(៥) បច្ចុប្បន្នានាគតវារោ

(ក) អនុលោមបុគ្គលោ

៨០. (ក) យស្ស រូបក្ខន្ធោ ឧប្បជ្ជតិ តស្ស វេទនាក្ខន្ធោ ឧប្បជ្ជិស្សតីតិ?

បច្ឆិមភវិកានំ បញ្ចវោការំ ឧបបជ្ជន្តានំ តេសំ រូបក្ខន្ធោ ឧប្បជ្ជតិ, នោ ច តេសំ វេទនាក្ខន្ធោ ឧប្បជ្ជិស្សតិ. ឥតរេសំ បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ រូបក្ខន្ធោ ច ឧប្បជ្ជតិ វេទនាក្ខន្ធោ ច ឧប្បជ្ជិស្សតិ.

(ខ) យស្ស វា បន វេទនាក្ខន្ធោ ឧប្បជ្ជិស្សតិ តស្ស រូបក្ខន្ធោ ឧប្បជ្ជតីតិ?

សព្ពេសំ ចវន្តានំ អរូបំ ឧបបជ្ជន្តានំ តេសំ វេទនាក្ខន្ធោ ឧប្បជ្ជិស្សតិ, នោ ច តេសំ រូបក្ខន្ធោ ឧប្បជ្ជតិ. បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជតិ.

៨១. (ក) យស្ស វេទនាក្ខន្ធោ ឧប្បជ្ជតិ តស្ស សញ្ញាក្ខន្ធោ ឧប្បជ្ជិស្សតីតិ?

បច្ឆិមភវិកានំ ឧបបជ្ជន្តានំ តេសំ វេទនាក្ខន្ធោ ឧប្បជ្ជតិ, នោ ច តេសំ សញ្ញាក្ខន្ធោ ឧប្បជ្ជិស្សតិ. ឥតរេសំ ចតុវោការំ បញ្ចវោការំ ឧបបជ្ជន្តានំ តេសំ វេទនាក្ខន្ធោ ច ឧប្បជ្ជតិ សញ្ញាក្ខន្ធោ ច ឧប្បជ្ជិស្សតិ.

(ខ) យស្ស វា បន សញ្ញាក្ខន្ធោ ឧប្បជ្ជិស្សតិ តស្ស វេទនាក្ខន្ធោ ឧប្បជ្ជតីតិ?

សព្ពេសំ ចវន្តានំ អសញ្ញសត្តំ ឧបបជ្ជន្តានំ តេសំ សញ្ញាក្ខន្ធោ ឧប្បជ្ជិស្សតិ, នោ ច តេសំ វេទនាក្ខន្ធោ ឧប្បជ្ជតិ. ចតុវោការំ បញ្ចវោការំ ឧបបជ្ជន្តានំ តេសំ សញ្ញាក្ខន្ធោ ច ឧប្បជ្ជិស្សតិ វេទនាក្ខន្ធោ ច ឧប្បជ្ជតិ.

(ខ) អនុលោមឱកាសោ

៨២. (ក) យត្ថ រូបក្ខន្ធោ ឧប្បជ្ជតិ តត្ថ វេទនាក្ខន្ធោ ឧប្បជ្ជិស្សតីតិ?

អសញ្ញសត្តេ តត្ថ រូបក្ខន្ធោ ឧប្បជ្ជតិ, នោ ច តត្ថ វេទនាក្ខន្ធោ ឧប្បជ្ជិស្សតិ. បញ្ចវោការេ តត្ថ រូបក្ខន្ធោ ច ឧប្បជ្ជតិ វេទនាក្ខន្ធោ ច ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ ឧប្បជ្ជិស្សតិ តត្ថ រូបក្ខន្ធោ ឧប្បជ្ជតីតិ?

អរូបេ តត្ថ វេទនាក្ខន្ធោ ឧប្បជ្ជិស្សតិ, នោ ច តត្ថ រូបក្ខន្ធោ ឧប្បជ្ជតិ. បញ្ចវោការេ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជតិ.

៨៣. (ក) យត្ថ វេទនាក្ខន្ធោ ឧប្បជ្ជតិ តត្ថ សញ្ញាក្ខន្ធោ ឧប្បជ្ជិស្សតីតិ? អាមន្តា.

(ខ) យត្ថ វា បន សញ្ញាក្ខន្ធោ ឧប្បជ្ជិស្សតិ តត្ថ វេទនាក្ខន្ធោ ឧប្បជ្ជតីតិ? អាមន្តា.

(គ) អនុលោមបុគ្គលោកាសា

៨៤. (ក) យស្ស យត្ថ រូបក្ខន្ធោ ឧប្បជ្ជតិ តស្ស តត្ថ វេទនាក្ខន្ធោ ឧប្បជ្ជិស្សតីតិ?

