(១) បច្ចុប្បន្នវារោ

(ក) អនុលោមបុគ្គលោ

១៥៣. (ក) យស្ស រូបក្ខន្ធោ ឧប្បជ្ជតិ តស្ស វេទនាក្ខន្ធោ និរុជ្ឈតីតិ? នោ.

(ខ) យស្ស វា បន វេទនាក្ខន្ធោ និរុជ្ឈតិ តស្ស រូបក្ខន្ធោ ឧប្បជ្ជតីតិ? នោ.

១៥៤. (ក) យស្ស វេទនាក្ខន្ធោ ឧប្បជ្ជតិ តស្ស សញ្ញាក្ខន្ធោ និរុជ្ឈតីតិ? នោ.

(ខ) យស្ស វា បន សញ្ញាក្ខន្ធោ និរុជ្ឈតិ តស្ស វេទនាក្ខន្ធោ ឧប្បជ្ជតីតិ? នោ.

(ខ) អនុលោមឱកាសោ

១៥៥. (ក) យត្ថ រូបក្ខន្ធោ ឧប្បជ្ជតិ តត្ថ វេទនាក្ខន្ធោ និរុជ្ឈតីតិ?

អសញ្ញសត្តេ តត្ថ រូបក្ខន្ធោ ឧប្បជ្ជតិ, នោ ច តត្ថ វេទនាក្ខន្ធោ និរុជ្ឈតិ. បញ្ចវោការេ តត្ថ រូបក្ខន្ធោ ច ឧប្បជ្ជតិ វេទនាក្ខន្ធោ ច និរុជ្ឈតិ.

(ខ) យត្ថ វា បន វេទនាក្ខន្ធោ និរុជ្ឈតិ តត្ថ រូបក្ខន្ធោ ឧប្បជ្ជតីតិ?

អរូបេ តត្ថ វេទនាក្ខន្ធោ និរុជ្ឈតិ, នោ ច តត្ថ រូបក្ខន្ធោ ឧប្បជ្ជតិ. បញ្ចវោការេ តត្ថ វេទនាក្ខន្ធោ ច និរុជ្ឈតិ រូបក្ខន្ធោ ច ឧប្បជ្ជតិ.

១៥៦. (ក) យត្ថ វេទនាក្ខន្ធោ ឧប្បជ្ជតិ តត្ថ សញ្ញាក្ខន្ធោ និរុជ្ឈតីតិ? អាមន្តា.

(ខ) យត្ថ វា បន សញ្ញាក្ខន្ធោ និរុជ្ឈតិ តត្ថ វេទនាក្ខន្ធោ ឧប្បជ្ជតីតិ? អាមន្តា.

(គ) អនុលោមបុគ្គលោកាសា

១៥៧. (ក) យស្ស យត្ថ រូបក្ខន្ធោ ឧប្បជ្ជតិ តស្ស តត្ថ វេទនាក្ខន្ធោ និរុជ្ឈតីតិ? នោ.

(ខ) យស្ស វា បន យត្ថ វេទនាក្ខន្ធោ និរុជ្ឈតិ តស្ស តត្ថ រូបក្ខន្ធោ ឧប្បជ្ជតីតិ? នោ.

១៥៨. (ក) យស្ស យត្ថ វេទនាក្ខន្ធោ ឧប្បជ្ជតិ តស្ស តត្ថ សញ្ញាក្ខន្ធោ និរុជ្ឈតីតិ? នោ.

(ខ) យស្ស វា បន យត្ថ សញ្ញាក្ខន្ធោ និរុជ្ឈតិ តស្ស តត្ថ វេទនាក្ខន្ធោ ឧប្បជ្ជតីតិ? នោ.

(ឃ) បច្ចនីកបុគ្គលោ

១៥៩. (ក) យស្ស រូបក្ខន្ធោ នុប្បជ្ជតិ តស្ស វេទនាក្ខន្ធោ ន និរុជ្ឈតីតិ?

ចតុវោការា បញ្ចវោការា ចវន្តានំ តេសំ រូបក្ខន្ធោ នុប្បជ្ជតិ, នោ ច តេសំ វេទនាក្ខន្ធោ ន និរុជ្ឈតិ. អរូបំ ឧបបជ្ជន្តានំ អសញ្ញសត្តា ចវន្តានំ តេសំ រូបក្ខន្ធោ ច នុប្បជ្ជតិ វេទនាក្ខន្ធោ ច ន និរុជ្ឈតិ.

(ខ) យស្ស វា បន វេទនាក្ខន្ធោ ន និរុជ្ឈតិ តស្ស រូបក្ខន្ធោ នុប្បជ្ជតីតិ?

បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ វេទនាក្ខន្ធោ ន និរុជ្ឈតិ, នោ ច តេសំ រូបក្ខន្ធោ នុប្បជ្ជតិ. អរូបំ ឧបបជ្ជន្តានំ អសញ្ញសត្តា ចវន្តានំ តេសំ វេទនាក្ខន្ធោ ច ន និរុជ្ឈតិ រូបក្ខន្ធោ ច នុប្បជ្ជតិ.

១៦០. (ក) យស្ស វេទនាក្ខន្ធោ នុប្បជ្ជតិ តស្ស សញ្ញាក្ខន្ធោ ន និរុជ្ឈតីតិ?

