(២) អតីតវារោ

(ក) អនុលោមបុគ្គលោ

១៦៥. (ក) យស្ស រូបក្ខន្ធោ ឧប្បជ្ជិត្ថ តស្ស វេទនាក្ខន្ធោ និរុជ្ឈិត្ថាតិ? អាមន្តា.

(ខ) យស្ស វា បន វេទនាក្ខន្ធោ និរុជ្ឈិត្ថ តស្ស រូបក្ខន្ធោ ឧប្បជ្ជិត្ថាតិ? អាមន្តា.

១៦៦. (ក) យស្ស វេទនាក្ខន្ធោ ឧប្បជ្ជិត្ថ តស្ស សញ្ញាក្ខន្ធោ និរុជ្ឈិត្ថាតិ? អាមន្តា.

(ខ) យស្ស វា បន សញ្ញាក្ខន្ធោ និរុជ្ឈិត្ថ តស្ស វេទនាក្ខន្ធោ ឧប្បជ្ជិត្ថាតិ? អាមន្តា.

(ខ) អនុលោមឱកាសោ

១៦៧. យត្ថ រូបក្ខន្ធោ ឧប្បជ្ជិត្ថ…បេ….

(គ) អនុលោមបុគ្គលោកាសា

១៦៨. (ក) យស្ស យត្ថ រូបក្ខន្ធោ ឧប្បជ្ជិត្ថ តស្ស តត្ថ វេទនាក្ខន្ធោ និរុជ្ឈិត្ថាតិ?

អសញ្ញសត្តានំ តេសំ តត្ថ រូបក្ខន្ធោ ឧប្បជ្ជិត្ថ, នោ ច តេសំ តត្ថ វេទនាក្ខន្ធោ និរុជ្ឈិត្ថ. បញ្ចវោការានំ តេសំ តត្ថ រូបក្ខន្ធោ ច ឧប្បជ្ជិត្ថ វេទនាក្ខន្ធោ ច និរុជ្ឈិត្ថ.

(ខ) យស្ស វា បន យត្ថ វេទនាក្ខន្ធោ និរុជ្ឈិត្ថ តស្ស តត្ថ រូបក្ខន្ធោ ឧប្បជ្ជិត្ថាតិ?

អរូបានំ តេសំ តត្ថ វេទនាក្ខន្ធោ និរុជ្ឈិត្ថ, នោ ច តេសំ តត្ថ រូបក្ខន្ធោ ឧប្បជ្ជិត្ថ. បញ្ចវោការានំ តេសំ តត្ថ វេទនាក្ខន្ធោ ច និរុជ្ឈិត្ថ រូបក្ខន្ធោ ច ឧប្បជ្ជិត្ថ.

១៦៩. (ក) យស្ស យត្ថ វេទនាក្ខន្ធោ ឧប្បជ្ជិត្ថ តស្ស តត្ថ សញ្ញាក្ខន្ធោ និរុជ្ឈិត្ថាតិ? អាមន្តា.

(ខ) យស្ស វា បន យត្ថ សញ្ញាក្ខន្ធោ និរុជ្ឈិត្ថ តស្ស តត្ថ វេទនាក្ខន្ធោ ឧប្បជ្ជិត្ថាតិ? អាមន្តា.

(ឃ) បច្ចនីកបុគ្គលោ

១៧០. (ក) យស្ស រូបក្ខន្ធោ នុប្បជ្ជិត្ថ តស្ស វេទនាក្ខន្ធោ ន និរុជ្ឈិត្ថាតិ? នត្ថិ.

(ខ) យស្ស វា បន វេទនាក្ខន្ធោ ន និរុជ្ឈិត្ថ តស្ស រូបក្ខន្ធោ នុប្បជ្ជិត្ថាតិ? នត្ថិ.

១៧១. (ក) យស្ស វេទនាក្ខន្ធោ នុប្បជ្ជិត្ថ តស្ស សញ្ញាក្ខន្ធោ ន និរុជ្ឈិត្ថាតិ? នត្ថិ.

(ខ) យស្ស វា បន សញ្ញាក្ខន្ធោ ន និរុជ្ឈិត្ថ តស្ស វេទនាក្ខន្ធោ នុប្បជ្ជិត្ថាតិ? នត្ថិ.

(ង) បច្ចនីកឱកាសោ

១៧២. យត្ថ រូបក្ខន្ធោ នុប្បជ្ជិត្ថ…បេ….

(ច) បច្ចនីកបុគ្គលោកាសា

១៧៣. (ក) យស្ស យត្ថ រូបក្ខន្ធោ នុប្បជ្ជិត្ថ តស្ស តត្ថ វេទនាក្ខន្ធោ ន និរុជ្ឈិត្ថាតិ?

អរូបានំ តេសំ តត្ថ រូបក្ខន្ធោ នុប្បជ្ជិត្ថ, នោ ច តេសំ តត្ថ វេទនាក្ខន្ធោ ន និរុជ្ឈិត្ថ. សុទ្ធាវាសានំ តេសំ តត្ថ រូបក្ខន្ធោ ច នុប្បជ្ជិត្ថ វេទនាក្ខន្ធោ ច ន និរុជ្ឈិត្ថ.

(ខ) យស្ស វា បន យត្ថ វេទនាក្ខន្ធោ ន និរុជ្ឈិត្ថ តស្ស តត្ថ រូបក្ខន្ធោ នុប្បជ្ជិត្ថាតិ?

អសញ្ញសត្តានំ តេសំ តត្ថ វេទនាក្ខន្ធោ ន និរុជ្ឈិត្ថ, នោ ច តេសំ តត្ថ រូបក្ខន្ធោ នុប្បជ្ជិត្ថ. សុទ្ធាវាសានំ តេសំ តត្ថ វេទនាក្ខន្ធោ ច ន និរុជ្ឈិត្ថ រូបក្ខន្ធោ ច នុប្បជ្ជិត្ថ.

១៧៤. (ក) យស្ស យត្ថ វេទនាក្ខន្ធោ នុប្បជ្ជិត្ថ តស្ស តត្ថ សញ្ញាក្ខន្ធោ ន និរុជ្ឈិត្ថាតិ? អាមន្តា.

(ខ) យស្ស វា បន យត្ថ សញ្ញាក្ខន្ធោ ន និរុជ្ឈិត្ថ តស្ស តត្ថ វេទនាក្ខន្ធោ នុប្បជ្ជិត្ថាតិ? អាមន្តា.