(៣) អនាគតវារោ

(ក) អនុលោមបុគ្គលោ

១១៦. (ក) យស្ស រូបក្ខន្ធោ និរុជ្ឈិស្សតិ តស្ស វេទនាក្ខន្ធោ និរុជ្ឈិស្សតីតិ? អាមន្តា.

(ខ) យស្ស វា បន វេទនាក្ខន្ធោ និរុជ្ឈិស្សតិ តស្ស រូបក្ខន្ធោ និរុជ្ឈិស្សតីតិ?

បច្ឆិមភវិកានំ អរូបំ ឧបបជ្ជន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ វេទនាក្ខន្ធោ និរុជ្ឈិស្សតិ, នោ ច តេសំ រូបក្ខន្ធោ និរុជ្ឈិស្សតិ. ឥតរេសំ តេសំ វេទនាក្ខន្ធោ ច និរុជ្ឈិស្សតិ រូបក្ខន្ធោ ច និរុជ្ឈិស្សតិ.

(ខ) អនុលោមឱកាសោ

១១៧. (ក) យត្ថ រូបក្ខន្ធោ និរុជ្ឈិស្សតិ តត្ថ វេទនាក្ខន្ធោ និរុជ្ឈិស្សតីតិ?

អសញ្ញសត្តេ តត្ថ រូបក្ខន្ធោ និរុជ្ឈិស្សតិ, នោ ច តត្ថ វេទនាក្ខន្ធោ និរុជ្ឈិស្សតិ. បញ្ចវោការេ តត្ថ រូបក្ខន្ធោ ច និរុជ្ឈិស្សតិ វេទនាក្ខន្ធោ ច និរុជ្ឈិស្សតិ.

(ខ) យត្ថ វា បន វេទនាក្ខន្ធោ និរុជ្ឈិស្សតិ តត្ថ រូបក្ខន្ធោ និរុជ្ឈិស្សតីតិ?

អរូបេ តត្ថ វេទនាក្ខន្ធោ និរុជ្ឈិស្សតិ, នោ ច តត្ថ រូបក្ខន្ធោ និរុជ្ឈិស្សតិ. បញ្ចវោការេ តត្ថ វេទនាក្ខន្ធោ ច និរុជ្ឈិស្សតិ រូបក្ខន្ធោ ច និរុជ្ឈិស្សតិ.

(គ) អនុលោមបុគ្គលោកាសា

១១៨. (ក) យស្ស យត្ថ រូបក្ខន្ធោ និរុជ្ឈិស្សតិ តស្ស តត្ថ វេទនាក្ខន្ធោ និរុជ្ឈិស្សតីតិ?

អសញ្ញសត្តានំ តេសំ តត្ថ រូបក្ខន្ធោ និរុជ្ឈិស្សតិ, នោ ច តេសំ តត្ថ វេទនាក្ខន្ធោ និរុជ្ឈិស្សតិ. បញ្ចវោការានំ តេសំ តត្ថ រូបក្ខន្ធោ ច និរុជ្ឈិស្សតិ វេទនាក្ខន្ធោ ច និរុជ្ឈិស្សតិ.

(ខ) យស្ស វា បន យត្ថ វេទនាក្ខន្ធោ និរុជ្ឈិស្សតិ តស្ស តត្ថ រូបក្ខន្ធោ និរុជ្ឈិស្សតីតិ?

អរូបានំ តេសំ តត្ថ វេទនាក្ខន្ធោ និរុជ្ឈិស្សតិ, នោ ច តេសំ តត្ថ រូបក្ខន្ធោ និរុជ្ឈិស្សតិ. បញ្ចវោការានំ តេសំ តត្ថ វេទនាក្ខន្ធោ ច និរុជ្ឈិស្សតិ រូបក្ខន្ធោ ច និរុជ្ឈិស្សតិ.

(ឃ) បច្ចនីកបុគ្គលោ

១១៩. (ក) យស្ស រូបក្ខន្ធោ ន និរុជ្ឈិស្សតិ តស្ស វេទនាក្ខន្ធោ ន និរុជ្ឈិស្សតីតិ?

បច្ឆិមភវិកានំ អរូបំ ឧបបជ្ជន្តានំ យេ ច អរូបំ ឧបបជ្ជិត្វា បរិនិព្ពាយិស្សន្តិ តេសំ ចវន្តានំ តេសំ រូបក្ខន្ធោ ន និរុជ្ឈិស្សតិ, នោ ច តេសំ វេទនាក្ខន្ធោ ន និរុជ្ឈិស្សតិ. បរិនិព្ពន្តានំ តេសំ រូបក្ខន្ធោ ច ន និរុជ្ឈិស្សតិ វេទនាក្ខន្ធោ ច ន និរុជ្ឈិស្សតិ.

(ខ) យស្ស វា បន វេទនាក្ខន្ធោ ន និរុជ្ឈិស្សតិ តស្ស រូបក្ខន្ធោ ន និរុជ្ឈិស្សតីតិ? អាមន្តា.

(ង) បច្ចនីកឱកាសោ

១២០. (ក) យត្ថ រូបក្ខន្ធោ ន និរុជ្ឈិស្សតិ តត្ថ វេទនាក្ខន្ធោ ន និរុជ្ឈិស្សតីតិ? និរុជ្ឈិស្សតិ.

(ខ) យត្ថ វា បន វេទនាក្ខន្ធោ ន និរុជ្ឈិស្សតិ តត្ថ រូបក្ខន្ធោ ន និរុជ្ឈិស្សតីតិ? និរុជ្ឈិស្សតិ.

(ច) បច្ចនីកបុគ្គលោកាសា

១២១. (ក) យស្ស យត្ថ រូបក្ខន្ធោ ន និរុជ្ឈិស្សតិ តស្ស តត្ថ វេទនាក្ខន្ធោ ន និរុជ្ឈិស្សតីតិ?

អរូបានំ តេសំ តត្ថ រូបក្ខន្ធោ ន និរុជ្ឈិស្សតិ, នោ ច តេសំ តត្ថ វេទនាក្ខន្ធោ ន និរុជ្ឈិស្សតិ. បរិនិព្ពន្តានំ តេសំ តត្ថ រូបក្ខន្ធោ ច ន និរុជ្ឈិស្សតិ វេទនាក្ខន្ធោ ច ន និរុជ្ឈិស្សតិ.

(ខ) យស្ស វា បន យត្ថ វេទនាក្ខន្ធោ ន និរុជ្ឈិស្សតិ តស្ស តត្ថ រូបក្ខន្ធោ ន និរុជ្ឈិស្សតីតិ?

អសញ្ញសត្តានំ តេសំ តត្ថ វេទនាក្ខន្ធោ ន និរុជ្ឈិស្សតិ, នោ ច តេសំ តត្ថ រូបក្ខន្ធោ ន និរុជ្ឈិស្សតិ. បរិនិព្ពន្តានំ តេសំ តត្ថ វេទនាក្ខន្ធោ ច ន និរុជ្ឈិស្សតិ រូបក្ខន្ធោ ច ន និរុជ្ឈិស្សតិ.