(៦) អតីតានាគតវារោ

(ក) អនុលោមបុគ្គលោ

៩២. (ក) យស្ស រូបក្ខន្ធោ ឧប្បជ្ជិត្ថ តស្ស វេទនាក្ខន្ធោ ឧប្បជ្ជិស្សតីតិ?

បច្ឆិមភវិកានំ តេសំ រូបក្ខន្ធោ ឧប្បជ្ជិត្ថ, នោ ច តេសំ វេទនាក្ខន្ធោ ឧប្បជ្ជិស្សតិ. ឥតរេសំ តេសំ រូបក្ខន្ធោ ច ឧប្បជ្ជិត្ថ វេទនាក្ខន្ធោ ច ឧប្បជ្ជិស្សតិ.

(ខ) យស្ស វា បន វេទនាក្ខន្ធោ ឧប្បជ្ជិស្សតិ តស្ស រូបក្ខន្ធោ ឧប្បជ្ជិត្ថាតិ? អាមន្តា.

៩៣. (ក) យស្ស វេទនាក្ខន្ធោ ឧប្បជ្ជិត្ថ តស្ស សញ្ញាក្ខន្ធោ ឧប្បជ្ជិស្សតីតិ?

បច្ឆិមភវិកានំ តេសំ វេទនាក្ខន្ធោ ឧប្បជ្ជិត្ថ, នោ ច តេសំ សញ្ញាក្ខន្ធោ ឧប្បជ្ជិស្សតិ. ឥតរេសំ តេសំ វេទនាក្ខន្ធោ ច ឧប្បជ្ជិត្ថ សញ្ញាក្ខន្ធោ ច ឧប្បជ្ជិស្សតិ.

(ខ) យស្ស វា បន សញ្ញាក្ខន្ធោ ឧប្បជ្ជិស្សតិ តស្ស វេទនាក្ខន្ធោ ឧប្បជ្ជិត្ថាតិ? អាមន្តា.

(ខ) អនុលោមឱកាសោ

៩៤. (ក) យត្ថ រូបក្ខន្ធោ ឧប្បជ្ជិត្ថ តត្ថ វេទនាក្ខន្ធោ ឧប្បជ្ជិស្សតីតិ?

អសញ្ញសត្តេ តត្ថ រូបក្ខន្ធោ ឧប្បជ្ជិត្ថ, នោ ច តត្ថ វេទនាក្ខន្ធោ ឧប្បជ្ជិស្សតិ. បញ្ចវោការេ តត្ថ រូបក្ខន្ធោ ច ឧប្បជ្ជិត្ថ វេទនាក្ខន្ធោ ច ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ ឧប្បជ្ជិស្សតិ តត្ថ រូបក្ខន្ធោ ឧប្បជ្ជិត្ថាតិ?

អរូបេ តត្ថ វេទនាក្ខន្ធោ ឧប្បជ្ជិស្សតិ, នោ ច តត្ថ រូបក្ខន្ធោ ឧប្បជ្ជិត្ថ. បញ្ចវោការេ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជិត្ថ.

៩៥. (ក) យត្ថ វេទនាក្ខន្ធោ ឧប្បជ្ជិត្ថ តត្ថ សញ្ញាក្ខន្ធោ ឧប្បជ្ជិស្សតីតិ? អាមន្តា.

(ខ) យត្ថ វា បន សញ្ញាក្ខន្ធោ ឧប្បជ្ជិស្សតិ តត្ថ វេទនាក្ខន្ធោ ឧប្បជ្ជិត្ថាតិ? អាមន្តា.

(គ) អនុលោមបុគ្គលោកាសា

៩៦. (ក) យស្ស យត្ថ រូបក្ខន្ធោ ឧប្បជ្ជិត្ថ តស្ស តត្ថ វេទនាក្ខន្ធោ ឧប្បជ្ជិស្សតីតិ?

បញ្ចវោការេ បច្ឆិមភវិកានំ អសញ្ញសត្តានំ តេសំ តត្ថ រូបក្ខន្ធោ ឧប្បជ្ជិត្ថ, នោ ច តេសំ តត្ថ វេទនាក្ខន្ធោ ឧប្បជ្ជិស្សតិ. ឥតរេសំ បញ្ចវោការានំ តេសំ តត្ថ រូបក្ខន្ធោ ច ឧប្បជ្ជិត្ថ វេទនាក្ខន្ធោ ច ឧប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ ឧប្បជ្ជិស្សតិ តស្ស តត្ថ រូបក្ខន្ធោ ឧប្បជ្ជិត្ថាតិ?

អរូបានំ តេសំ តត្ថ វេទនាក្ខន្ធោ ឧប្បជ្ជិស្សតិ, នោ ច តេសំ តត្ថ រូបក្ខន្ធោ ឧប្បជ្ជិត្ថ. បញ្ចវោការានំ តេសំ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជិត្ថ.

៩៧. (ក) យស្ស យត្ថ វេទនាក្ខន្ធោ ឧប្បជ្ជិត្ថ តស្ស តត្ថ សញ្ញាក្ខន្ធោ ឧប្បជ្ជិស្សតីតិ?

