(៤) បច្ចុប្បន្នាតីតវារោ

(ក) អនុលោមបុគ្គលោ

១២២. (ក) យស្ស រូបក្ខន្ធោ និរុជ្ឈតិ តស្ស វេទនាក្ខន្ធោ និរុជ្ឈិត្ថាតិ? អាមន្តា.

(ខ) យស្ស វា បន វេទនាក្ខន្ធោ និរុជ្ឈិត្ថ តស្ស រូបក្ខន្ធោ និរុជ្ឈតីតិ?

សព្ពេសំ ឧបបជ្ជន្តានំ អរូបា ចវន្តានំ តេសំ វេទនាក្ខន្ធោ និរុជ្ឈិត្ថ, នោ ច តេសំ រូបក្ខន្ធោ និរុជ្ឈតិ. បញ្ចវោការា ចវន្តានំ អសញ្ញសត្តា ចវន្តានំ តេសំ វេទនាក្ខន្ធោ ច និរុជ្ឈិត្ថ រូបក្ខន្ធោ ច និរុជ្ឈតិ.

១២៣. (ក) យស្ស វេទនាក្ខន្ធោ និរុជ្ឈតិ តស្ស សញ្ញាក្ខន្ធោ និរុជ្ឈិត្ថាតិ? អាមន្តា.

(ខ) យស្ស វា បន សញ្ញាក្ខន្ធោ និរុជ្ឈិត្ថ តស្ស វេទនាក្ខន្ធោ និរុជ្ឈតីតិ?

សព្ពេសំ ឧបបជ្ជន្តានំ អសញ្ញសត្តា ចវន្តានំ តេសំ សញ្ញាក្ខន្ធោ និរុជ្ឈិត្ថ, នោ ច តេសំ វេទនាក្ខន្ធោ និរុជ្ឈតិ. ចតុវោការា បញ្ចវោការា ចវន្តានំ តេសំ សញ្ញាក្ខន្ធោ ច និរុជ្ឈិត្ថ វេទនាក្ខន្ធោ ច និរុជ្ឈតិ.

(ខ) អនុលោមឱកាសោ

១២៤. (ក) យត្ថ រូបក្ខន្ធោ និរុជ្ឈតិ តត្ថ វេទនាក្ខន្ធោ និរុជ្ឈិត្ថាតិ?

អសញ្ញសត្តេ តត្ថ រូបក្ខន្ធោ និរុជ្ឈតិ, នោ ច តត្ថ វេទនាក្ខន្ធោ និរុជ្ឈិត្ថ. បញ្ចវោការេ តត្ថ រូបក្ខន្ធោ ច និរុជ្ឈតិ វេទនាក្ខន្ធោ ច និរុជ្ឈិត្ថ.

(ខ) យត្ថ វា បន វេទនាក្ខន្ធោ និរុជ្ឈិត្ថ តត្ថ រូបក្ខន្ធោ និរុជ្ឈតីតិ?

អរូបេ តត្ថ វេទនាក្ខន្ធោ និរុជ្ឈិត្ថ, នោ ច តត្ថ រូបក្ខន្ធោ និរុជ្ឈតិ. បញ្ចវោការេ តត្ថ វេទនាក្ខន្ធោ ច និរុជ្ឈិត្ថ រូបក្ខន្ធោ ច និរុជ្ឈតិ.

១២៥. (ក) យត្ថ វេទនាក្ខន្ធោ និរុជ្ឈតិ តត្ថ សញ្ញាក្ខន្ធោ និរុជ្ឈិត្ថាតិ? អាមន្តា.

(ខ) យត្ថ វា បន សញ្ញាក្ខន្ធោ និរុជ្ឈិត្ថ តត្ថ វេទនាក្ខន្ធោ និរុជ្ឈតីតិ? អាមន្តា.

(គ) អនុលោមបុគ្គលោកាសា

១២៦. (ក) យស្ស យត្ថ រូបក្ខន្ធោ និរុជ្ឈតិ តស្ស តត្ថ វេទនាក្ខន្ធោ និរុជ្ឈិត្ថាតិ?

សុទ្ធាវាសេ បរិនិព្ពន្តានំ អសញ្ញសត្តា ចវន្តានំ តេសំ តត្ថ រូបក្ខន្ធោ និរុជ្ឈតិ, នោ ច តេសំ តត្ថ វេទនាក្ខន្ធោ និរុជ្ឈិត្ថ. ឥតរេសំ បញ្ចវោការា ចវន្តានំ តេសំ តត្ថ រូបក្ខន្ធោ ច និរុជ្ឈតិ វេទនាក្ខន្ធោ ច និរុជ្ឈិត្ថ.

(ខ) យស្ស វា បន យត្ថ វេទនាក្ខន្ធោ និរុជ្ឈិត្ថ តស្ស តត្ថ រូបក្ខន្ធោ និរុជ្ឈតីតិ?

បញ្ចវោការំ ឧបបជ្ជន្តានំ អរូបានំ តេសំ តត្ថ វេទនាក្ខន្ធោ និរុជ្ឈិត្ថ, នោ ច តេសំ តត្ថ រូបក្ខន្ធោ និរុជ្ឈតិ. បញ្ចវោការា ចវន្តានំ តេសំ តត្ថ វេទនាក្ខន្ធោ ច និរុជ្ឈិត្ថ រូបក្ខន្ធោ ច និរុជ្ឈតិ.

១២៧. (ក) យស្ស យត្ថ វេទនាក្ខន្ធោ និរុជ្ឈតិ តស្ស តត្ថ សញ្ញាក្ខន្ធោ និរុជ្ឈិត្ថាតិ?

