៥. បច្ចុប្បន្នានាគតវារោ

២១០. (ក) យោ រូបក្ខន្ធំ បរិជានាតិ សោ វេទនាក្ខន្ធំ បរិជានិស្សតីតិ? នោ.

(ខ) យោ វា បន វេទនាក្ខន្ធំ បរិជានិស្សតិ សោ រូបក្ខន្ធំ បរិជានាតីតិ? នោ.

(ក) យោ រូបក្ខន្ធំ ន បរិជានាតិ សោ វេទនាក្ខន្ធំ ន បរិជានិស្សតីតិ?

យេ មគ្គំ បដិលភិស្សន្តិ តេ រូបក្ខន្ធំ ន បរិជានន្តិ, នោ ច វេទនាក្ខន្ធំ ន បរិជានិស្សន្តិ. អរហា យេ ច បុថុជ្ជនា មគ្គំ ន បដិលភិស្សន្តិ តេ រូបក្ខន្ធញ្ច ន បរិជានន្តិ វេទនាក្ខន្ធញ្ច ន បរិជានិស្សន្តិ.

(ខ) យោ វា បន វេទនាក្ខន្ធំ ន បរិជានិស្សតិ សោ រូបក្ខន្ធំ ន បរិជានាតីតិ?

អគ្គមគ្គសមង្គី វេទនាក្ខន្ធំ ន បរិជានិស្សតិ, នោ ច រូបក្ខន្ធំ ន បរិជានាតិ. អរហា យេ ច បុថុជ្ជនា មគ្គំ ន បដិលភិស្សន្តិ តេ វេទនាក្ខន្ធញ្ច ន បរិជានិស្សន្តិ រូបក្ខន្ធញ្ច ន បរិជានន្តិ.