បច្ឆិមភវិកានំ តេសំ តត្ថ វេទនាក្ខន្ធោ ឧប្បជ្ជិត្ថ, នោ ច តេសំ តត្ថ សញ្ញាក្ខន្ធោ ឧប្បជ្ជិស្សតិ. ឥតរេសំ ចតុវោការានំ បញ្ចវោការានំ តេសំ តត្ថ វេទនាក្ខន្ធោ ច ឧប្បជ្ជិត្ថ សញ្ញាក្ខន្ធោ ច ឧប្បជ្ជិស្សតិ.

(ខ) យស្ស វា បន យត្ថ សញ្ញាក្ខន្ធោ ឧប្បជ្ជិស្សតិ តស្ស តត្ថ វេទនាក្ខន្ធោ ឧប្បជ្ជិត្ថាតិ? អាមន្តា.

(ឃ) បច្ចនីកបុគ្គលោ

៩៨. (ក) យស្ស រូបក្ខន្ធោ នុប្បជ្ជិត្ថ តស្ស វេទនាក្ខន្ធោ នុប្បជ្ជិស្សតីតិ? នត្ថិ.

(ខ) យស្ស វា បន វេទនាក្ខន្ធោ នុប្បជ្ជិស្សតិ តស្ស រូបក្ខន្ធោ នុប្បជ្ជិត្ថាតិ? ឧប្បជ្ជិត្ថ.

៩៩. (ក) យស្ស វេទនាក្ខន្ធោ នុប្បជ្ជិត្ថ តស្ស សញ្ញាក្ខន្ធោ នុប្បជ្ជិស្សតីតិ? នត្ថិ.

(ខ) យស្ស វា បន សញ្ញាក្ខន្ធោ នុប្បជ្ជិស្សតិ តស្ស វេទនាក្ខន្ធោ នុប្បជ្ជិត្ថាតិ? ឧប្បជ្ជិត្ថ.

(ង) បច្ចនីកឱកាសោ

១០០. (ក) យត្ថ រូបក្ខន្ធោ នុប្បជ្ជិត្ថ តត្ថ វេទនាក្ខន្ធោ នុប្បជ្ជិស្សតីតិ? ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ នុប្បជ្ជិស្សតិ តត្ថ រូបក្ខន្ធោ នុប្បជ្ជិត្ថាតិ? ឧប្បជ្ជិត្ថ.

១០១. (ក) យត្ថ វេទនាក្ខន្ធោ នុប្បជ្ជិត្ថ តត្ថ សញ្ញាក្ខន្ធោ នុប្បជ្ជិស្សតីតិ? អាមន្តា.

(ខ) យត្ថ វា បន សញ្ញាក្ខន្ធោ នុប្បជ្ជិស្សតិ តត្ថ វេទនាក្ខន្ធោ នុប្បជ្ជិត្ថាតិ? អាមន្តា.

(ច) បច្ចនីកបុគ្គលោកាសា

១០២. (ក) យស្ស យត្ថ រូបក្ខន្ធោ នុប្បជ្ជិត្ថ តស្ស តត្ថ វេទនាក្ខន្ធោ នុប្បជ្ជិស្សតីតិ?

អរូបានំ តេសំ តត្ថ រូបក្ខន្ធោ នុប្បជ្ជិត្ថ, នោ ច តេសំ តត្ថ វេទនាក្ខន្ធោ នុប្បជ្ជិស្សតិ. សុទ្ធាវាសានំ អរូបេ បច្ឆិមភវិកានំ តេសំ តត្ថ រូបក្ខន្ធោ ច នុប្បជ្ជិត្ថ វេទនាក្ខន្ធោ ច នុប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ នុប្បជ្ជិស្សតិ តស្ស តត្ថ រូបក្ខន្ធោ នុប្បជ្ជិត្ថាតិ?

បញ្ចវោការេ បច្ឆិមភវិកានំ អសញ្ញសត្តានំ តេសំ តត្ថ វេទនាក្ខន្ធោ នុប្បជ្ជិស្សតិ, នោ ច តេសំ តត្ថ រូបក្ខន្ធោ នុប្បជ្ជិត្ថ. សុទ្ធាវាសានំ អរូបេ បច្ឆិមភវិកានំ តេសំ តត្ថ វេទនាក្ខន្ធោ ច នុប្បជ្ជិស្សតិ រូបក្ខន្ធោ ច នុប្បជ្ជិត្ថ.

១០៣. (ក) យស្ស យត្ថ វេទនាក្ខន្ធោ នុប្បជ្ជិត្ថ តស្ស តត្ថ សញ្ញាក្ខន្ធោ នុប្បជ្ជិស្សតីតិ? អាមន្តា.

(ខ) យស្ស វា បន យត្ថ សញ្ញាក្ខន្ធោ នុប្បជ្ជិស្សតិ តស្ស តត្ថ វេទនាក្ខន្ធោ នុប្បជ្ជិត្ថាតិ?

បច្ឆិមភវិកានំ តេសំ តត្ថ សញ្ញាក្ខន្ធោ នុប្បជ្ជិស្សតិ, នោ ច តេសំ តត្ថ វេទនាក្ខន្ធោ នុប្បជ្ជិត្ថ. សុទ្ធាវាសានំ អសញ្ញសត្តានំ តេសំ តត្ថ សញ្ញាក្ខន្ធោ ច នុប្បជ្ជិស្សតិ វេទនាក្ខន្ធោ ច នុប្បជ្ជិត្ថ.

ឧប្បាទវារោ និដ្ឋិតោ.