនំ បរិជានាតិ សោ សោតាយតនំ បរិជានិស្សតីតិ? នោ.

(ខ) យោ វា បន សោតាយតនំ បរិជានិស្សតិ សោ ចក្ខាយតនំ បរិជានាតីតិ? នោ.

(ក) យោ ចក្ខាយតនំ ន បរិជានាតិ សោ សោតាយតនំ ន បរិជានិស្សតីតិ?

យេ មគ្គំ បដិលភិស្សន្តិ តេ ចក្ខាយតនំ ន បរិជានន្តិ, នោ ច សោតាយតនំ ន បរិជានិស្សន្តិ. អរហា យេ ច បុថុជ្ជនា មគ្គំ ន បដិលភិស្សន្តិ តេ ចក្ខាយតនញ្ច ន បរិជានន្តិ សោតាយតនញ្ច ន បរិជានិស្សន្តិ.

(ខ) យោ វា បន សោតាយតនំ ន បរិជានិស្សតិ សោ ចក្ខាយតនំ ន បរិជានាតីតិ?

អគ្គមគ្គសមង្គី សោតាយតនំ ន បរិជានិស្សតិ, នោ ច ចក្ខាយតនំ ន បរិជានាតិ. អរហា យេ ច បុថុជ្ជនា មគ្គំ ន បដិលភិស្សន្តិ តេ សោតាយតនញ្ច ន បរិជានិស្សន្តិ ចក្ខាយតនញ្ច ន បរិជានន្តិ.