បច្ឆិមភវិកានំ បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ រូបក្ខន្ធោ ឧប្បជ្ជតិ, នោ ច តេសំ តត្ថ វេទនាក្ខន្ធោ ឧប្បជ្ជិស្សតិ. ឥតរេសំ បញ្ចវោការំ ឧបបជ្ជន្តានំ តេសំ តត្ថ រូបក្ខន្ធោ ច ឧប្បជ្ជតិ វេទនាក្ខន្ធោ ច ឧប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ ឧប្បជ្ជិស្សតិ តស្ស តត្ថ រូបក្ខន្ធោ ឧប្បជ្ជតីតិ?

បញ្ចវោការា ចវន្តានំ អរូបានំ តេសំ តត្ថ វេទនាក្ខន្ធោ ឧប្បជ្ជិស្សតិ, នោ ច តេសំ តត្ថ រូបក្ខន្ធោ ឧប្បជ្ជតិ. បញ្ចវោការំ ឧបបជ្ជន្តានំ តេសំ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជតិ.

៨៥. (ក) យស្ស យត្ថ វេទនាក្ខន្ធោ ឧប្បជ្ជតិ តស្ស តត្ថ សញ្ញាក្ខន្ធោ ឧប្បជ្ជិស្សតីតិ?

បច្ឆិមភវិកានំ ឧបបជ្ជន្តានំ តេសំ តត្ថ វេទនាក្ខន្ធោ ឧប្បជ្ជតិ, នោ ច តេសំ តត្ថ សញ្ញាក្ខន្ធោ ឧប្បជ្ជិស្សតិ. ឥតរេសំ ចតុវោការំ បញ្ចវោការំ ឧបបជ្ជន្តានំ តេសំ តត្ថ វេទនាក្ខន្ធោ ច ឧប្បជ្ជតិ សញ្ញាក្ខន្ធោ ច ឧប្បជ្ជិស្សតិ.

(ខ) យស្ស វា បន យត្ថ សញ្ញាក្ខន្ធោ ឧប្បជ្ជិស្សតិ តស្ស តត្ថ វេទនាក្ខន្ធោ ឧប្បជ្ជតីតិ?

ចតុវោការា បញ្ចវោការា ចវន្តានំ តេសំ តត្ថ សញ្ញាក្ខន្ធោ ឧប្បជ្ជិស្សតិ, នោ ច តេសំ តត្ថ វេទនាក្ខន្ធោ ឧប្បជ្ជតិ. ចតុវោការំ បញ្ចវោការំ ឧបបជ្ជន្តានំ តេសំ តត្ថ សញ្ញាក្ខន្ធោ ច ឧប្បជ្ជិស្សតិ វេទនាក្ខន្ធោ ច ឧប្បជ្ជតិ.

(ឃ) បច្ចនីកបុគ្គលោ

៨៦. (ក) យស្ស រូបក្ខន្ធោ នុប្បជ្ជតិ តស្ស វេទនាក្ខន្ធោ នុប្បជ្ជិស្សតីតិ?

សព្ពេសំ ចវន្តានំ អរូបំ ឧបបជ្ជន្តានំ តេសំ រូបក្ខន្ធោ នុប្បជ្ជតិ, នោ ច តេសំ វេទនាក្ខន្ធោ នុប្បជ្ជិស្សតិ. បញ្ចវោការេ បរិនិព្ពន្តានំ អរូបេ បច្ឆិមភវិកានំ តេសំ រូបក្ខន្ធោ ច នុប្បជ្ជតិ វេទនាក្ខន្ធោ ច នុប្បជ្ជិស្សតិ.

(ខ) យស្ស វា បន វេទនាក្ខន្ធោ នុប្បជ្ជិស្សតិ តស្ស រូបក្ខន្ធោ នុប្បជ្ជតីតិ?

បច្ឆិមភវិកានំ បញ្ចវោការំ ឧបបជ្ជន្តានំ តេសំ វេទនាក្ខន្ធោ នុប្បជ្ជិស្សតិ, នោ ច តេសំ រូបក្ខន្ធោ នុប្បជ្ជតិ. បញ្ចវោការេ បរិនិព្ពន្តានំ អរូបេ បច្ឆិមភវិកានំ តេសំ វេទនាក្ខន្ធោ ច នុប្បជ្ជិស្សតិ រូបក្ខន្ធោ ច នុប្បជ្ជតិ.

៨៧. (ក) យស្ស វេទនាក្ខន្ធោ នុប្បជ្ជតិ តស្ស សញ្ញាក្ខន្ធោ នុប្បជ្ជិស្សតីតិ?

សព្ពេសំ ចវន្តានំ អសញ្ញសត្តំ ឧបបជ្ជន្តានំ តេសំ វេទនាក្ខន្ធោ នុប្បជ្ជតិ, នោ ច តេសំ សញ្ញាក្ខន្ធោ នុប្បជ្ជិស្សតិ. បរិនិព្ពន្តានំ តេសំ វេទនាក្ខន្ធោ ច នុប្បជ្ជតិ សញ្ញាក្ខន្ធោ ច នុប្បជ្ជិស្សតិ.

