(៤) បច្ចុប្បន្នាតីតវារោ

(ក) អនុលោមបុគ្គលោ

៦៨. (ក) យស្ស រូបក្ខន្ធោ ឧប្បជ្ជតិ តស្ស វេទនាក្ខន្ធោ ឧប្បជ្ជិត្ថាតិ? អាមន្តា.

(ខ) យស្ស វា បន វេទនាក្ខន្ធោ ឧប្បជ្ជិត្ថ តស្ស រូបក្ខន្ធោ ឧប្បជ្ជតីតិ?

សព្ពេសំ ចវន្តានំ អរូបំ ឧបបជ្ជន្តានំ តេសំ វេទនាក្ខន្ធោ ឧប្បជ្ជិត្ថ, នោ ច តេសំ រូបក្ខន្ធោ ឧប្បជ្ជតិ. បញ្ចវោការំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ វេទនាក្ខន្ធោ ច ឧប្បជ្ជិត្ថ រូបក្ខន្ធោ ច ឧប្បជ្ជតិ.

៦៩. (ក) យស្ស វេទនាក្ខន្ធោ ឧប្បជ្ជតិ តស្ស សញ្ញាក្ខន្ធោ ឧប្បជ្ជិត្ថាតិ? អាមន្តា.

(ខ) យស្ស វា បន សញ្ញាក្ខន្ធោ ឧប្បជ្ជិត្ថ តស្ស វេទនាក្ខន្ធោ ឧប្បជ្ជតីតិ?

សព្ពេសំ ចវន្តានំ អសញ្ញសត្តំ ឧបបជ្ជន្តានំ តេសំ សញ្ញាក្ខន្ធោ ឧប្បជ្ជិត្ថ, នោ ច តេសំ វេទនាក្ខន្ធោ ឧប្បជ្ជតិ. ចតុវោការំ បញ្ចវោការំ ឧបបជ្ជន្តានំ តេសំ សញ្ញាក្ខន្ធោ ច ឧប្បជ្ជិត្ថ វេទនាក្ខន្ធោ ច ឧប្បជ្ជតិ.

(ខ) អនុលោមឱកាសោ

៧០. (ក) យត្ថ រូបក្ខន្ធោ ឧប្បជ្ជតិ តត្ថ វេទនាក្ខន្ធោ ឧប្បជ្ជិត្ថាតិ?

អសញ្ញសត្តេ តត្ថ រូបក្ខន្ធោ ឧប្បជ្ជតិ, នោ ច តត្ថ វេទនាក្ខន្ធោ ឧប្បជ្ជិត្ថ. បញ្ចវោការេ តត្ថ រូបក្ខន្ធោ ច ឧប្បជ្ជតិ វេទនាក្ខន្ធោ ច ឧប្បជ្ជិត្ថ.

(ខ) យត្ថ វា បន វេទនាក្ខន្ធោ ឧប្បជ្ជិត្ថ តត្ថ រូបក្ខន្ធោ ឧប្បជ្ជតីតិ?

អរូបេ តត្ថ វេទនាក្ខន្ធោ ឧប្បជ្ជិត្ថ, នោ ច តត្ថ រូបក្ខន្ធោ ឧប្បជ្ជតិ. បញ្ចវោការេ តត្ថ វេទនាក្ខន្ធោ ច ឧប្បជ្ជិត្ថ រូបក្ខន្ធោ ច ឧប្បជ្ជតិ.

៧១. (ក) យត្ថ វេទនាក្ខន្ធោ ឧប្បជ្ជតិ តត្ថ សញ្ញាក្ខន្ធោ ឧប្បជ្ជិត្ថាតិ? អាមន្តា.

(ខ) យត្ថ វា បន សញ្ញាក្ខន្ធោ ឧប្បជ្ជិត្ថ តត្ថ វេទនាក្ខន្ធោ ឧប្បជ្ជតីតិ? អាមន្តា.

(គ) អនុលោមបុគ្គលោកាសា

៧២. (ក) យស្ស យត្ថ រូបក្ខន្ធោ ឧប្បជ្ជតិ តស្ស តត្ថ វេទនាក្ខន្ធោ ឧប្បជ្ជិត្ថាតិ?

