៤. បច្ចុប្បន្នាតីតវារោ

២៥២. (ក) យោ ចក្ខាយតនំ បរិជានាតិ សោ សោតាយតនំ បរិជានិត្ថាតិ? នោ.

(ខ) យោ វា បន សោតាយតនំ បរិជានិត្ថ សោ ចក្ខាយតនំ បរិជានាតីតិ? នោ.

(ក) យោ ចក្ខាយតនំ ន បរិជានាតិ សោ សោតាយតនំ ន បរិជានិត្ថាតិ?

អរហា ចក្ខាយតនំ ន បរិជានាតិ, នោ ច សោតាយតនំ ន បរិជានិត្ថ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា ចក្ខាយតនញ្ច ន បរិជានន្តិ សោតាយតនញ្ច ន បរិជានិត្ថ.

(ខ) យោ វា បន សោតាយតនំ ន បរិជានិត្ថ សោ ចក្ខាយតនំ ន បរិជានាតីតិ?

អគ្គមគ្គសមង្គី សោតាយតនំ ន បរិជានិត្ថ, នោ ច ចក្ខាយតនំ ន បរិជានាតិ. អគ្គមគ្គសមង្គិញ្ច អរហន្តញ្ច ឋបេត្វា អវសេសា បុគ្គលា សោតាយតនញ្ច ន បរិជានិត្ថ ចក្ខាយតនញ្ច ន បរិជានន្តិ.