សុទ្ធាវាសេ បរិនិព្ពន្តានំ តេសំ តត្ថ វេទនាក្ខន្ធោ និរុជ្ឈតិ, នោ ច តេសំ តត្ថ សញ្ញាក្ខន្ធោ និរុជ្ឈិត្ថ. ឥតរេសំ ចតុវោការា បញ្ចវោការា ចវន្តានំ តេសំ តត្ថ វេទនាក្ខន្ធោ ច និរុជ្ឈតិ សញ្ញាក្ខន្ធោ ច និរុជ្ឈិត្ថ.

(ខ) យស្ស វា បន យត្ថ សញ្ញាក្ខន្ធោ និរុជ្ឈិត្ថ តស្ស តត្ថ វេទនាក្ខន្ធោ និរុជ្ឈតីតិ?

ចតុវោការំ បញ្ចវោការំ ឧបបជ្ជន្តានំ តេសំ តត្ថ សញ្ញាក្ខន្ធោ និរុជ្ឈិត្ថ, នោ ច តេសំ តត្ថ វេទនាក្ខន្ធោ និរុជ្ឈតិ. ចតុវោការា បញ្ចវោការា ចវន្តានំ តេសំ តត្ថ សញ្ញាក្ខន្ធោ ច និរុជ្ឈិត្ថ វេទនាក្ខន្ធោ ច និរុជ្ឈតិ.

(ឃ) បច្ចនីកបុគ្គលោ

១២៨. (ក) យស្ស រូបក្ខន្ធោ ន និរុជ្ឈតិ តស្ស វេទនាក្ខន្ធោ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន វេទនាក្ខន្ធោ ន និរុជ្ឈិត្ថ តស្ស រូបក្ខន្ធោ ន និរុជ្ឈតីតិ? នត្ថិ.

១២៩. (ក) យស្ស វេទនាក្ខន្ធោ ន និរុជ្ឈតិ តស្ស សញ្ញាក្ខន្ធោ ន និរុជ្ឈិត្ថាតិ? និរុជ្ឈិត្ថ.

(ខ) យស្ស វា បន សញ្ញាក្ខន្ធោ ន និរុជ្ឈិត្ថ តស្ស វេទនាក្ខន្ធោ ន និរុជ្ឈតីតិ? នត្ថិ.

(ង) បច្ចនីកឱកាសោ

១៣០. យត្ថ រូបក្ខន្ធោ ន និរុជ្ឈតិ (យត្ថកំ បរិបុណ្ណំ កាតព្ពំ).

(ច) បច្ចនីកបុគ្គលោកាសា

១៣១. (ក) យស្ស យត្ថ រូបក្ខន្ធោ ន និរុជ្ឈតិ តស្ស តត្ថ វេទនាក្ខន្ធោ ន និរុជ្ឈិត្ថាតិ?

បញ្ចវោការំ ឧបបជ្ជន្តានំ អរូបានំ តេសំ តត្ថ រូបក្ខន្ធោ ន និរុជ្ឈតិ, នោ ច តេសំ តត្ថ វេទនាក្ខន្ធោ ន និរុជ្ឈិត្ថ. សុទ្ធាវាសំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ រូបក្ខន្ធោ ច ន និរុជ្ឈតិ វេទនាក្ខន្ធោ ច ន និរុជ្ឈិត្ថ.

(ខ) យស្ស វា បន យត្ថ វេទនាក្ខន្ធោ ន និរុជ្ឈិត្ថ តស្ស តត្ថ រូបក្ខន្ធោ ន និរុជ្ឈតីតិ?

សុទ្ធាវាសេ បរិនិព្ពន្តានំ អសញ្ញសត្តា ចវន្តានំ តេសំ តត្ថ វេទនាក្ខន្ធោ ន និរុជ្ឈិត្ថ, នោ ច តេសំ តត្ថ រូបក្ខន្ធោ ន និរុជ្ឈតិ. សុទ្ធាវាសំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ វេទនាក្ខន្ធោ ច ន និរុជ្ឈិត្ថ រូបក្ខន្ធោ ច ន និរុជ្ឈតិ.

១៣២. (ក) យស្ស យត្ថ វេទនាក្ខន្ធោ ន និរុជ្ឈតិ តស្ស តត្ថ សញ្ញាក្ខន្ធោ ន និរុជ្ឈិត្ថាតិ?

ចតុវោការំ បញ្ចវោការំ ឧបបជ្ជន្តានំ តេសំ តត្ថ វេទនាក្ខន្ធោ ន និរុជ្ឈតិ, នោ ច តេសំ តត្ថ សញ្ញាក្ខន្ធោ ន និរុជ្ឈិត្ថ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ វេទនាក្ខន្ធោ ច ន និរុជ្ឈតិ សញ្ញាក្ខន្ធោ ច ន និរុជ្ឈិត្ថ.

(ខ) យស្ស វា បន យត្ថ សញ្ញាក្ខន្ធោ ន និរុជ្ឈិត្ថ តស្ស តត្ថ វេទនាក្ខន្ធោ ន និរុជ្ឈតីតិ?

សុទ្ធាវាសេ បរិនិព្ពន្តានំ តេសំ តត្ថ សញ្ញាក្ខន្ធោ ន និរុជ្ឈិត្ថ, នោ ច តេសំ តត្ថ វេទនាក្ខន្ធោ ន និរុជ្ឈតិ. សុទ្ធាវាសំ ឧបបជ្ជន្តានំ អសញ្ញសត្តានំ តេសំ តត្ថ សញ្ញាក្ខន្ធោ ច ន និរុជ្ឈិត្ថ វេទនាក្ខន្ធោ ច ន និរុជ្ឈតិ.