សុទ្ធាវាសំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ រូបក្ខន្ធោ ឧប្បជ្ជតិ, នោ ច តេសំ តត្ថ វេទនាក្ខន្ធោ ឧប្បជ្ជិត្ថ. ឥតរេសំ បញ្ចវោការំ ឧបបជ្ជន្តានំ តេសំ តត្ថ រូបក្ខន្ធោ ច ឧប្បជ្ជតិ វេទនាក្ខន្ធោ ច ឧប្បជ្ជិត្ថ.

(ខ) យស្ស វា បន យត្ថ វេទនាក្ខន្ធោ ឧប្បជ្ជិត្ថ តស្ស តត្ថ រូបក្ខន្ធោ ឧប្បជ្ជតីតិ?

បញ្ចវោការា ចវន្តានំ អរូបានំ តេសំ តត្ថ វេទនាក្ខន្ធោ ឧប្បជ្ជិត្ថ, នោ ច តេសំ តត្ថ រូបក្ខន្ធោ ឧប្បជ្ជតិ. បញ្ចវោការំ ឧបបជ្ជន្តានំ តេសំ តត្ថ វេទនាក្ខន្ធោ ច ឧប្បជ្ជិត្ថ រូបក្ខន្ធោ ច ឧប្បជ្ជតិ.

៧៣. (ក) យស្ស យត្ថ វេទនាក្ខន្ធោ ឧប្បជ្ជតិ តស្ស តត្ថ សញ្ញាក្ខន្ធោ ឧប្បជ្ជិត្ថាតិ?

សុទ្ធាវាសំ ឧបបជ្ជន្តានំ តេសំ តត្ថ វេទនាក្ខន្ធោ ឧប្បជ្ជតិ, នោ ច តេសំ តត្ថ សញ្ញាក្ខន្ធោ ឧប្បជ្ជិត្ថ. ឥតរេសំ ចតុវោការំ បញ្ចវោការំ ឧបបជ្ជន្តានំ តេសំ តត្ថ វេទនាក្ខន្ធោ ច ឧប្បជ្ជតិ សញ្ញាក្ខន្ធោ ច ឧប្បជ្ជិត្ថ.

(ខ) យស្ស វា បន យត្ថ សញ្ញាក្ខន្ធោ ឧប្បជ្ជិត្ថ តស្ស តត្ថ វេទនាក្ខន្ធោ ឧប្បជ្ជតីតិ?

ចតុវោការា បញ្ចវោការា ចវន្តានំ តេសំ តត្ថ សញ្ញាក្ខន្ធោ ឧប្បជ្ជិត្ថ, នោ ច តេសំ តត្ថ វេទនាក្ខន្ធោ ឧប្បជ្ជតិ. ចតុវោការំ បញ្ចវោការំ ឧបបជ្ជន្តានំ តេសំ តត្ថ សញ្ញាក្ខន្ធោ ច ឧប្បជ្ជិត្ថ វេទនាក្ខន្ធោ ច ឧប្បជ្ជតិ.

(ឃ) បច្ចនីកបុគ្គលោ

៧៤. (ក) យស្ស រូបក្ខន្ធោ នុប្បជ្ជតិ តស្ស វេទនាក្ខន្ធោ នុប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន វេទនាក្ខន្ធោ នុប្បជ្ជិត្ថ តស្ស រូបក្ខន្ធោ នុប្បជ្ជតីតិ? នត្ថិ.

៧៥. (ក) យស្ស វេទនាក្ខន្ធោ នុប្បជ្ជតិ តស្ស សញ្ញាក្ខន្ធោ នុប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន សញ្ញាក្ខន្ធោ នុប្បជ្ជិត្ថ តស្ស វេទនាក្ខន្ធោ នុប្បជ្ជតីតិ? នត្ថិ.

(ង) បច្ចនីកឱកាសោ

៧៦. (ក) យត្ថ រូបក្ខន្ធោ នុប្បជ្ជតិ តត្ថ វេទនាក្ខន្ធោ នុប្បជ្ជិត្ថាតិ? ឧប្បជ្ជិត្ថ.