(ខ) យស្ស វា បន សញ្ញាក្ខន្ធោ នុប្បជ្ជិស្សតិ តស្ស វេទនាក្ខន្ធោ នុប្បជ្ជតីតិ?

បច្ឆិមភវិកានំ ឧបបជ្ជន្តានំ [បច្ឆិមភវិកានំ បញ្ចវោការំ ឧបបជ្ជន្តានំ (សី. ស្យា.)] តេសំ សញ្ញាក្ខន្ធោ នុប្បជ្ជិស្សតិ, នោ ច តេសំ វេទនាក្ខន្ធោ នុប្បជ្ជតិ. បរិនិព្ពន្តានំ តេសំ សញ្ញាក្ខន្ធោ ច នុប្បជ្ជិស្សតិ វេទនាក្ខន្ធោ ច នុប្បជ្ជតិ.

(ង) បច្ចនីកឱកាសោ

៨៨. (ក) យត្ថ រូបក្ខន្ធោ នុប្បជ្ជតិ តត្ថ វេទនាក្ខន្ធោ នុប្បជ្ជិស្សតីតិ? ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ នុប្បជ្ជិស្សតិ តត្ថ រូបក្ខន្ធោ នុប្បជ្ជតីតិ? ឧប្បជ្ជតិ.

៨៩. (ក) យត្ថ វេទនាក្ខន្ធោ នុប្បជ្ជតិ តត្ថ សញ្ញាក្ខន្ធោ នុប្បជ្ជិស្សតីតិ? អាមន្តា.

(ខ) យត្ថ វា បន សញ្ញាក្ខន្ធោ នុប្បជ្ជិស្សតិ តត្ថ វេទនាក្ខន្ធោ នុប្បជ្ជតីតិ? អាមន្តា.

(ច) បច្ចនីកបុគ្គលោកាសា

៩០. (ក) យស្ស យត្ថ រូបក្ខន្ធោ នុប្បជ្ជតិ តស្ស តត្ថ វេទនាក្ខន្ធោ នុប្បជ្ជិស្សតីតិ?

បញ្ចវោការា ចវន្តានំ អរូបានំ តេសំ តត្ថ រូបក្ខន្ធោ នុប្បជ្ជតិ, នោ ច តេសំ តត្ថ វេទនាក្ខន្ធោ នុប្បជ្ជិស្សតិ. បញ្ចវោការេ បរិនិព្ពន្តានំ អរូបេ បច្ឆិមភវិកានំ អសញ្ញសត្តា ចវន្តានំ តេសំ តត្ថ រូបក្ខន្ធោ ច នុប្បជ្ជតិ វេទនាក្ខន្ធោ ច នុប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ នុប្បជ្ជិស្សតិ តស្ស តត្ថ រូបក្ខន្ធោ នុប្បជ្ជតីតិ?

បច្ឆិមភវិកានំ បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ វេទនាក្ខន្ធោ នុប្បជ្ជិស្សតិ, នោ ច តេសំ តត្ថ រូបក្ខន្ធោ នុប្បជ្ជតិ. បញ្ចវោការេ បរិនិព្ពន្តានំ អរូបេ បច្ឆិមភវិកានំ អសញ្ញសត្តា ចវន្តានំ តេសំ តត្ថ វេទនាក្ខន្ធោ ច នុប្បជ្ជិស្សតិ រូបក្ខន្ធោ ច នុប្បជ្ជតិ.

៩១. (ក) យស្ស យត្ថ វេទនាក្ខន្ធោ នុប្បជ្ជតិ តស្ស តត្ថ សញ្ញាក្ខន្ធោ នុប្បជ្ជិស្សតីតិ?

ចតុវោការា បញ្ចវោការា ចវន្តានំ តេសំ តត្ថ វេទនាក្ខន្ធោ នុប្បជ្ជតិ, នោ ច តេសំ តត្ថ សញ្ញាក្ខន្ធោ នុប្បជ្ជិស្សតិ. បរិនិព្ពន្តានំ អសញ្ញសត្តានំ តេសំ តត្ថ វេទនាក្ខន្ធោ ច នុប្បជ្ជតិ សញ្ញាក្ខន្ធោ ច នុប្បជ្ជិស្សតិ.

(ខ) យស្ស វា បន យត្ថ សញ្ញាក្ខន្ធោ នុប្បជ្ជិស្សតិ តស្ស តត្ថ វេទនាក្ខន្ធោ នុប្បជ្ជតីតិ?

បច្ឆិមភវិកានំ ឧបបជ្ជន្តានំ តេសំ តត្ថ សញ្ញាក្ខន្ធោ នុប្បជ្ជិស្សតិ, នោ ច តេសំ តត្ថ វេទនាក្ខន្ធោ នុប្បជ្ជតិ. បរិនិព្ពន្តានំ អសញ្ញសត្តានំ តេសំ តត្ថ សញ្ញាក្ខន្ធោ ច នុប្បជ្ជិស្សតិ វេទនាក្ខន្ធោ ច នុប្បជ្ជតិ.