ចតុវោការា បញ្ចវោការា ចវន្តានំ តេសំ វេទនាក្ខន្ធោ នុប្បជ្ជតិ, នោ ច តេសំ សញ្ញាក្ខន្ធោ ន និរុជ្ឈតិ. អសញ្ញសត្តានំ តេសំ វេទនាក្ខន្ធោ ច នុប្បជ្ជតិ សញ្ញាក្ខន្ធោ ច ន និរុជ្ឈតិ.

(ខ) យស្ស វា បន សញ្ញាក្ខន្ធោ ន និរុជ្ឈតិ តស្ស វេទនាក្ខន្ធោ នុប្បជ្ជតីតិ?

ចតុវោការំ បញ្ចវោការំ ឧបបជ្ជន្តានំ តេសំ សញ្ញាក្ខន្ធោ ន និរុជ្ឈតិ, នោ ច តេសំ វេទនាក្ខន្ធោ នុប្បជ្ជតិ. អសញ្ញសត្តានំ តេសំ សញ្ញាក្ខន្ធោ ច ន និរុជ្ឈតិ វេទនាក្ខន្ធោ ច នុប្បជ្ជតិ.

(ង) បច្ចនីកឱកាសោ

១៦១. (ក) យត្ថ រូបក្ខន្ធោ នុប្បជ្ជតិ តត្ថ វេទនាក្ខន្ធោ ន និរុជ្ឈតីតិ? និរុជ្ឈតិ.

(ខ) យត្ថ វា បន វេទនាក្ខន្ធោ ន និរុជ្ឈតិ តត្ថ រូបក្ខន្ធោ នុប្បជ្ជតីតិ? ឧប្បជ្ជតិ.

១៦២. (ក) យត្ថ វេទនាក្ខន្ធោ នុប្បជ្ជតិ តត្ថ សញ្ញាក្ខន្ធោ ន និរុជ្ឈតីតិ? អាមន្តា.

(ខ) យត្ថ វា បន សញ្ញាក្ខន្ធោ ន និរុជ្ឈតិ តត្ថ វេទនាក្ខន្ធោ នុប្បជ្ជតីតិ? អាមន្តា.

(ច) បច្ចនីកបុគ្គលោកាសា

១៦៣. (ក) យស្ស យត្ថ រូបក្ខន្ធោ នុប្បជ្ជតិ តស្ស តត្ថ វេទនាក្ខន្ធោ ន និរុជ្ឈតីតិ?

ចតុវោការា បញ្ចវោការា ចវន្តានំ តេសំ តត្ថ រូបក្ខន្ធោ នុប្បជ្ជតិ, នោ ច តេសំ តត្ថ វេទនាក្ខន្ធោ ន និរុជ្ឈតិ. អរូបំ ឧបបជ្ជន្តានំ អសញ្ញសត្តា ចវន្តានំ តេសំ តត្ថ រូបក្ខន្ធោ នុប្បជ្ជតិ វេទនាក្ខន្ធោ ច ន និរុជ្ឈតិ.

(ខ) យស្ស វា បន យត្ថ វេទនាក្ខន្ធោ ន និរុជ្ឈតិ តស្ស តត្ថ រូបក្ខន្ធោ នុប្បជ្ជតីតិ?

បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ វេទនាក្ខន្ធោ ន និរុជ្ឈតិ, នោ ច តេសំ តត្ថ រូបក្ខន្ធោ នុប្បជ្ជតិ. អរូបំ ឧបបជ្ជន្តានំ អសញ្ញសត្តា ចវន្តានំ តេសំ តត្ថ វេទនាក្ខន្ធោ ច ន និរុជ្ឈតិ រូបក្ខន្ធោ ច នុប្បជ្ជតិ.

១៦៤. (ក) យស្ស យត្ថ វេទនាក្ខន្ធោ នុប្បជ្ជតិ តស្ស តត្ថ សញ្ញាក្ខន្ធោ ន និរុជ្ឈតីតិ?

ចតុវោការា បញ្ចវោការា ចវន្តានំ តេសំ តត្ថ វេទនាក្ខន្ធោ នុប្បជ្ជតិ, នោ ច តេសំ តត្ថ សញ្ញាក្ខន្ធោ ន និរុជ្ឈតិ. អសញ្ញសត្តានំ តេសំ តត្ថ វេទនាក្ខន្ធោ ច នុប្បជ្ជតិ សញ្ញាក្ខន្ធោ ច ន និរុជ្ឈតិ.

(ខ) យស្ស វា បន យត្ថ សញ្ញាក្ខន្ធោ ន និរុជ្ឈតិ តស្ស តត្ថ វេទនាក្ខន្ធោ នុប្បជ្ជតីតិ?

ចតុវោការំ បញ្ចវោការំ ឧបបជ្ជន្តានំ តេសំ តត្ថ សញ្ញាក្ខន្ធោ ន និរុជ្ឈតិ, នោ ច តេសំ តត្ថ វេទនាក្ខន្ធោ នុប្បជ្ជតិ. អសញ្ញសត្តានំ តេសំ តត្ថ សញ្ញាក្ខន្ធោ ច ន និរុជ្ឈតិ វេទនាក្ខន្ធោ ច នុប្បជ្ជតិ.