(ខ) យត្ថ វា បន វេទនាក្ខន្ធោ នុប្បជ្ជិត្ថ តត្ថ រូបក្ខន្ធោ នុប្បជ្ជតីតិ? ឧប្បជ្ជតិ.

៧៧. (ក) យត្ថ វេទនាក្ខន្ធោ នុប្បជ្ជតិ តត្ថ សញ្ញាក្ខន្ធោ នុប្បជ្ជិត្ថាតិ? អាមន្តា.

(ខ) យត្ថ វា បន សញ្ញាក្ខន្ធោ នុប្បជ្ជិត្ថ តត្ថ វេទនាក្ខន្ធោ នុប្បជ្ជតីតិ? អាមន្តា.

(ច) បច្ចនីកបុគ្គលោកាសា

៧៨. (ក) យស្ស យត្ថ រូបក្ខន្ធោ នុប្បជ្ជតិ តស្ស តត្ថ វេទនាក្ខន្ធោ នុប្បជ្ជិត្ថាតិ?

បញ្ចវោការា ចវន្តានំ អរូបានំ តេសំ តត្ថ រូបក្ខន្ធោ នុប្បជ្ជតិ, នោ ច តេសំ តត្ថ វេទនាក្ខន្ធោ នុប្បជ្ជិត្ថ. សុទ្ធាវាសេ បរិនិព្ពន្តានំ អសញ្ញសត្តា ចវន្តានំ តេសំ តត្ថ រូបក្ខន្ធោ ច នុប្បជ្ជតិ វេទនាក្ខន្ធោ ច នុប្បជ្ជិត្ថ.

(ខ) យស្ស វា បន យត្ថ វេទនាក្ខន្ធោ នុប្បជ្ជិត្ថ តស្ស តត្ថ រូបក្ខន្ធោ នុប្បជ្ជតីតិ?

សុទ្ធាវាសំ ឧបបជ្ជន្តានំ អសញ្ញសត្តំ ឧបបជ្ជន្តានំ តេសំ តត្ថ វេទនាក្ខន្ធោ នុប្បជ្ជិត្ថ, នោ ច តេសំ តត្ថ រូបក្ខន្ធោ នុប្បជ្ជតិ. សុទ្ធាវាសេ បរិនិព្ពន្តានំ អសញ្ញសត្តា ចវន្តានំ តេសំ តត្ថ វេទនាក្ខន្ធោ ច នុប្បជ្ជិត្ថ រូបក្ខន្ធោ ច នុប្បជ្ជតិ.

៧៩. (ក) យស្ស យត្ថ វេទនាក្ខន្ធោ នុប្បជ្ជតិ តស្ស តត្ថ សញ្ញាក្ខន្ធោ នុប្បជ្ជិត្ថាតិ?

ចតុវោការា បញ្ចវោការា ចវន្តានំ តេសំ តត្ថ វេទនាក្ខន្ធោ នុប្បជ្ជតិ, នោ ច តេសំ តត្ថ សញ្ញាក្ខន្ធោ នុប្បជ្ជិត្ថ. សុទ្ធាវាសេ បរិនិព្ពន្តានំ អសញ្ញសត្តានំ តេសំ តត្ថ វេទនាក្ខន្ធោ ច នុប្បជ្ជតិ សញ្ញាក្ខន្ធោ ច នុប្បជ្ជិត្ថ.

(ខ) យស្ស វា បន យត្ថ សញ្ញាក្ខន្ធោ នុប្បជ្ជិត្ថ តស្ស តត្ថ វេទនាក្ខន្ធោ នុប្បជ្ជតីតិ?

សុទ្ធាវាសំ ឧបបជ្ជន្តានំ តេសំ តត្ថ សញ្ញាក្ខន្ធោ នុប្បជ្ជិត្ថ, នោ ច តេសំ តត្ថ វេទនាក្ខន្ធោ នុប្បជ្ជតិ. សុទ្ធាវាសេ បរិនិព្ពន្តានំ អសញ្ញសត្តានំ តេសំ តត្ថ សញ្ញាក្ខន្ធោ ច នុប្បជ្ជិត្ថ វេទនាក្ខន្ធោ ច នុប្បជ្ជតិ.